Athomi Aitũ Maroria Atĩrĩ . . .

Ngai eerire Iburahimu arute mũrũwe arĩ igongona nĩkĩ?

▪ Ta ũrĩa ibuku rĩa Bibilia rĩa Kĩambĩrĩria rĩonanĩtie, Jehova eerire Iburahimu arute mũrũwe Isaka arĩ igongona. (Kĩambĩrĩria 22:2) Athomi amwe a Bibilia matitaũkagĩrũo wega nĩ ũhoro ũcio. Profesa ũmwe wĩtagwo Carol oigire ũũ: “Rĩrĩa ndaiguire rũgano rũu rĩa mbere ndĩ mũnini, nĩ ndarakarire.” Agĩcoka akĩongerera ũũ: “Nĩ Ngai wa mũthemba ũrĩkũ ũngĩra mũndũ eke ũndũ ta ũcio?” O na gũtuĩka mũndũ no aigue ũguo, nĩ tũrabatara kũririkana maũndũ maigana ũna.

Wa mbere, ta wĩcirie ũrĩa Jehova ateekire. Ngai ndeetĩkĩririe Iburahimu arute mwana wake arĩ igongona, o na gũtuĩka Iburahimu nĩ eehaarĩirie gwĩka ũguo, na ndarĩ era mũndũ ũngĩ eke ũndũ ta ũcio rĩngĩ. Jehova endaga athathaiya ake othe, nginya twana, mathiĩ na mbere gũtũũra—makorũo na ũtũũro wa ihinda iraya marakenera na makaiganĩra.

Wa kerĩ, Bibilia yonanagia atĩ Jehova aarĩ na gĩtũmi kĩa mwanya gĩa kwĩra Iburahimu arute Isaka arĩ igongona. Ngai nĩ aamenyaga atĩ, mĩaka mĩingĩ thutha ũcio, nĩ angĩgetĩkĩria Mũrũ Wake mwene,a Jesu, akue nĩ ũndũ witũ. (Mathayo 20:28) Jehova nĩ eendaga gũtuonia ũrĩa ũndũ ũcio ũngĩgakorũo ũrĩ wa thogora mũnene harĩ we. Aatũheire ngerekano njega mũno ya ũrĩa igongona rĩu rĩngĩgaakorũo, rĩrĩa eerire Iburahimu eke ũguo. Na njĩra ĩrĩkũ?

Ta wĩcirie ũhoro wa ciugo cia Jehova kũrĩ Iburahimu: ‘Rĩu ũkĩra woe mũrũguo o ũcio wa mũmwe, ũcio wendete mũno, o we Isaaka, ũkamũrute atuĩke ihaki rĩa njino.’ (Kĩambĩrĩria 22:2) Ta rora ũrĩa Jehova oigire wĩgiĩ Isaka, “ũcio wendete mũno.” Jehova nĩ aamenyaga ũrĩa Iburahimu eendete Isaka. Ningĩ Ngai nĩ aamenyaga ũrĩa We eendete Mũrũwe, Jesu. Jehova eendete Jesu mũno ũũ atĩ maita merĩ nĩ aaririe ĩmwe kwa ĩmwe kuuma igũrũ, akiuga ũũ: “Mũrũ wakwa nyendete mũno.”—Mariko 1:11; 9:7.

Ningĩ ta rora wone atĩ Jehova aahũthĩrire ciugo irĩ na gĩtĩo akĩaria na Iburahimu. Mũthomi ũmwe wa maũndũ ma Bibilia oigire atĩ ciugo icio Ngai aahũthĩrire cionanagia atĩ “MWATHANI nĩ aamenyaga ũrĩa ũndũ ũcio ũngĩatuurire Iburahimu.” O ta ũrĩa tũngĩhũũra mbica, ũndũ ũcio nĩ ũngĩareheire Iburahimu kĩeha kĩnene; na njĩra o ta ĩyo, no tũhũũre mbica ya ruo rũnene rũrĩa Jehova aaiguire akĩĩrorera Mwana wake endete akĩnyarirĩka na agĩkua. Hatarĩ nganja rũu rwarĩ ruo rũrĩa rũnene mũno Jehova arĩ aigua kana akaigua nginya tene.

Kwoguo-rĩ, o na gũtuĩka ũndũ ũcio Jehova eerire Iburahimu eke no ũtũmakie-rĩ, nĩ wega tũririkane atĩ Jehova ndeetĩkĩririe mũthuri ũcio mwĩhokeku wa tene arute mũrũwe arĩ igongona. Akĩgirĩrĩria Iburahimu akorũo nĩ ruo rũrĩa rũnene mũno mũciari angĩigua; akĩgitĩra Isaka ndagakue. O na kũrĩ ũguo, Jehova ndaagitĩire ‘Mũrũ wake mwene, tiga o kũmũruta aamũrutire nĩ ũndũ witũ ithuothe.’ (Aroma 8:32) Nĩ kĩĩ gĩatũmire Jehova etĩkĩre gũkorũo nĩ ũndũ mũritũ ũguo? Eekire ũguo “nĩ getha tũgĩe muoyo.” (1 Johana 4:9) Kĩu nĩ kĩririkania kĩnene mũno kĩa wendo wa Ngai harĩ ithuĩ! Githĩ o na ithuĩ tũtikĩagĩrĩirũo nĩ kuonania wendo witũ harĩ we o ta ũguo?b

[Ũhoro wa magũrũ-inĩ]