Roho nĩ Ũrutaga Ũira Hamwe na Roho Witũ

1-3. Nĩ maũndũ marĩkũ maatũmire mũthenya wa Pentekoste ũkorũo ũrĩ wa mwanya, na maũndũ macio maahingirie atĩa ũndũ ũrĩa warathĩtwo? (Rora mbica kĩambĩrĩria-inĩ gĩa gĩcunjĩ gĩkĩ.)

KWARĨ Kiumia rũcinĩ itũũra-inĩ rĩa Jerusalemu na warĩ mũthenya wa mwanya mũno. Warĩ mũthenya wa gĩathĩ kĩa Pentekoste na ningĩ warĩ mũthenya wa thabatũ. Magongona marĩa maarutagwo rũcinĩ maakoretwo marĩkia kũrutwo thĩinĩ wa hekarũ. Andũ maacanjamũkĩte mũno metereire mũthĩnjĩri Ngai arute igongona rĩa gũthũngũthio rĩa mĩgate ĩĩrĩ mĩkĩre ndawa ya kũimbia ĩrugĩtwo na ngano ya mbere kũgethwo. (Alaw. 23:​15-20) Igongona rĩu nĩrĩo rĩoonanagia kĩambĩrĩria kĩa magetha ma ngano. Kwarĩ hĩndĩ ya Pentekoste ya mwaka wa 33.

² Maũndũ macio mothe magĩthiĩ na mbere thĩinĩ wa hekarũ, nĩ kwarĩ na ũndũ ũngĩ wa bata mũno warĩ hakuhĩ gwĩkĩka handũ hangĩ thĩinĩ wa nyũmba ya igũrũ itũũra-inĩ rĩu rĩa Jerusalemu. Nyũmba-inĩ ĩyo kwarĩ na Akristiano ta 120 maagomanĩte. Nĩ kũhoya “maahoyaga mategũtigithĩria.” (Atũm. 1:​13-15) Ũndũ ũrĩa warĩ hakuhĩ gwĩkĩka harĩ o nĩ wakonainie mũno na maũndũ marĩa mũthĩnjĩri-Ngai mũnene eekaga hingo ciothe hĩndĩ ya Pentekoste. Ningĩ nĩ wahingirie ũrathi ũrĩa warathĩtwo nĩ mũnabii Joeli kĩndũ mĩaka 800 mbere ya mũthenya ũcio. (Joel 2:​28-32; Atũm. 2:​16-21) Kaĩ arĩ ũndũ ũrĩkũ ũcio wa bata ũguo wahanĩkire mũthenya ũcio?

³ Thoma Atũmwo 2:​2-4. Gĩkundi kĩu kĩa Akristiano acio maagomanĩte nyũmba ya igũrũ nĩ maaitĩrĩirio roho mũtheru wa Ngai. (Atũm. 1:8) Makĩambĩrĩria kũratha kana kũhunjia ũhoro wa maũndũ ma magegania marĩa meeyoneire na makeiguĩra. Thutha wa kahinda kanini kĩrĩndĩ kĩnene nĩ kĩagomanire na mũtũmwo Petero akĩmatarĩria gĩtũmi kĩa ũndũ ũcio wekĩkĩte. Agĩcoka akĩmeera ũũ: “Mwĩrirei, na mũbatithio thĩinĩ wa rĩĩtwa rĩa Jesu Kristo nĩguo muoherũo mehia manyu, na nĩ mũkwamũkĩra kĩheo kĩa roho mũtheru.” Mũthenya ũcio andũ angĩ kĩndũ 3,000 nĩ meetĩkĩrire rĩĩtana rĩu, makĩbatithio, na makĩheo roho mũtheru.​—Atũm. 2:​37, 38, 41.

4. (a) Twagĩrĩirũo gũkenio nĩ maũndũ marĩa meekĩkire hĩndĩ ya Pentekoste nĩkĩ? (b) Nĩ ũndũ ũrĩkũ ũngĩ wa bata ũngĩkorũo wekĩkĩte mũthenya o ta ũcio mĩaka mĩingĩ mbere ĩyo? (Rora ũhoro mũico-inĩ wa gĩcunjĩ.)

⁴ Nĩkĩ Pentekoste ya mwaka wa 33 nĩ ya bata mũno harĩ ithuĩ? Nĩ ya bata mũno harĩ ithuĩ tondũ Jesu Kristo arĩ we Mũthĩnjĩri-Ngai Ũrĩa Mũnene nĩ aahingirie kĩrĩa kĩarũgamĩrĩirũo nĩ igongona rĩrĩa mũthĩnjĩri-Ngai mũnene aarutaga.^[1][7] Mũthenya ũcio mũthĩnjĩri-Ngai mũnene aarutagĩra Jehova mĩgate ĩĩrĩ. Mĩgate ĩyo ĩĩrĩ ĩrĩa yakoragwo na ndawa ya kũimbia yarũgamagĩrĩra arutwo a Jesu arĩa aitĩrĩrie maguta arĩa maarutirũo kuuma thĩinĩ wa andũ ehia nĩguo matuĩke ciana cia Ngai. Nĩ ũndũ ũcio njĩra ĩkĩhingũrũo nĩguo “maciaro mamwe ma mbere” kuuma thĩinĩ wa andũ magaathiĩ igũrũ makorũo thĩinĩ wa Ũthamaki ũrĩa ũkaarehera andũ arĩa athĩki irathimo nyingĩ. (Jak. 1:18; 1 Pet. 2:9) Maũndũ marĩa meekĩkire mũthenya ũcio nĩ mahutagia mũno ũtũũro witũ o na angĩkorũo kĩĩrĩgĩrĩro gitũ nĩ gĩa gũthiĩ igũrũ kana nĩ gĩa gũtũũra thĩinĩ wa paradiso gũkũ thĩ.

ŨRĨA AKRISTIANO MAITAGĨRĨRIO MAGUTA

5. Tũmenyaga atĩa atĩ arĩa maitagĩrĩrio maguta maitagĩrĩrio na njĩra itiganĩte?

⁵ Korũo warĩ ũmwe wa arutwo a Jesu arĩa moimĩrĩirũo nĩ nĩmĩ ciatariĩ ta nĩnĩmbĩ cia mwaki, ndũngĩkariganĩrũo nĩ mũthenya ũcio. Ndũngĩkoragwo na nganja o na hanini atĩ ũrĩ mũitĩrĩrie maguta kũgerera roho wa Ngai, na makĩria angĩkorũo nĩ wagĩire na ũhoti wa kwaria rũthiomi rũngĩ. (Atũm. 2:​6-12) No rĩu kĩũria nĩ gĩkĩ: Hihi arĩa othe maitagĩrĩrio maguta kũgerera roho mũtheru, maitagĩrĩrio na njĩra ya magegania o ta ĩrĩa yahũthĩrirũo harĩ andũ acio ta 120? Aca. Arĩa angĩ mookĩte Jerusalemu mũthenya ũcio maaitĩrĩirio maguta rĩrĩa maabatithagio. (Atũm. 2:38) Andũ acio matiagĩire na nĩmĩ ciatariĩ ta nĩnĩmbĩ cia mwaki igũrũ rĩa mĩtwe yao. Ũndũ ũngĩ nĩ atĩ ti Akristiano othe aitĩrĩrie maguta maitagĩrĩrio maguta rĩrĩa marabatithio. Kwa ngerekano Asamaria maaitĩrĩirio maguta kũgerera roho mũtheru ihinda rĩna thutha wa kũbatithio. (Atũm. 8:​14-17) Nao Korinelio na andũ a nyũmba yake maaitĩrĩirio maguta kũgerera roho mũtheru mbere ya kũbatithio.​—Atũm. 10:​44-48.

6. Nĩ kĩĩ Akristiano othe aitĩrĩrie maguta mamũkagĩra, na ũndũ ũcio ũmahutagia atĩa?

⁶ Ũrĩa kũrĩ nĩ atĩ Akristiano arĩa aitĩrĩrie maguta matiitagĩrĩrio maguta na njĩra ĩhaanaine. Amwe mamenyaga o na ihenya atĩ o nĩ aitĩrĩrie maguta na arĩa angĩ mathiaga makĩmenyaga ũhoro wa rĩĩtana rĩao o kahora. O na kũrĩ ũguo, gũtekũmakania ũrĩa maitagĩrĩrio maguta, o ũmwe wao nĩ akoragwo ekĩtwo ta ũrĩa mũtũmwo Paulo aataarĩirie. Oigire ũũ: “Rĩrĩa mwetĩkirie, nĩ mwekĩrirũo mũhũũri kũgerera we na roho mũtheru ũrĩa mwerĩirũo. Roho mũtheru nĩ kĩĩranĩro gĩa gũtũhe ũũma o mbere wa igai ritũ.” (Ef. 1:13, 14) Mũhũũri ũcio mekĩragwo kũgerera roho mũtheru ũkoragwo ũrĩ ũira wa atĩ o magaatũũra igũrũ no ti gũkũ thĩ. Nĩ ũndũ wa kĩĩranĩro kĩu mamũkagĩra, Akristiano aitĩrĩrie maguta matikoragwo na nganja o na hanini atĩ kĩĩrĩgĩrĩro kĩao nĩ gĩa gũthiĩ igũrũ.​—Thoma 2 Akorintho 1:​21, 22; 5:5.

7. Mũkristiano mũitĩrĩrie maguta ekũbatara gwĩka atĩa nĩguo agaathiĩ igũrũ?

⁷ Hihi Mũkristiano arĩkia gũitĩrĩrio maguta kũgerera roho mũtheru nĩ kuuga atĩ no mũhaka agaathiĩ igũrũ? Aca. Rĩu rĩkoragwo rĩrĩ rĩĩtana. Ĩndĩ angĩkorũo nĩ agaathiĩ igũrũ no mũhaka atũũre arĩ mwĩhokeku harĩ rĩĩtana rĩake. Petero aataarĩirie ũndũ ũcio ũũ: “Nĩ ũndũ ũcio ariũ a Ithe witũ-rĩ, mwĩrutanĩriei mũno nĩguo mũrũmie ũhoro wanyu wa gwĩtwo o na gũthuurũo, tondũ mũngĩthiĩ na mbere gwĩka maũndũ macio, gũtirĩ hĩndĩ mũgaatoorio. Na njĩra ĩyo nĩ mũkaagĩa na kĩrathimo kĩnene gĩa gũtonya thĩinĩ wa Ũthamaki wa tene na tene wa Mwathani na Mũhonokia witũ Jesu Kristo.” (2 Pet. 1:​10, 11) Nĩ ũndũ ũcio, nĩguo rĩĩtana rĩa gũthiĩ igũrũ rĩkorũo na ũguni harĩ Mũkristiano o wothe mũitĩrĩrie maguta, no mũhaka athiĩ na mbere gũikara arĩ mwĩhokeku.​—Ahib. 3:1; Kũg. 2:10.

MŨNDŨ AMENYAGA ATĨA?

8, 9. (a) Nĩkĩ nĩ ũndũ mũritũ andũ aingĩ gũtaũkĩrũo biũ nĩ ũrĩa gũthiaga mũndũ agĩitĩrĩrio maguta? (b) Mũndũ amenyaga atĩa atĩ arĩ na rĩĩtana rĩa gũthiĩ igũrũ?

⁸ Andũ aingĩ a Jehova ũmũthĩ no maage gũtaũkĩrũo biũ nĩ ũrĩa Akristiano maitagĩrĩrio maguta tondũ o matirĩ na rĩĩtana rĩu. Muoroto wa Ngai kĩambĩrĩria-inĩ warĩ andũ matũũre tene na tene gũkũ thĩ. (Kĩam. 1:28; Thab. 37:29) O na kũrĩ ũguo, Jehova nĩ athuurĩte andũ amwe mathiĩ igũrũ magatuĩke athamaki na athĩnjĩri-Ngai. Kwoguo hĩndĩ ĩrĩa amaitĩrĩria maguta kĩĩrĩgĩrĩro kĩao na mwĩcirĩrie wao nĩ icenjagia biũ makambĩrĩria kwĩrirĩria mũno gũthiĩ igũrũ.​—Thoma Aefeso 1:18.

⁹ Mũndũ amenyaga atĩa atĩ arĩ na rĩĩtana rĩa gũthiĩ igũrũ na atĩ kũna nĩ aitĩrĩirio roho mũtheru? Paulo nĩ acoketie kĩũria kĩu thĩinĩ wa marũa marĩa aandĩkĩire Akristiano aitĩrĩrie maguta thĩinĩ wa Roma, arĩa ‘meetĩtwo matuĩke aamũre.’ Aamerire ũũ: “Mũtiaamũkĩrire roho wa ũkombo wa gũtũma mwĩtigagĩre rĩngĩ, no mwamũkĩrire roho wa kũmũtua ariũ, roho o ũrĩa ũtũmaga twanĩrĩre tũkoiga: “Abba, Baba!” Roho guo mwene nĩ ũrutaga ũira hamwe na roho witũ atĩ tũrĩ ciana cia Ngai.” (Rom. 1:7; 8:​15, 16) Na njĩra nguhĩ nĩ kuuga atĩ kũgerera roho wake mũtheru, Ngai nĩ atigagĩrĩra Mũkristiano mũitĩrĩrie maguta nĩ amenya biũ atĩ arĩ na rĩĩtana rĩa gũgaatuĩka mũgai wa Ũthamaki wa Ngai.​—1 Thes. 2:12.

10. Rĩandĩko rĩa 1 Johana 2:27 rĩonanagia atĩa rĩkiuga atĩ Akristiano aitĩrĩrie maguta matirabatara mũndũ ũngĩ wa kũmaruta?

¹⁰ Arĩa maitagĩrĩrio maguta kũgerera roho mũtheru matibataraga ũira kuuma kĩhumo-inĩ kĩngĩ o gĩothe. Matibataraga mũndũ wa gwĩkĩra mũkonde atĩ nĩ maitĩrĩirio maguta. Jehova atigagĩrĩra biũ atĩ matirĩ na nganja o na hanini meciria-inĩ na ngoro-inĩ ciao. Mũtũmwo Johana eerire Akristiano acio aitĩrĩrie maguta ũũ: “Nĩ mũitĩrĩirio maguta nĩ ũrĩa mũtheru, na inyuothe mũrĩ na ũmenyo.” Agĩcoka akĩongerera ũũ: “Tondũ nĩ mũitĩrĩirio maguta kũgerera roho mũtheru na roho ũcio ũikaraga igũrũ rĩanyu-rĩ, mũtirabatara mũndũ o na ũrĩkũ amũrute; no Ngai nĩ ahũthagĩra roho ũcio kũmũruta maũndũ mothe, naguo nĩ wa ma na ndũheenanagia. O ta ũrĩa roho ũcio ũmũrutĩte, tũũrai mũrĩ na ũiguano hamwe nake.” (1 Joh. 2:20, 27) Akristiano acio othe nĩ mabataraga kũheo irio cia kĩĩroho o ta Akristiano arĩa angĩ, ĩndĩ matibataraga mũndũ wa gwĩkĩra mũkonde atĩ nĩ aitĩrĩrie maguta. Roho mũtheru, hinya ũrĩa mũnene mũno igũrũ na thĩ nĩguo ũtũmaga makorũo na ũũma ũcio.

“GŨCIARŨO RĨNGĨ”

11, 12. Nĩ kĩũria kĩrĩkũ Mũkristiano mũitĩrĩrie maguta angĩĩyũria, no nĩ ũndũ ũrĩkũ atakoragwo na nganja naguo?

¹¹ Rĩrĩa Mũkristiano aitĩrĩrio roho mũtheru nĩ agarũrũkaga mũno. Jesu eetire ũgarũrũku ũcio wa na thĩinĩ “gũciarũo rĩngĩ.”^[2] (Joh. 3:​3, 5) Aacokire akiuga ũũ: “Ndũkagege tondũ nĩ ndakwĩra atĩ no mũhaka mũciarũo rĩngĩ. Rũhuho rũhurutanaga na kũrĩa rũkwenda, na ũkaigua mũgambo waruo, no ndũmenyaga kũrĩa rũroima na kũrĩa rũrathiĩ. Ũguo no taguo gũtariĩ ũhoro-inĩ wa mũndũ wothe ũrĩa ũciarĩtwo kuumana na roho.” (Joh. 3:​7, 8) Ti ũndũ mũhũthũ harĩ Mũkristiano mũitĩrĩirie maguta gũtaarĩria biũ mũndũ ũtarĩ mũitĩrĩrie maguta ũhoro wa rĩĩtana rĩu.

¹² Akristiano amwe aitĩrĩrie maguta mahota kwĩyũria ũũ: ‘Nĩ kĩĩ kĩratũmire Jehova aathuure niĩ handũ ha gũthuura mũndũ ũngĩ?’ O na mahota kwĩigua ta matagĩrĩire. O na kũrĩ ũguo matiĩkagĩrĩra nganja o na hanini atĩ nĩ maitĩrĩirio maguta. Ngoro ciao ikoragwo ciyũirũo nĩ gĩkeno na ngatho. Maiguaga o ta ũrĩa Petero aaiguaga rĩrĩa aandĩkire ũũ: “Ngai arogoocwo, o we Ithe wa Mwathani witũ Jesu Kristo, nĩ gũkorũo kũringana na tha ciake nyingĩ nĩ aatũmire tũciarũo rĩngĩ nĩguo tũgĩe na kĩĩrĩgĩrĩro kĩrĩ muoyo kũgerera ũriũkio wa Jesu Kristo kuuma kũrĩ arĩa akuũ, agĩtũhe igai rĩtangĩbutha na rĩtarĩ na thahu na rĩtangĩthũka. Igai rĩu mũigĩirũo kũũrĩa igũrũ.” (1 Pet. 1:​3, 4) Akristiano aitĩrĩrie maguta mathoma ciugo icio nĩ mamenyaga wega atĩ nĩo Ithe wao wa igũrũ araria nao.

13. Mwĩcirĩrie wa Mũkristiano aitĩrĩrio maguta ũcenjagia atĩa, na nĩ kĩĩ gĩtũmaga ũcenjie?

¹³ Akristiano acio matanaitĩrĩrio maguta nĩ maakenagĩra mũno kĩĩrĩgĩrĩro gĩa gũgaatũũra gũkũ thĩ. Nĩ meeriragĩria mũno hĩndĩ ĩrĩa Jehova agaatheria thĩ ĩno, na nĩ meendaga mũno gũkaagaya irathimo icio cia ihinda rĩrĩa rĩroka. O na no kũhoteke nĩ maahũũraga mbica makĩnyita ũgeni endwa ao makĩriũkio. Nĩ meeriragĩria mũno gũgaatũũra thĩinĩ wa nyũmba iria magaaka na kũrĩa matunda ma mĩtĩ ĩrĩa makaahanda. (Isa. 65:​21-23) No nĩ kĩĩ gĩtũmaga mwĩcirĩrie wao ũcenjie? Hihi ũcenjagia nĩ ũndũ wa mĩtangĩko kana mũrimũ wa meciria? Hihi makinyaga handũ mageciria atĩ gũtũũra tene na tene thĩinĩ wa thĩ nĩ gũkaamanogia na gũtũme mage gĩkeno? Kana hihi nĩ kwenda tu mendaga kũmenya ũrĩa ũtũũro ũgaakorũo ũtariĩ kũũrĩa igũrũ? Aca. Ithenya rĩa ũguo, Ngai nĩwe ũmetaga. Atua itua rĩa kũmeeta, ahũthagĩra roho wake mũtheru gũcenjia mwĩcirĩrie wao na kĩĩrĩgĩrĩro kĩao.

14. Akristiano aitĩrĩrie maguta makoragwo na mawoni marĩkũ kwerekera ũtũũro wao thĩinĩ wa thĩ?

¹⁴ Hihi ũguo nĩ kuuga atĩ Akristiano acio nĩ meriragĩria gũkua? Paulo nĩ aataarĩirie ũrĩa maiguaga. Oigire ũũ: “Ũrĩa kũrĩ nĩ atĩ, ithuĩ arĩa tũkoragwo thĩinĩ wa hema ĩno nĩ tũcayaga na tũgatangĩka mũno, tondũ tũtiendaga kũmĩaũra, ĩndĩ no twendaga kwĩhumba ĩyo ĩngĩ, nĩguo kĩrĩa gĩkuaga kĩniinwo nĩ muoyo.” (2 Kor. 5:4) Kwoguo Akristiano acio matiĩriragĩria gũkua. Ithenya rĩa ũguo, makoragwo na wendi mũnene wa kũhũthĩra ũtũũro wao ũtungata-inĩ wa Jehova hamwe na arata na andũ a famĩlĩ. O na kũrĩ ũguo, gũtekũmakania wĩra ũrĩa mararuta, matiriganagĩrũo nĩ kĩĩrĩgĩrĩro kĩao kĩa ihinda rĩrĩa rĩroka.​—1 Kor. 15:53; 2 Pet. 1:4; 1 Joh. 3:2, 3; Kũg. 20:6.

HIHI WEE NĨ WĨTĨTWO?

15. Nĩ maũndũ marĩkũ matonanagia atĩ mũndũ nĩ mũitĩrĩrie maguta?

¹⁵ No kũhoteke nĩ wĩyũragia kana ũrĩ mũitĩrĩrie maguta. Angĩkorũo nĩ wonaga ta ũrĩ mũitĩrĩrie maguta nĩ wega gwĩcũrania ũhoro wa ciũria ici: Hihi nĩ ũkoragwo na kĩyo mũno ũtungata-inĩ? Nĩ ũthomaga Kiugo kĩa Ngai na kinyi na ũgathuthuria “maũndũ marĩa marikĩru ma Ngai”? (1 Kor. 2:10) Nĩ wonaga irathimo cia Jehova ũtungata-inĩ waku? Nĩ ũiguaga ũrĩ na wendi mũnene wa gũkenia Jehova? Nĩ ũiguaga atĩ nĩ itemi rĩaku gũteithia andũ arĩa angĩ maũndũ-inĩ ma kĩĩroho? Hihi kũrĩ na ũira wa kuonania atĩ Jehova nĩ agũteithĩtie ũtũũro-inĩ waku? Angĩkorũo macokio maku harĩ ciũria icio nĩ ĩĩ-rĩ, hihi ũguo nĩ kuonania atĩ ũrĩ na rĩĩtana rĩa gũthiĩ igũrũ? Aca. Nĩkĩ? Tondũ o na arĩa makoragwo na kĩĩrĩgĩrĩro gĩa gũgaatũũra gũkũ thĩ nĩ maiguaga ũguo. Roho wa Jehova ũrutaga wĩra na njĩra ĩmwe thĩinĩ wa ndungata ciake ciothe o na angĩkorũo irĩ na kĩĩrĩgĩrĩro kĩrĩkũ. Angĩkorũo nĩ ũkoragwo na nganja kana hihi ũrĩ mũitĩrĩrie maguta ũcio nĩ ũira wa atĩ ndũrĩ mũitĩrĩrie. Arĩa metĩtwo nĩ Jehova matikoragwo na nganja o na hanini kana nĩ maitĩrĩirio maguta kana matiitĩrĩirio. Nĩ moĩ wega.

16. Tũmenyaga atĩa atĩ ti arĩa othe matongoragio nĩ roho wa Ngai makoragwo na rĩĩtana rĩa gũthiĩ igũrũ?

¹⁶ Thĩinĩ wa Bibilia nĩ tuonaga cionereria nyingĩ cia andũ maarĩ na wĩtĩkio mũrũmu na maatongoragio nĩ roho mũtheru. O na kũrĩ ũguo, andũ acio matiarĩ na kĩĩrĩgĩrĩro gĩa gũthiĩ igũrũ. Ũmwe wao aarĩ Johana Mũbatithania. Jesu nĩ aamũgathĩrĩirie mũno ĩndĩ akiuga atĩ ndagaakorũo arĩ ũmwe wa arĩa makagaya Ũthamaki wa igũrũ. (Mat. 11:​10, 11) Daudi o nake nĩ aatongoragio nĩ roho mũtheru. (1 Sam. 16:13) Aarĩ mũndũ warikĩire mũno maũndũ-inĩ ma kĩĩroho na nĩ aatongoririo nĩ roho kwandĩka icunjĩ imwe cia Bibilia. (Mar. 12:36) O na kũrĩ ũguo, hĩndĩ ya Pentekoste, Petero oigire atĩ Daudi “ndaambatire igũrũ.” (Atũm. 2:34) Roho mũtheru nĩ warutaga wĩra biũ thĩinĩ wa andũ acio, ĩndĩ ndũigana kũmarutĩra ũira atĩ o nĩ amwe a arĩa magaathiĩ igũrũ. Ũguo ti kuuga atĩ matiarĩ ehokeku kana agĩrĩru a gũthiĩ igũrũ. Jehova nĩ akaamariũkia matũũre thĩinĩ wa paradiso gũkũ thĩ.​—Joh. 5:​28, 29; Atũm. 24:15.

17, 18. (a) Andũ aingĩ a Jehova makoragwo na kĩĩrĩgĩrĩro kĩrĩkũ? (b) Nĩ ciũria irĩkũ tũkaarĩrĩria gĩcunjĩ-inĩ kĩrĩa kĩrũmĩrĩire?

¹⁷ Andũ aingĩ a Jehova ũmũthĩ matikoragwo na kĩĩrĩgĩrĩro kĩu gĩa gũthiĩ igũrũ. Makoragwo na kĩĩrĩgĩrĩro o ta kĩrĩa Daudi, Johana Mũbatithania, na athuri na atumia angĩ ehokeku a tene maakoragwo nakĩo. O ta Iburahimu, meriragĩria mũno gũgaatũũra thĩinĩ wa thĩ marĩ raiya a Ũthamaki wa Ngai. (Ahib. 11:10) Matukũ-inĩ maya ma kũrigĩrĩria no Akristiano anini tu aitĩrĩrie maguta matigarĩte. (Kũg. 12:17) Ũguo nĩ kuuga atĩ arĩa aingĩ harĩ acio 144,000 nĩ marĩkĩtie gũkua na magathiĩ igũrũ.

¹⁸ Gũkĩrĩ ũguo-rĩ, arĩa marĩ na kĩĩrĩgĩrĩro gĩa gũgaatũũra gũkũ thĩ magĩrĩirũo gũkorũo na mawoni marĩkũ kwerekera arĩa moigaga atĩ marĩ na kĩĩrĩgĩrĩro gĩa gũthiĩ igũrũ? Mũkristiano thĩinĩ wa kĩũngano kĩanyu angĩambĩrĩria kũrĩa mũgate na kũnyua ndibei hĩndĩ ya Kĩririkano-rĩ, wagĩrĩirũo kuoya ũndũ ũcio atĩa? Hihi nĩ wagĩrĩirũo nĩ gũtangĩka andũ arĩa maroiga atĩ marĩ na kĩĩrĩgĩrĩro gĩa gũthiĩ igũrũ mangĩongerereka? Ciũria icio nĩ icoketio gĩcunjĩ-inĩ kĩrĩa kĩrũmĩrĩire.