Banga Kwandandũra Ũtungata Waku Rĩu
1. Ihinda rĩa Kĩririkano rĩtũheaga mweke ũrĩkũ wa mwanya, na tũngĩĩharĩria atĩa nĩ ũndũ wa rĩo?
1 Hingo ciothe hĩndĩ ya Kĩririkano nĩ tũgĩaga na mĩeke ya ‘gũcokeria Jehova ngatho mũno mũno.’ (Thab. 109:30) Hihi wee nĩ ũkwandandũra ũtungata waku mweri-inĩ wa Machi arĩ njĩra ĩmwe ya kuonania ngatho harĩ Mũheani wa ũkũũri? Rĩrĩ nĩrĩo ihinda rĩa kwambĩrĩria mĩbango.—Thim. 21:5.
2. Wee hamwe na arĩa angĩ mwaiyũkirie atĩa mũbango wa kũnyihanyihĩrio mathaa ma painia wa gũteithĩrĩria Ĩpuro mwaka mũthiru?
2 Ũpainia wa Gũteithĩrĩria: Mwaka mũthiru ahunjia nĩ maacanjamũkire mũno rĩrĩa maamenyithirio ũhoro wa kũnyihanyihĩrio mathaa ma painia wa gũteithĩrĩria mweri-inĩ wa Ĩpuro. Mũrũ wa Ithe witũ ũmwe aandĩkire ũũ: “Ngoragwo cukuru ya thekondarĩ, na nyonaga ta itangĩhota gũtuĩka painia wa hĩndĩ ciothe. Rĩu ngũiyũria ũpainia wa gũteithĩrĩria mathaa 30, njoke ndĩrutanĩrie kũhingia mathaa 50 mweri wa Ĩpuro.” Mwarĩ wa Ithe witũ ũmwe ũrutaga wĩra hĩndĩ ciothe aandĩkire ũũ: “Mathaa mĩrongo ĩtatũ—macio nĩ ũndũ mũhũthũ gũkinyia!” Hĩndĩ ĩrĩa mũbango ũcio wamenyithanirio, mwarĩ wa Ithe witũ watungatagĩra tene arĩ painia, ũrĩa rĩu ũrĩ na mĩaka 80 na kĩndũ oigire ũũ: “Rĩrĩ nĩrĩo ihinda rĩrĩa ndĩretereire! Jehova nĩ amenyaga atĩ ũpainia nĩguo ũndũ ũrĩa ndaakenagĩra mũno ũtũũro-inĩ wakwa!” Arĩa matangĩahotire gũtuĩka mapainia a gũteithĩrĩria nĩ meeigĩire muoroto wa kuongerera ũtungata wao.
3. Tũrĩ na itũmi irĩkũ cia gũtungatĩra tũrĩ mapainia a gũteithĩrĩria mweri-inĩ wa Machi, Ĩpuro, na Mĩĩ?
3 Machi ũgũkorũo ũrĩ mweri mwega mũno wa gũtuĩka painia wa gũteithĩrĩria tondũ o rĩngĩ tũrĩ na mweke wa gũtungatĩra mathaa 30 kana 50. Makĩria ma ũguo, kwambĩrĩria Njuuma ya Machi 17, nĩ tũgaakorũo na wĩra wa mwanya wa kũnyita andũ ũgeni magoka Kĩririkano-inĩ Ĩpuro 5. Aingĩ nĩ magaakenera mũno gũkorũo na itemi inene thĩinĩ wa ũtungata ũũ atĩ, nĩ makenda gũtungatĩra rĩngĩ marĩ mapainia a gũteithĩrĩria Ĩpuro na Mĩĩ, makĩhũthĩra mathaa 50.
4. Tũngĩandandũra ũtungata witũ atĩa, na moimĩrĩro nĩ marĩkũ?
4 Hĩndĩ ya hwaĩ-inĩ wa Ũthathaiya wanyu wa Famĩlĩ ũrĩa ũrũmĩrĩire-rĩ, githĩ ti wega mũkaarĩrĩria ũrĩa o mũndũ thĩinĩ wa famĩlĩ angĩandandũra ũtungata wake ihinda-inĩ rĩa Kĩririkano? (Thim. 15:22) Hoya Jehova arathime kĩyo gĩaku. (1 Joh. 3:22) Kwandandũra itemi rĩaku thĩinĩ wa ũtungata gũgaagũteithia ũgoocithie Jehova na njĩra nene na ningĩ gĩkeno gĩaku nĩ gĩkoongerereka.—2 Kor. 9:6.