Ũriũkio wa Jesu Ũrehaga Muoyo!

ŨRIŨKIO wa Jesu ti rũgano tu rwa tene rũtarĩ na bata harĩ ithuĩ ũmũthĩ. Mũtũmwo Paulo nĩ aagwetire bata wa ũriũkio ũcio rĩrĩa oigire ũũ: “Kristo nĩariũkĩtio akoima kũrĩ arĩa akuũ, agagĩtuĩka mũtũrio [maciaro ma mbere] wa andũ arĩa makomete. Amu kuona atĩ nĩ mũndũ watũmire gũũke gĩkuũ, o ũguo ningĩ nĩ mũndũ watũmire kũriũka kwa andũ arĩa akuũ gũũke o nakuo. Nĩ gũkorũo o ta ũrĩa andũ othe makuaga nĩ ũndũ wa Adamu-rĩ, no taguo andũ othe magacokio muoyo nĩ ũndũ wa Kristo.”—1 Akorintho 15:20-22.

Jesu aariũkirio Nisani 16, mwaka wa 33 Mahinda Maitũ (M.M.), mũthenya ũrĩa Ayahudi, maarutĩire Jehova Ngai maciaro ma mbere ma mĩgũnda yao thĩinĩ wa hekarũ Jerusalemu. Na njĩra ya gwĩta Jesu maciaro ma mbere, Paulo onanirie atĩ nĩ kũrĩ andũ angĩ mangĩkariũkio.

Ciugo iria irũmĩrĩire cia Paulo itaarĩirie kĩrĩa ũriũkio wa Jesu ũhingĩtie. Oigire ũũ: “Amu kuona atĩ nĩ mũndũ watũmire gũũke gĩkuũ, o ũguo ningĩ nĩ mũndũ watũmire kũriũka kwa andũ arĩa akuũ gũũke o nakuo.” Ithuothe tũkuaga nĩ ũndũ wa mehia na kwaga gũkinyanĩra kũrĩa twagaire kuuma kũrĩ Adamu. O na kũrĩ ũguo, nĩ ũndũ wa kũruta muoyo wake mũkinyanĩru ũtuĩke ũkũũri, Jesu aatũmire andũ magĩe na mweke wa gũkũũrũo ũkombo-inĩ wa mehia na gĩkuũ na njĩra ya kũriũkio kwao. Agĩtiriha ũhoro ũcio, Paulo aandĩkire ũũ thĩinĩ wa Aroma 6:23: “Mũcara wa wĩhia nĩ gĩkuũ, no kĩheo kĩrĩa Ngai aheanaga kiumanĩte na Wega wake nĩ muoyo wa tene na tene, ũrĩa wĩ thĩinĩ wa Kristo Jesu Mwathani witũ.”

Jesu we mwene nĩ aatarĩirie bata wa gĩkuũ na ũriũkio wake gũtwerekera. Akĩaria igũrũ rĩake we mwene, oigire ũũ: “Mũrũ wa mũndũ e na bata ahaicio igũrũ: nĩ getha mũndũ o wothe wĩtĩkĩtie agĩe muoyo wa tene na tene thĩinĩ wake we. Amu Ngai, tondũ wa ũrĩa endete kĩrĩndĩ gĩa gũkũ thĩ, nĩaarutire Mũrũ wake wa mũmwe, nĩ getha mũndũ o wothe ũmwĩhokete ndakore, no agĩe muoyo wa tene na tene.”—Johana 3:14-16.

Ta hũra mbica—muoyo wa tene na tene gũtarĩ na ruo, mĩnyamaro, kana kĩeha! (Kũguũrĩrio 21:3, 4) Na githĩ kĩu ti kĩrĩgĩrĩro gĩa gũcanjamũra mũno! Mũthomi ũmwe oigire ũũ ũhoro wĩgiĩ ũriũkio: “Rĩrĩa mbĩrĩra iratũririkania ũrĩa ũtũũro ũrĩ mũkuhĩ, ũriũkio ũtũririkanagia ũrĩa matukũ ma gĩkuũ marĩ makuhĩ.” Hatarĩ nganja, kũriũka kwa Jesu kũrehaga muoyo.