Hihi No Wĩhoke Ndini Ũhoro-inĩ Wĩgiĩ Mĩtugo?
Sylvia ũrĩa ũrutaga wĩra ũkonainie na ũrigitani, oigaga ũũ: “Ndĩ korenji, twathomaga na andũ aingĩ moigaga nĩ a ndini. Ĩndĩ, nĩ maiyaga igeranio na makahũthĩra ndawa cia ũrĩu. Ndini ndĩamateithagia ũtũũro-inĩ wao.”
Mũndũ wĩtagwo Lionel oigire ũũ: “Andũ arĩa tũrutithanagia wĩra nao, nĩ moyaga rũtha makoiga atĩ nĩ arũaru o na matarĩ arũaru. Ndini itimateithagia, o ta mũndũ ũgũrĩte gĩtĩ kana metha atahũthagĩra.”
Ndini itihotete gũteithia andũ arĩa aingĩ gũkũria mĩtugo mĩega ũtũũro-inĩ wao. Andũ aingĩ mahinda-inĩ maya “metuaga ta meamũrĩire Ngai” no nĩ maregaga “hinya ũrĩa uumaga ũhoro-inĩ ũcio.” (2 Timotheo 3:5) Atongoria a ndini matimaigĩire kĩonereria kĩega, o na kana kũhe ngʼondu ciao ũtaaro wa Kĩĩmandĩko ũrĩa ũngĩmateithia gũkorũo na mĩtugo mĩega ũtũũro-inĩ. Nĩkĩo andũ aingĩ monaga ta Ngai atatindanagĩra na mĩtũũrĩre yao.
BIBILIA ĨRUTANAGA ATĨA?
Bibilia yonanagia atĩ Ngai nĩ akenagio kana akarakario nĩ mĩtugo itũ. Rĩrĩa Aisiraeli a tene maaremagĩra Ngai, ‘nĩ maamũiguithagia kĩeha.’ (Thaburi 78:40) O na kũrĩ ũguo, nĩ kũgĩaga na “gĩkeno Igũrũ” rĩrĩa mũndũ werira agarũrĩra mĩtugo yake mĩũru. (Luka 15:7) Mũndũ eruta ngumo njega cia Ithe witũ wa igũrũ, wendo wake harĩ Ngai nĩ ũingĩhaga, ũkamũtindĩka kwenda maũndũ marĩa Ngai endete na agathũra marĩa athũire.—Amosi 5:15.
Ĩ NAO AIRA A JEHOVA MEKAGA ATĨA?
Ngathĩti ĩmwe ya Amerika yoigire ũũ: “Aira a Jehova nĩ mateithagia andũ kwagagĩria famĩlĩ ciao, na gũtuĩka andũ mangĩteithia arĩa angĩ, na andũ mangĩĩhokeka.” Yongereire kuuga ũũ: “Aira a Jehova marũmagĩrĩra ithimi cia Ngai ciĩgiĩ mĩtugo. Metĩkĩtie atĩ kũnyua thigara, ũrĩu, kũhũthĩra ndawa cia ũrĩu, gũũtha kamarĩ, ngomanio itagĩrĩire, na cia andũ a mũthemba ũmwe nĩ maũndũ marakaragia Ngai.”
Atongoria a ndini hihi nĩ mateithĩtie andũ kũrũmĩrĩra ithimi cia Ngai ciĩgiĩ mĩtugo?
Aira a Jehova mateithĩkaga atĩa meruta ũhoro wĩgiĩ ngumo cia Ngai? Sylvia ũrĩa ũkũgwetetwo hau kabere oigaga, “Ungumania ũkoragwo ũrĩ mũingĩ mũno wĩra-inĩ wa ũrigitani. Na mũndũ no eke ungumania na ndoerũo ikinya. Ĩndĩ kũmenya mawoni ma Jehovaa megiĩ ungumania nĩ kũndeithagia gwĩka ũrĩa kwagĩrĩire. Nĩ ngĩte na gĩkeno na thayũ wa ngoro.” Sylvia nĩ akoragwo na ma atĩ gũtũũra kũringana na morutani ma ndini yake nĩ kũmũteithĩtie ũtũũro-inĩ.
a Jehova nĩrĩo rĩĩtwa rĩa Ngai ta ũrĩa rĩguũrĩtio thĩinĩ wa Bibilia.