Kuhĩrĩria Ngai
‘Niĩ, Jehova Ngai Waku, Nĩndĩrakũnyita Guoko Gwaku kwa Ũrĩo’
“REHE guoko ngũnyite,” ũguo nĩguo mũthuri eeraga mũrũwe hĩndĩ ĩrĩa marehaarĩria gũkĩra barabara ĩkoragwo na ngari nyingĩ. Kanyitĩtwo guoko nĩ ithe ũrĩ na hinya, kamwana kau kaiguaga karĩ kagitĩre, gatarĩ na guoya. Hihi nĩ ũrĩ werirĩria mũndũ mũna akũnyite guoko na agũtongorie ũhiũranie na mĩtangĩko ya ũtũũro? Angĩkorũo nĩguo, no wone ciugo cia gũkũũmĩrĩria iria ciaandĩkirũo nĩ Isaia.—Thoma Isaia 41:10, 13.
Isaia eeraga ciana cia Israeli ciugo icio. O na gũtuĩka Ngai onaga rũrĩrĩ rũu rũrĩ ‘kĩndũ kĩĩ bata mũno,’ maathiũrũrũkĩirio nĩ thũ. (Thama 19:5) Hihi Aisiraeli nĩ maabataraga gwĩtigĩra? Jehova aahũthĩrire Isaia gũkinyia ndũmĩrĩri ya kũũmĩrĩria. Tũgĩthuthuria ciugo icio, rekei tũririkane atĩ nĩ ihũthĩkaga nginya kũrĩ athathaiya a Ngai ũmũthĩ.—Aroma 15:4.
Jehova aroiga, “Tiga gwĩtigĩra.” (Mũhari wa 10) Jehova arĩ na gĩtũmi gĩa kwĩra andũ matige gwĩtigĩra. Jehova nĩ arataarĩria nĩkĩ andũ ake matirabatara gwĩtigĩra: “Nĩ gũkorũo ndĩ hamwe nawe.” We ti ũteithio ũrĩ kũraya, atwĩragĩre tu gũũka gũtũteithia rĩrĩa twabatara. Arenda andũ mamenye atĩ arĩ hamwe nao—ta arĩ mwena-inĩ wao—ehaarĩirie kũmateithia. Na githĩ ũcio ti ũndũ wa gũtũũmĩrĩria?
Jehova ningĩ nĩ arahe athathaiya ake ũũma ũyũ: “Menya ũmake.” (Mũhari wa 10) Mũndũ angĩmaka atĩa? Kiugo gĩa Kĩhibirania kĩrĩa gĩtaũrĩtwo ‘kũmaka’ no gĩkorũo gĩkĩaria ũhoro wa andũ arĩa “maroraroraga mĩena yothe kuona kana nĩ kũrĩ na ũgwati hakuhĩ nao.” Jehova nĩ arataarĩria nĩkĩ andũ ake matirabatara kũrorarora mwena na mwena nĩ ũndũ wa guoya: “Nĩ ũndũ niĩ nĩ niĩ Ngai waku.” Nĩ ũndũ ũrĩkũ ũngĩkorũo ũrĩ wa kũũmĩrĩria gũkĩra ũcio? Jehova nĩwe “Ũrĩa-wĩ-Ĩgũrũ-Mũno,” “Mwene-Hinya.” (Thaburi 91:1) Angĩkorũo ũrĩa wĩ na hinya-wothe Jehova nĩwe Ngai wao-rĩ, mangĩgĩtigĩra nĩkĩ?
Kwoguo-rĩ, athathaiya a Jehova mangĩrĩgĩrĩra kĩĩ kuuma kũrĩ we? Araamerĩra ũũ: “Ti itherũ nĩndĩĩgũtiiragĩrĩra na guoko gwakwa kwa ũrĩo gwa ũthingu.” (Mũhari wa 10) Agacoka akameera ũũ: ‘Niĩ, Jehova Ngai waku, nĩndĩrakũnyita guoko gwaku kwa ũrĩo.’ (Mũhari wa 13) Wĩciragia ũhoro wa kĩĩ rĩrĩa waigua ciugo icio? Ibuku rĩmwe rĩtaaragĩria atĩ, “mĩhari ĩyo yerĩ ĩtũheaga mbica njega ya mũciari na mwana. [Ithe wa mwana] ndakoragwo ho tu amũgitĩre, no akoragwo hamwe na mwana wake; ndangĩtĩkĩra matigithũkanio.” Ta wĩcirie—Jehova ndegwĩtĩkĩria andũ ake matigithũkanio nake, nginya hĩndĩ ĩrĩa maũndũ marĩ maritũ mũno ũtũũro-inĩ wao.—Ahibirania 13:5, 6.
Athathaiya a Jehova ũmũthĩ no momĩrĩrio mũno nĩ ciugo iria ciaandĩkirũo nĩ Isaia. ‘Mahinda-inĩ maya ma ũgwati,’ rĩmwe na rĩmwe no tũigue tũkuĩte ngoro nĩ ũndũ mĩtangĩko ya ũtũũro. (2 Timotheo 3:1) No tũtiagĩrĩirũo kũhiũrania na moritũ macio tũrĩ oiki. Jehova nĩ ehaarĩirie gũtũnyita guoko. O ta mwana ũrehoka ithe, no tũnyite biũ guoko gwake kwĩ hinya, tũrĩ na ũũma atĩ nĩ egũtũtongoria ũrĩa kwagĩrĩire na atũteithie hĩndĩ ĩrĩa tũrĩ na bata.—Thaburi 63:7, 8.
Thoma gĩcunjĩ kĩa Bibilia mweri-inĩ wa Janũarĩ