Muonere Ũrĩa Wagĩrĩire Wĩgiĩ Mahĩtia

Don na Margareta nĩ maakenire maacererũo nĩ mũirĩtu wao hamwe na famĩlĩ yake. Famĩlĩ ĩyo ĩtanainũka, Margaret ũrĩa warĩ njorua ya kũruga no nĩ aaritaĩte, nĩ aarugĩire tũcũcũ twake irio iria twendete mũno, macaroni na cheese.b

Rĩrĩa andũ othe maaikarĩte thĩ, Margaret nĩ aarehire irio na agĩciigĩrĩra metha-inĩ. Aakunũra, nĩ aamakire kuona atĩ no thubu wa kĩrimũ warĩ mbakuri-inĩ ĩyo. Nĩ aariganĩirũo nĩ gwĩkĩra macaroni!

Ithuothe nĩ tũhĩtagia gũtekũmakania mĩaka ĩrĩa tũrĩ nayo kana ũmenyeru ũrĩa tũrĩ naguo. No kũhoteke twarie ciugo tũtecirĩtie, twĩke ũndũ ihinda-inĩ rĩrĩa rĩtagĩrĩire, o na kana hihi tũriganĩrũo nĩ ũndũ tũkũbangĩte gwĩka. Tũhĩtagia nĩkĩ? Tũngĩhota atĩa kũhiũrania na mahĩtia maitũ? No tũhote kũmethema? Gũkorũo na muonere ũrĩa wagĩrĩire kwerekera mahĩtia no gũtũteithie kuona macokio ma ciũria icio.

NGŨRANI YA MUONERE WITŨ NA WA NGAI KWEREKERA MAHĨTIA

Tũngĩka ũndũ wagĩrĩire, nĩ twĩtĩkagĩra kũgaathĩrĩrio rĩrĩa tuona kwagĩrĩire. O ũndũ ũmwe na ũcio-rĩ, na githĩ rĩrĩa tweka mahĩtia tũtiagĩrĩirũo gwĩtĩkĩra ũndũ ũcio o na angĩkorũo tũtikwendaga kana gũtirĩ mũndũ wamenya? Gwĩka ũguo kũbataraga wĩnyihia.

Tũngĩciria ũhoro witũ mũno, no tuone ta tũtanahĩtia, tũcokererie mũndũ ũngĩ mahĩtia, o na kana twage gwĩtĩkĩra atĩ nĩ tũhĩtĩtie. Kaingĩ gwĩka ũguo no gũkorũo na moimĩrĩro moru. Mahĩtia macio no mage kũrũngwo, na andũ angĩ no matuĩrũo ũrĩa gũtagĩrĩire. O na tũngĩka mahĩtia na tũhote gwĩthema moimĩrĩro, nĩ twagĩrĩirũo kũririkana atĩ marigĩrĩrio-inĩ “Ngai nĩwe ũgaatuĩra o ũmwe witũ kũringana na ciĩko ciake.”—Aroma 14:12.

Ngai onaga mahĩtia na njĩra ĩrĩa yagĩrĩire. Thĩinĩ wa ibuku rĩa Thaburi, Ngai erĩtwo nĩ wa “matha maingĩ na nĩ muuma-andũ mũno,” we “ndangĩikara o acirithanagia hĩndĩ ciothe, na ndangĩtũũra arakarĩte nginya tene na tene.” Nĩ oĩ tũtirĩ akinyanĩru na nĩ ataũkagĩrũo nĩ kũrĩa tũnyihĩirũo nĩ hinya, na ningĩ “nĩaririkanaga atĩ ithuĩ tũrĩ o rũkũngũ.”—Thaburi 103:8, 9, 14.

Makĩria ma ũguo, arĩ Ithe witũ ũrĩ tha, Ngai nĩ endaga ithuĩ tũrĩ ciana ciake tuonage mahĩtia ta ũrĩa amonaga. (Thaburi 130:3) Kiugo gĩake nĩ gĩtũheaga ũtaaro na ũtongoria mũingĩ wa gũtũteithia kũhiũrania na mahĩtia maitũ o hamwe na ma andũ angĩ.

ŨRĨA TŨNGĨHIŨRANIA NA MAHĨTIA

Kaingĩ mũndũ eka mahĩtia, nĩ ahũthagĩra mahinda na hinya mũingĩ akĩgeria gũcokereria arĩa angĩ mahĩtia kana gwĩtetera atĩ ti we woigire kana agĩka ũndũ mũna. Handũ ha ũguo-rĩ, ũngiuga ũndũ wa gũtuuria mũndũ ũngĩ-rĩ, githĩ ti wega ũcũnge mũhera, ũrũnge ũndũ ũcio, na mũtũũrie ũrata? Hihi harĩ ũndũ mũru wĩkĩte ũgethũkĩria maũndũ, kana ũgathũkĩria mũndũ ũngĩ? Handũ ha kwĩrakarĩra kana ũcokererie andũ angĩ mahĩtia, githĩ ti wega wĩrutanĩrie gũthondeka maũndũ? Ũngĩtinda ũkiuga atĩ mahĩtia ti maku, ũndũ ũcio no ũtũme muoe ihinda mũngĩkaiguithania na maũndũ mathũke makĩria. Handũ ha ũguo, wĩrute, ũrũnge maũndũ, na ũthiĩ na mbere na ũtũũro.

O na kũrĩ ũguo, rĩrĩa mũndũ ũngĩ eka mahĩtia, nĩ ũhũthũ kũrakara na njĩra ĩronania tũtinakenio nĩ ũndũ ũcio. Nĩ wega kũrũmĩrĩra ũtaaro ũyũ wa Jesu Kristo: “Maũndũ mothe marĩa mũngĩenda andũ arĩa angĩ mamwĩkage, no mũhaka o na inyuĩ mũmekage o tamo.” (Mathayo 7:12) Ũngĩka mahĩtia o na matarĩ manene, hatarĩ nganja ũngĩenda andũ arĩa angĩ makuonie tha o na kana mage gũtindanĩra. Nĩ ũndũ ũcio-rĩ, nĩ kĩĩ gĩkũgiria wĩrutanĩrie kuonagia andũ arĩa angĩ tha o ta icio?—Aefeso 4:32.

MOTAARO MANGĨTŨTEITHIA KWAGA KŨHĨTAGIA KAINGI

Kũringana na ibuku rĩmwe rĩa gũtaarĩria ciugo, mahĩtia moimĩraga nĩ ũndũ wa “gũtuĩra mũndũ ũrĩa gũtagĩrĩire, kwaga kũmenya maũndũ mothe, kana kwaga gũthikĩrĩria.” Nĩ wega gwĩtĩkĩra atĩ rĩmwe na rĩmwe ithuothe nĩ tuonanagia ũndũ ũmwe harĩ macio kana o na makĩria. O na kũrĩ ũguo, no twage kũhĩtagia kaingĩ tũngĩciria motaaro mamwe marĩ thĩinĩ wa Maandĩko.

Ũtaaro ũmwe ũrĩ thĩinĩ wa Thimo 18:13, ĩrĩa yugaga: “Mũndũ gũcokia ũhoro atanaigua nĩ ũrimũ, na nĩ ũndũ wa gũtũma one thoni.” Ũngĩoya mahinda gũthikĩrĩria ũhoro wothe na wĩcirie ũrĩa ũgũcokia, ũndũ ũcio no ũgũteithie kwaga kũhiũha kwaria kana gwĩka ũndũ ũtagĩrĩire. Ũmenyo ũrĩa ũngĩgĩa naguo nĩ ũndũ wa gũthikĩrĩria wega no ũgũteithie mũno kwaga gũtuĩra mũndũ ũrĩa gũtagĩrĩire, na njĩra ĩyo ũhote gwĩthema mahĩtia.

Ũtaaro ũngĩ wa Bibilia uugaga: “Ĩkagai o ũrĩa wothe mũngĩhota mũkoragwo na thayũ hamwe na andũ othe.” (Aroma 12:18) Ĩka ũrĩa wothe ũngĩhota nĩguo ũthingate thayũ na ũrũmwe. Ũkĩruta wĩra na andũ angĩ, wĩcirie ũhoro wao, ũmahe gĩtĩo, na wĩrutanĩrie kũmagaathĩrĩria na kũmekĩra ngoro. Hĩndĩ ta ĩyo, nĩ ũhũthũ mũndũ arekanĩre kana age gũtindanĩra na ciugo kana ciĩko itagĩrĩire, na mahĩtia manene no mahote gwetherũo kĩhonia kana maniinwo.

Roraga ũrĩa ũngĩĩruta ũndũ mwega kuumana na mahĩtia marĩa wĩkĩte. Handũ ha gwĩtetera nĩ ũndũ wa ũndũ uugĩte kana ũgeka, ona ũcio ũrĩ mweke wa gũgũteithia ũkũrie ngumo iria ciagĩrĩire. Hihi no kũhoteke ũrabatara gũkũria ũkirĩrĩria, ũtugi, kana kwĩgirĩrĩria? Ĩ naguo ũhooreri, wendo, na thayũ? (Agalatia 5:22, 23) No wĩrute ũrĩa ũngĩka ũndũ ta ũcio ũngiumĩra rĩngĩ. O na gũtuĩka no mũhaka wone moimĩrĩro ma ũrĩa wĩkĩte ndũgatindanĩre mũno na ũrĩa ũraigua kana moimĩrĩro marĩa wonete. Gũkorũo ũrĩ mũkenu no gũtũme ũnyihanyihie mĩtangĩko.

NO TŨGUNĨKE TŨNGĨKORŨO NA MUONERE ŨRĨA WAGĨRĨIRE

Gũkorũo na muonere ũrĩa wagĩrĩire kwerekera mahĩtia no gũtũteithie gwĩka ũrĩa kwagĩrĩire tũngĩhĩtia. No tũkorũo na thayũ mũingĩ ithuene o hamwe na andũ arĩa angĩ. Tũngĩĩrutaga kuumana na mahĩtia maitũ, no tũgĩe na ũũgĩ na andũ arĩa angĩ no magucagĩrĩrio nĩ ithuĩ. Tũtirĩkuaga ngoro mũno kana tũgeciria maũndũ moru kwĩyerekera. Kũmenya atĩ o na andũ arĩa angĩ nĩ marahiũrania na mahĩtia mao nĩ kũrĩtũmaga ũrata witũ nao wagagĩre. Makĩria ma ũguo, no tũgunĩke tũngĩruta kwĩgerekanagia na wendo wa Ngai na ũrĩa ohanagĩra eyendeire.—Akolosai 3:13.

Hihi mahĩtia ma Margaret ũrĩa ũkũgwetetwo kĩambĩrĩria-inĩ gĩa gĩcunjĩ gĩkĩ nĩ maathũkirie mahinda mao mega na famĩlĩ yake? Aca. Andũ othe, na makĩria Margaret, mooire ũndũ ũcio ũrĩ wa mathekania na magĩkenera kũrĩa irio icio itarĩ na macaroni. Mĩaka mĩingĩ thutha ũcio, ciana cia ciana ciake nĩ cierire ciana cia cio ũndũ ũcio ũtakaariganĩra na ikĩririkana maũndũ mega marĩa meekĩkaga marĩ na guka na cũcũ wao. Ningĩ-rĩ, macio maarĩ o mahĩtia.