Inyuĩ Athuri a Kĩũngano-rĩ, nĩ Mũrĩkagĩra “Mũndũ Ũrĩa Mũnogu” Hinya?

Angela,a nĩ mwarĩ wa Ithe witũ ũrĩ mĩaka-inĩ ya 30. Athuri a kĩũngano nĩ maroka kũmũceerera, na nĩ ũndũ ũcio arĩ na guoya hanini. Hihi marenda kũmwĩra atĩa? Ma nĩ atĩ, nĩ atĩrĩte mĩcemanio ĩigana ũna, ĩndĩ nĩ mũnogu mũno tondũ arutaga wĩra wa gũtumberia andũ akũrũ mũthenya mũgima. Makĩria ma mĩtangĩko yake ya o mũthenya, nĩ aratangĩka mũno tondũ nyina nĩ mũrũaru.

Hihi ũrĩ mũthuri wa kĩũngano, ũngĩthiĩ gũceerera Angela-rĩ, ũngĩkĩra ngoro ‘mũndũ ta ũcio mũnogu’ atĩa? (Jer. 31:25) Ũngĩĩhaarĩria atĩa nĩguo iceera rĩaku rĩkorũo na maciaro mega?

WĨCIRIE MAŨNDŨ MARĨA MŨNDŨ ARAHIŨRANIA NAMO

Rĩmwe na rĩmwe, nĩ tũiguaga tũnogete nĩ ũndũ wa wĩra witũ wa kĩĩmwĩrĩ kana mawĩra maitũ ma kĩĩroho. Kwa ngerekano, mũnabii Danieli ‘nĩ aanyitirũo nĩ kĩeha’ rĩrĩa onire kĩoneki aatataũkagĩrũo nĩkĩo. (Dan. 8:27, The Holy Bible in Gĩkũyũ Language) Nĩ eekĩrirũo ngoro rĩrĩa oimĩrĩirũo nĩ mũraika Gaburieli. Mũraika ũcio watũmĩtwo nĩ Ngai, aamũteithirie gũtaũkĩrũo, akĩmwĩra atĩ mahoya make nĩ maiguĩtwo nĩ Jehova na ningĩ akĩmwĩra atĩ aarĩ o “mũndũ mwendeku makĩria.” (Dan. 9:21-23) Ihinda-inĩ rĩngĩ thutha ũcio, mũraika ũngĩ nĩ aaririe ciugo ciahaarĩirio wega mũno iria ciekĩrire mũnabii ũcio warĩ mũnogu hinya.—Dan. 10:19.

O ũndũ ũmwe na ũcio-rĩ, mbere ya gũthiĩ gũceerera Mũkristiano ũrĩa ũngĩkorũo anogete kana agakua ngoro, amba wĩcirie ũhoro wa maũndũ marĩa arahiũrania namo. Hihi nĩ mathĩna marĩkũ aracemania namo? Mathĩna macio mangĩkorũo makĩmũniina hinya na njĩra ĩrĩkũ? Nĩ ngumo irĩkũ njega akoragwo nacio? Mũrũ wa Ithe witũ wĩtagwo Richard ũrĩa ũtungatĩire arĩ mũthuri wa kĩũngano makĩria ma mĩaka 20 oigire ũũ: “Kĩrĩa ndoraga mũno nĩ maũndũ marĩa mega ma aarĩ na ariũ a Ithe witũ.” Aacokire akiuga ũũ: “Nĩ ũndũ wa kwamba gwĩciria wega maũndũ marĩa marahiũrania namo, ũkoragwo ũrĩ ũndũ mũhũthũ kũmenya maũndũ marĩa ngũhũthĩra kũmeekĩra ngoro kũringana na mabataro mao.” Angĩkorũo mũgũthiĩ gũceerera Mũkristiano mũrĩ na mũthuri ũngĩ-rĩ, githĩ ti wega kwamba gwĩciria mũrĩ hamwe maũndũ marĩa Mũkristiano ũcio arahiũrania namo?

TEITHIA AARĨ NA ARIŨ A ITHE WITŨ MAHOTE KWĨYARIA

Ti ũndũ mũhũthũ mũndũ kwĩyaria maũndũ make ma ngoro thĩinĩ. Kwa ngerekano: Mũrũ wa Ithe witũ no aritũhĩrũo nĩ kwĩyaria rĩrĩa athuri mamũceerera. Ũngĩmũteithia atĩa ahote kwĩyaria? Kũmwarĩria ũcanjamũkĩte na kũmwarĩria na njĩra ya ũrata no kũgĩe na moimĩrĩro mega. Michael, ũrĩa ũtungatĩte arĩ mũthuri wa kĩũngano makĩria ma mĩaka 40, kaingĩ ambagĩrĩria iceera rĩake na ciugo ta ici: “Ũmwe wa maũndũ marĩa mũthuri wa kĩũngano akenagĩra mũno nĩ gũceerera aarĩ na ariũ a Ithe witũ kwao mĩciĩ na kũmamenya wega makĩria. Nĩ ũndũ ũcio ngoretwo ngĩũria rĩrĩa mũthenya ũyũ ũgakinya.”

Ti ũũru kwambĩrĩria iceera rĩanyu na mahoya ma kuuma ngoro. Thĩinĩ wa mahoya make, mũtũmwo Paulo aaririe mũno ũhoro wa wĩtĩkio, wendo na ũkirĩrĩria wa aarĩ na ariũ a Ithe witũ. (1 Thes. 1:2, 3) Ũngĩgweta mahoya-inĩ ngumo njega cia mũrũ wa Ithe witũ iria ikũgucagĩrĩria, nĩ ũkũhaarĩria ngoro yaku na yake nĩguo mũkorũo na ndeereti njega. Ningĩ ciugo ciaku no ikorũo na ũhoti wa kũhooreria. Mũthuri ũmwe wa kĩũngano wĩtagwo Ray oigire atĩ, “Rĩmwe na rĩmwe nĩ tũriganagĩrũo nĩ maũndũ mega marĩa tũrahingia, nĩ ũndũ ũcio rĩrĩa mũndũ ũngĩ atũririkania ũndũ ũcio, nĩ twĩkĩragwo ngoro mũno.”

HEANAGA KĨHEO KĨA ROHO

O ta Paulo, o nawe no ũhote ‘kũheana kĩheo kĩa roho’ na njĩra ya gũteithia mũndũ ũkĩhũthĩra Bibilia o na akorũo no mũhari ũmwe ũgũthoma. (Rom. 1:11) Kwa ngerekano, Mũkristiano ũkuĩte ngoro no eigue atarĩ kĩene o ta mwandĩki wa Thaburi ũrĩa weiguaga atariĩ ta “mondo ya rũũa ĩrĩa ĩtũire ndogo-inĩ.” (Thab. 119:83, 176) Thutha wa kũmũtaarĩria na njĩra nguhĩ ũhoro wa rĩandĩko rĩu, no ũgerie kũmũteithia one atĩ ti kuuga nĩ ‘ariganĩirũo’ nĩ maathani ma Ngai.

Ningĩ kũhũthĩra ngerekano ya ciringi ĩrĩa yorĩte kwahota gũteithia mwarĩ wa Ithe witũ ũratigĩte kũhunjia kana ũrahoereire kĩĩroho. (Luk. 15:8-10) Ciringi ĩyo yorĩte no kũhoteke yarĩ gĩcunjĩ kĩa mũgathĩ wathondeketwo na ciringi nyingĩ cia betha. Kwarĩrĩria nake ngerekano ĩyo, no kũmũteithie one atĩ nĩ wa bata mũno thĩinĩ wa kĩũngano gĩa Gĩkristiano. Thutha wa kwarĩrĩria nake ũhoro ũcio, no ũtĩtĩrithie ũrĩa Jehova amũrũmbũyagia arĩ ũmwe wa ngʼondu ciake.

Kaingĩ Akristiano nĩ makenaga magĩtaarĩria ũrĩa maiguaga igũrũ rĩgiĩ Bibilia. Nĩ ũndũ ũcio ndũgatuĩke atĩ nowe ũraaria! Thutha wa gũthoma mũhari mũna, no werekerie meciria make harĩ kiugo kana ciugo imwe thĩinĩ waguo na ũmũũrie mawoni make. Kwa ngerekano thutha wa gũthoma 2 Akorintho 4:16 mũthuri wa kĩũngano no orie ũũ: “Hihi wee mwene nĩ wĩyoneire njĩra iria Jehova ahũthagĩra gũkwerũhia?” Kĩũria ta kĩu no gĩtũme mũgĩe na mweke wa ‘kũũmaanĩrĩria.’—Rom. 1:12.

Ningĩ no wĩkĩre Mũkristiano ngoro na njĩra ya kwarĩrĩria mũndũ ũgwetetwo thĩinĩ wa Bibilia ũrĩa wacemanirie na ũndũ ta wake. No kũhoteke mũndũ ũthuthĩkĩte ngoro ekĩrũo ngoro nĩ ũhoro wa Hana kana Epafarodito arĩa hĩndĩ ĩmwe makuĩte ngoro, ĩndĩ magĩkorũo marĩ o a bata maitho-inĩ ma Ngai. (1 Sam. 1:9-11, 20; Afil. 2:25-30) Kũrĩ na cionereria ingĩ nyingĩ njega thĩinĩ wa Bibilia ũngĩhũthĩra.

THIĨ NA MBERE KUONANIA ŨRĨ NA BATA NA MŨHUNJIA

Thutha wa gũceerera mũhunjia thiĩ na mbere kuonania atĩ ũrĩ na bata nake. (Atũm. 15:36) Kwa ngerekano, mũico-inĩ wa ndeereti yanyu no ũbange nake rĩrĩa mũrĩhunjia hamwe. Mũthuri ũmwe wa kĩũngano wĩtagwo Bernard rĩrĩa acemania na mũrũ kana mwarĩ wa Ithe witũ aracereeire ica ikuhĩ, amũũragia na njĩra ya ũũgĩ ũũ: “Ta njĩra atĩrĩrĩ, nĩ ũrona ta ũtaaro ũrĩa ũragũteithirie?” Kũrũmbũiya aarĩ na ariũ a Ithe witũ na njĩra ta ĩyo no gũgũteithie kũmenya kana nĩ marabatara ũteithio makĩria.

Mahinda-inĩ maya gũkĩra hĩndĩ ĩngĩ o yothe, aarĩ na ariũ a Ithe witũ nĩ marabatara kuona atĩ nĩ ũramarũmbũiya, nĩ ũrataũkĩrũo nĩ maũndũ mao na nĩ ũmendete. (1 Thes. 5:11) Nĩ ũndũ ũcio, ũtanathiĩ gũceerera Mũkristiano, wĩcirie ũhoro wa maũndũ marĩa arahiũrania namo. Hoya Jehova igũrũ rĩa ũndũ ũcio. Thuura maandĩko marĩa maganĩrĩirũo na maũndũ make. Weka ũguo nĩ ũkuona ciugo iria ciagĩrĩire cia gwĩkĩra hinya “mũndũ ũrĩa mũnogu”!