Hihi Nĩ Ũraririkana?

Hihi nĩ ũthomete na kinyi icunjĩ cia ica ikuhĩ cia Mũrangĩri? ta rora kana no ũhote gũcokia ciũria ici:

Ariũ a Ithe witũ ta arori a mũthiũrũrũko na athuri a ciũngano magĩrĩirũo gũkorũo na mwerekera ũrĩkũ rĩrĩa ithondeka rĩa Jehova rĩaheana ũtongoria?

Magĩrĩirũo gwathĩka o na ihenya. No meyũrie ũũ: ‘Hihi nĩ njĩkagĩra ngoro aarĩ na ariũ a Ithe witũ maikare marĩ ehokeku harĩ Jehova? Nĩ njĩtĩkagĩra na ihenya na nganyita mbaru ũtongoria ũrĩa ũheanagwo nĩ ariũ a Ithe witũ arĩa matongoragia?’—w16.11, kar. 11.

Nĩ rĩ Akristiano a ma maathire ithamĩrio thĩinĩ wa Babuloni?

Ũndũ ũcio wekĩkire kahinda kanini thutha wa atũmwo gũkua. Ihinda-inĩ rĩu nĩrĩo andũ amwe maambĩrĩirie gwĩtua anene. Kanitha na Thirikari ciagathagĩrĩria ũregenyũki, na nĩ ũndũ ũcio Akristiano ehokeku, arĩa magerekanagio na ngano, matiathikagĩrĩrio. No mĩaka ĩigana ũna mbere ya 1914, Akristiano aitĩrĩrie maguta nĩ maambĩrĩirie kuuma kũrĩ Babuloni Ũrĩa Mũnene.—w16.11, kar. 23-25.

Wĩra wa Lefèvre d’Étaples warĩ wa bata nĩkĩ?

Mĩaka-inĩ ya 1520, Lefèvre aataũrire Bibilia na rũthiomi rwa Kĩfaranja nĩguo ĩkinyĩre andũ arĩa mataarĩ na gĩthomo kĩingĩ. Njĩra ĩrĩa aataaragĩria nayo icunjĩ cia Bibilia nĩ yahutirie Martin Luther, William Tyndale, na John Calvin.—wp16.6, kar. 10-12.

Ngũrani ya “gwĩciragia maũndũ ma mwĩrĩ” na “gwĩciragia maũndũ ma roho” nĩ ĩrĩkũ? (Rom. 8:6)

Ũrĩa wĩciragia maũndũ ma mwĩrĩ aigaga meciria make harĩ merirĩria ma mwĩrĩ, agaikaraga akĩaragia o ũhoro wa maũndũ ma kĩĩmwĩrĩ na akamekĩrĩra. Ũrĩa wĩciragia maũndũ ma roho ekagĩrĩra maũndũ megiĩ Ngai na wendi wa Ngai ũtũũro-inĩ, na Mũkristiano ta ũcio atongoragio nĩ roho mũtheru. Gwĩciria maũndũ ma mwĩrĩ kũrehaga gĩkuũ na gwĩciria maũndũ ma roho kũrehaga muoyo na thayũ.—w16.12, kar. 15-17.

Njĩra imwe cia kũnyihanyihia mĩtangĩko nĩ irĩkũ?

Iga maũndũ marĩa ma bata mbere, menya maũndũ marĩa ũngĩhota kũhingia, o mũthenya etha ihinda rĩa kũhurũka, kenagĩra kwĩrorera ũũmbi wa Jehova, koragwo ũrĩ mũndũ mũkeni na mũcanjamũku, menyeragia mwĩrĩ waku kaingĩ, na ũkomage toro wa kũigana.—w16.12, kar. 22-23.

Nĩ na njĩra ĩrĩkũ Enoku “eeheririo nĩguo ndagacemanie na mĩnyamaro ya gĩkuũ”? (Ahib. 11:5)

Kwahoteka Ngai aarekire Enoku akue o kahoora ũndũ atangĩamenyire atĩ nĩ gũkua arakua.—wp17.1, kar. 12-13.

Kwaga kwĩĩkĩrĩra nĩ ũndũ wa bata nĩkĩ?

Kwaga kwĩĩkĩrĩra kũhutanĩtie na kwĩyona na njĩra ĩrĩa yagĩrĩire na kũmenya nĩ harĩ maũndũ tũtangĩhota kana tũtetĩkĩrĩtio gwĩka. Twagĩrĩirũo kũmenya ũrĩa mĩthiĩre itũ ĩngĩhutia arĩa angĩ na tũtikeyone tũrĩ a bata mũno gũkĩra arĩa angĩ.—w17.01, kar. 18.

Nĩ ũira ũrĩkũ wonanagia atĩ Ngai nĩ aatongoragia kĩama kĩrĩa gĩatongoragia karine ya mbere, o ta ũrĩa atongoragia arĩa a Kĩama Kĩrĩa Gĩtongoragia ũmũthĩ?

Maataũkĩirũo nĩ ma cia Bibilia magĩteithĩrĩrio nĩ roho mũtheru. Nĩ maarũgamagĩrĩra wĩra wa kũhunjia magĩteithĩrĩrio nĩ araika, na meehokaga Kiugo kĩa Ngai makĩheana ũtongoria. Na noguo kũrĩ o na ũmũthĩ.—w17.02, kar. 26-28.

Nĩ kĩĩ gĩtũmaga tuone ũkũũri ũrĩ wa bata mũno?

Maũndũ mana marĩa matũmaga ũkorũo ũrĩ wa bata mũno nĩ: Ũrĩa waũheanire, gĩtũmi kĩa aheane, kĩrĩa eimire, na bata ũrĩa wahingirio nĩ ũkũũri. Nĩ twagĩrĩirũo nĩ gwĩcũrania maũndũ macio.—wp17.2, kar. 4-5.

Hihi Mũkristiano no acenjie itua atuĩte?

Twagĩrĩirũo nĩ kũhingia ũndũ ũrĩa tũtuĩte. No rĩmwe mũndũ nĩ abataraga gwĩciria rĩngĩ igũrũ rĩgiĩ itua rĩna. Thutha wa andũ a Nineve kwĩrira, Ngai nĩ aacenjirie itua rĩrĩa aatuĩte igũrũ rĩao. Rĩmwe, gũcenjia kwa maũndũ kana kũmenya ũhoro ũngĩ makĩria no gũtũme o na ithuĩ tũbatare gũcenjia itua.—w17.03, kar. 16-17.

Nĩkĩ gũtheremia mũhuhu mũũru nĩ ũgwati?

No gũtũme thĩna ũnenehe makĩria. O na tũngĩkorũo twĩkĩtwo kana tũtekĩtwo ũndũ mũũru, kwaria ũũru gũtirĩ hĩndĩ kũngĩagĩria maũndũ.—w17.04, kar. 21.