Hũthĩra Trakti Kũhunjia Ũhoro Ũrĩa Mwega
1. Trakti ikoretwo ikĩhũthĩrũo atĩa nĩ andũ a Ngai?
1 Trakti cia Bibilia nĩ ikoretwo ikĩhũthĩrwo kwa ihinda iraihu nĩ andũ a Jehova kũhunjia ũhoro ũrĩa mwega. Mwaka wa 1880, C. T. Russell na arĩa maanyitanagĩra nake nĩ maambĩrĩirie kũruta trakti cietagwo Bible Students’ Tracts, na ciaheanagwo kũrĩ athomi a Watch Tower nĩguo maciheane kũrĩ andũ angĩ. Trakti cionagwo irĩ cia bata mũno ũũ atĩ mwaka wa 1884 rĩrĩa C. T. Russell aandĩkithirie rũhonge rwĩtĩkĩrĩku kĩĩwatho rũtarĩ rwa kĩbiacara nĩ ũndũ wa gũtwarithia mbere wĩra wa Ũthamaki, kiugo “trakti” nĩ gĩekĩrirũo rĩĩtwa-inĩ rĩa rũhonge rũu, Zion’s Watch Tower Tract Society, rũrĩa rĩu rwĩtagwo Watch Tower Bible and Tract Society of Pennsylvania. Gũkinyĩria mwaka wa 1918, Arutwo a Bibilia nĩ maaheanĩte trakti makĩria ma milioni 300. O na rĩu trakti no ikoragwo na moimĩrĩro mega wĩra-inĩ wa kũhunjia.
2. Nĩ kĩĩ gĩtũmaga trakti ikorũo na moimĩrĩro mega?
2 Kĩrĩa Gĩtũmaga Ikorũo na Moimĩrĩro Mega: Trakti ikoragwo irĩ thaka na nĩ igucagĩrĩria maitho. Ũhoro mũkuhĩ ũrĩa ikoragwo naguo nĩ ũgucagĩrĩria na ũkaruta andũ maũndũ maingĩ. Nĩ ikenagĩrũo nĩ andũ arĩa mangĩĩtigĩra gũthoma ngathĩti kana ibuku. Nĩ ũhũthũ kũheana trakti, nginya harĩ ahunjia erũ na ciana. Hamwe na ũguo, trakti nĩ nini na mĩkuĩre yacio nĩ mĩhũthũ.
3. Taarĩria ũndũ waneyonera wee mwene kana mwandĩke ũronania bata wa trakti.
3 Andũ aingĩ monaga ũhoro wa ma rita rĩa mbere kũgerera trakti. Kwa ngerekano, mũtumia ũmwe bũrũri-inĩ wa Haiti nĩ onire ĩmwe ya trakti citũ barabara-inĩ. Akĩmĩoya, akĩmĩthoma, agĩcoka akĩanĩrĩra, “Nĩ ndona ũhoro wa ma!” Macũngĩrĩro-inĩ, agĩthiĩ Nyũmba-inĩ ya Ũthamaki, akĩambĩrĩria kwĩruta Bibilia, na akĩbatithio—no ũndũ wa hinya wa Kiugo kĩa Ngai ũrĩa warĩ thĩinĩ wa trakti.
4. Muoroto witũ ũrĩkoragwo ũrĩ ũrĩkũ rĩrĩa arĩ trakti tũraheana mweri mũna?
4 Nyũmba kwa Nyũmba: Tondũ trakti nĩ ikoragwo na moimĩrĩro mega wĩra-inĩ wa kũhunjia, nĩcio irĩheanagwo mĩeri ĩmwe na ĩmwe, kwambĩrĩria Novemba. Muoroto witũ ndũrĩkoragwo ũrĩ o kũheana trakti ĩndĩ nĩ gũcihũthĩra kwambĩrĩria ndeereti. Mũndũ angĩonania nĩ arakenio nĩ ũhoro rita rĩa mbere twamũceerera kana twamũcokera, no tũmuonie ũrĩa angĩĩruta Bibilia tũkĩhũthĩra ibuku rĩa Bibilia Ĩrutanaga kana ibuku rĩngĩ rĩhũthagĩrũo kũrutana. Tũngĩheana trakti atĩa tũkĩhunjia nyũmba kwa nyũmba? Gũtirĩ trakti ĩhaanaine na ĩngĩ, kwoguo nĩ tũbatiĩ gũkorũo tũthomete iria tũraheana.
5. Nĩ njĩra irĩkũ tũngĩhũthĩra kũheana trakti tũkĩhunjia nyũmba kwa nyũmba?
5 Ciugo citũ ciagĩrĩirũo kũringana na gĩcigo kĩrĩa tũrahunjia na trakti iria tũrahũthĩra. No twambĩrĩrie ndeereti na njĩra ya kũnengera mwene nyũmba trakti. Ngothi yayo thaka nĩ ũhũthũ yarahũre wendi wake. Ningĩ no tuonie mwene nyũmba trakti cigana ũna tũcoke tũreke athuure ĩrĩa ĩkũmũkenia. Rĩrĩa tũrahunjia gĩcigo andũ matendaga kũhingũra mĩrango, no tũnyite trakti ũndũ mwene nyũmba ekuona ngothi yayo, kana tũmũũrie kana no tũmũikĩrie kabuku mũrango-inĩ karĩa tũngĩenda kũigua mawoni make igũrũ rĩako. Angĩkorũo kĩongo kĩa trakti ĩyo nĩ kĩũria, no tũmũũrie ataarĩrie mawoni make megiĩ kĩũria kĩu. O na no tũhũthĩre kĩũria gitũ ene kĩrĩa kĩngĩarahũra wendi na gĩteithĩrĩrie kwambĩrĩria ndeereti. No tũcoke tũthome gĩcunjĩ kĩmwe gĩa trakti ĩyo hamwe na mwene nyũmba, tũgĩtithagia harĩa twakora ciũria na tũkamũũria agwete mawoni make. Maandĩko ma mũthingi no mathomwo kuuma Bibilia-inĩ. Thutha wa gũthoma ũhoro mũnini thĩinĩ wa trakti ĩyo, no tũtirihe ndeereti na tũbange ihinda rĩna rĩrĩa tũgaacoka. Angĩkorũo kĩũngano kĩanyu nĩ gĩtigaga mabuku mĩciĩ ĩrĩa mwaga andũ, no mũtige trakti handũ itaronwo nĩ andũ angĩ angĩkorũo mwene nyũmba ndarĩ kuo.
6. Trakti ingĩhũthĩrũo atĩa tũkĩhunjia barabara-inĩ?
6 Mahunjio ma Barabara-inĩ: Hihi nĩ ũrĩ wahũthĩra trakti ũkĩhunjia barabara-inĩ? Ehĩtũkĩri amwe makoragwo na ihenya na matingĩenda kũrũgama nĩguo maarie na ithuĩ. No ũkorũo ũrĩ ũndũ mũritũ kũmenya ũrĩa wendi wao ũigana. Handũ ha kũmahe ngathĩti cia ica ikuhĩ tũtekũmenya kana nĩ megũthiĩ gũcithoma-rĩ, githĩ ti kaba tũmahe trakti? Tondũ ngothi ya trakti nĩ ĩgucagĩrĩria na ndũmĩrĩri yayo nĩ nguhĩ, andũ no mamĩthome makĩenda kũmenya makĩria rĩrĩa mona kahinda. Ĩndĩ mangĩkorũo matarĩ na ihenya, no twarĩrĩrie ũhoro mũnini kuuma trakti-inĩ ĩrĩa twamanengera.
7. Taarĩria maũndũ monetwo maronania ũrĩa mũndũ angĩhũthĩra trakti akĩhunjia rĩrĩa mweke weyumĩria.
7 Kũhunjia Rĩrĩa Mweke Weyumĩria: Nĩ ũndũ mũhũthũ kũhũthĩra trakti kũhunjia rĩrĩa mweke weyumĩria. Mũrũ wa Ithe witũ ũmwe aikagia cigana ũna mũhuko rĩrĩa rĩothe aroimagara. Rĩrĩa acemania na mũndũ, ta mwendia wa nduka, amũũragia kana no amũhe kĩndũ angĩthoma agacoka akamũnengera trakti. Rĩrĩa mũthuri ũmwe na mũtumia wake maathire Taũni ya New York kwĩrorangĩra, nĩ maamenyaga atĩ nĩ mangĩacemanirie na andũ kuuma mabũrũri matiganĩte. Nĩ ũndũ ũcio magĩkuua kabuku karĩa getagwo Nations na trakti cigana ũna cia thiomi ngũrani. Mangĩaiguire mũndũ ũraria rũthiomi rũgeni akĩendia indo tũcĩra-inĩ kana akorũo aikarĩte hakuhĩ nao kũndũ kũrĩa kũhurũkagĩrũo kana mũkawa-inĩ, makamũhe trakti ya rũthiomi rwake.
8. Trakti ihaanaine na mbeũ na njĩra ĩrĩkũ?
8 ‘Handa Mbeũ Ciaku’: Trakti no iringithanio na mbeũ. Mũrĩmi ahuraga mbeũ kwa ũingĩ tondũ ndakoragwo akĩmenya nĩ irĩkũ ikũmera. Kohelethu 11:6 yugaga ũũ: “Rũcinĩ roka kũhanda mbeũ ciaku, o na ningĩ hwaĩ-inĩ ndũkahurũkie guoko gwaku; nĩ gũkorũo ndũũĩ ĩrĩa ĩkaagĩra, hihi nĩ ĩo, kana nĩ ĩrĩa ĩngĩ, o na kana hihi o cierĩ nĩikaagĩra.” Nĩ ũndũ ũcio, rekei ‘tũhunjagie ũmenyi’ tũkĩhũthĩra ũteithio ũcio wa bata mũno wĩra-inĩ wa kũhunjia.—Thim. 15:7.
[Mbica karatathi ka 3]
Tondũ trakti nĩ ikoragwo na moimĩrĩro mega wĩra-inĩ wa kũhunjia, nĩcio irĩheanagwo mĩeri ĩmwe na ĩmwe, kwambĩrĩria Novemba.