Hihi nĩ Kũrĩ Ndini Tũngĩhoka?

No wone arĩ hinya mũno kwĩhoka ndini o yothe angĩkorũo nĩ kũrĩ ndini ĩtaagũkenirie. Ĩndĩ gĩa na ma atĩ nĩ kũrĩ ndini ĩmwe ũngĩhoka. Rĩrĩa Jesu aarĩ gũkũ thĩ, nĩ aacokanĩrĩirie arutwo ake ehokeku na akĩmaruta gũtũũra kũringana na ithimi cia Ngai. O na ũmũthĩ no kũrĩ arutwo a ma a Kristo, arĩa marũmagĩrĩra na kinyi morutani ma Gĩkristiano ũtũũro-inĩ wao. Ũngĩmona kũ?

Estelle ũrĩa ũgwetetwo gĩcunjĩ-inĩ gĩa kerĩ oigaga ũũ: “Thutha-inĩ nĩ ndeerutire Bibilia ndambĩrĩria gũthoma na Aira a Jehova. Ndioire ihinda inene gũtaũkĩrũo nĩ rĩandĩko rĩa Johana 8:32, rĩrĩa riugaga ũũ: ‘Nĩ mũkaamenya ũhoro ũrĩa wa ma, naguo ũhoro wa ma ũmũkũũre ũkombo-inĩ.’”

Nake Ray ũrĩa ũkũgwetetwo hau kabere, oigire ũũ: “Nĩ ũndũ wa kwĩruta Bibilia na Aira a Jehova, nĩ ndamenyire atĩ ti Ngai ũtũmaga andũ manyamarĩke. Ningĩ nĩ ndaakenire kuona atĩ o na gũtuĩka Ngai arĩ na gĩtũmi kĩega gĩa kũrekereria mĩnyamaro ũmũthĩ, nĩ oigĩte atĩ nĩ akaamĩniina kaimana.”

Hatarĩ nganja, nĩ ũndũ mũritũ mũno gwĩka ũrĩa kwagĩrĩire thĩinĩ wa thĩ ĩno ĩtathingataga mĩtugo mĩega. Ĩndĩ no kũhoteke. Andũ aingĩ nĩ meriragĩria gũteithio mataũkĩrũo nĩ Bibilia na kũrũmĩrĩra motaaro mayo. Nĩkĩo Aira a Jehova thĩinĩ wa thĩ yothe merutaga Bibilia na andũ milioni nyingĩ mĩciĩ-inĩ hatarĩ marĩhi. O kiumia andũ aingĩ nĩ merutaga ũrĩa Bibilia ĩrutanaga kũna. Ũndũ ũcio ũtũmaga makuhĩrĩrie Mũũmbi wao, na nĩ magĩaga na ũtũũro ũrĩ na gĩkeno.a

Hĩndĩ ĩngĩ wacemania na Aira a Jehova-rĩ, ta nĩ ũkaamoria kĩrĩa gĩtũmaga mehoke ndini yao. Thuthuria mĩthiĩre o hamwe na morutani mao. Ũcoke wone kana hihi nĩ kũrĩ ndini mũndũ angĩhoka.