Thiĩ na Mbere Kwagagĩria Mũrutanĩre Waku
1. Nĩ cionereria irĩkũ cia karine ya mbere cionanagia atĩ nĩ twagĩrĩirũo gũthiĩ na mbere kwagagĩria mũrutanĩre witũ?
1 Akristiano magĩrĩirũo nĩ gũthiĩ makĩagagĩragia mũrutanĩre wao marĩ ahunjia a ũhoro ũrĩa mwega. Nĩkĩo Jesu aathiaga na mbere kũmenyeria arũmĩrĩri ake wĩra-inĩ wa kũhunjia. (Luk. 9:1-5; 10:1-11) Na nokĩo Akula na Pirisila mooire Apolo magĩthiĩ nake kwao “makĩmũtaũrĩra ũhoro wa njĩra ya Ngai wega makĩria.” (Atũm. 18:24-26) Paulo eekĩrire Timotheo ngoro athiĩ na mbere gwĩcũrania ũhoro wa ũrutani wake nĩ getha ‘andũ othe mahote kuona ũrĩa aathiaga na mbere.’ Paulo eekire ũguo o na akĩmenyaga atĩ Timotheo aarĩ mũhunjia warĩ na ũmenyeru. (1 Tim. 4:13-15) O na angĩkorũo tũtungatĩire Jehova ihinda iraya atĩa, no tũrabatara gũthiĩ na mbere kwagagĩria njĩra citũ cia kũhunjia.
2. Ahunjia arĩa angĩ mangĩtũteithia atĩa?
2 Wĩrute Kuuma Kũrĩ Arĩa Angĩ: Ũndũ ũmwe ũngĩtũteithia kwagagĩria njĩra citũ cia kũhunjia nĩ kwĩruta kuuma kũrĩ arĩa angĩ. (Thim. 27:17) Nĩ ũndũ ũcio, thikagĩrĩria na kinyi rĩrĩa mũhunjia ũrĩa mũrĩ nake arahunjia. Hoyaga ũtaaro kũrĩ ahunjia arĩa marĩ ũmenyeru, na ũgathikĩrĩria wega ũrĩa megũkwĩra. (Thim. 1:5) Hihi nĩ wagaga ũmĩrĩru wa gũcokera andũ, wa kwambĩrĩria kwĩruta Bibilia nao, kana wa kũhũthĩra njĩra ingĩ cia kũhunjia? Aria na mũrori wa gĩkundi kĩanyu gĩa kũhunjia kana mũhunjia ũngĩ ũrĩ na ũmenyeru nĩguo agũteithie. Ningĩ nĩ wega kũririkana atĩ roho mũtheru wa Jehova no ũtũteithie kwagagĩria mũrutanĩre witũ, kwoguo nĩ wega gũthiĩ na mbere kũmũhoya atũhe roho ũcio.—Luk. 11:13.
3. Twagĩrĩirũo gwĩka atĩa tũngĩheo ũtaaro, na hihi tũtikũhoete ũtaaro ũcio?
3 Ũngĩrũo nĩ mũndũ atĩ harĩ handũ ũrabatara kũrutĩra wĩra, ndũkarakare o na angĩkorũo ndũkũmũhoete ũtaaro. (Koh. 7:9) O ta Apolo, ĩtĩkĩra ũtaaro ũcio ũrĩ na wĩnyihia na wonanie ngatho. Gwĩka ũguo nĩ kũrĩonanagia atĩ ũrĩ na ũũgĩ.—Thim. 12:15.
4. Jesu oigire gĩtũmi kĩrĩa kĩnene gĩa gũthiĩ na mbere kwagagĩria mũrutanĩre witũ nĩ kĩrĩkũ?
4 Kwagagĩria Mũrutanĩre Witũ nĩ Kũgoocithagia Ngai: Agĩkĩra arũmĩrĩri ake ngoro mathiĩ na mbere kwagagĩria mũrutanĩre wao marĩ ahunjia a ũhoro ũrĩa mwega Jesu nĩ aahũthĩrire ngerekano. Eeringithanirie na mũthabibũ, nao arũmĩrĩri ake aitĩrĩrie maguta akĩmaringithania na honge. Oigire atĩ Ithe atheragia rũhonge o ruothe rũrĩa rũciaraga matunda ‘nĩguo rũciare mũno.’ (Joh. 15:2) O ta ũrĩa mwene mũgũnda wa mĩthabibũ eriragĩria honge cia mĩthabibũ yake iciare mũno-rĩ, no taguo Jehova endaga tũthiĩ na mbere gũciara “maciaro moimĩte tũnua-inĩ” twitũ. (Ahib. 13:15) Moimĩrĩro nĩ marĩkũ twathiĩ na mbere kwagagĩria mũrutanĩre witũ tũrĩ ahunjia a ũhoro ũrĩa mwega? Jesu oigire ũũ: “Ũndũ ũngĩgoocithia Awa no atĩrĩ, no mũciarage maciaro maingĩ.”—Joh. 15:8.