Kwagagĩria Ũtungata Witũ—Teithĩrĩria Ũrĩa Mũrahunjia Nake

Ũndũ Ũcio nĩ wa Bata Nĩkĩ? Jesu nĩ aamenyaga bata wa andũ kũhunjia marĩ erĩ. Nĩkĩo rĩrĩa aatũmire arũtwo ake 70 makahunjie, aamatũmire marĩ erĩ erĩ. (Luk. 10:1) Andũ makĩhunjia marĩ erĩ, no mateithanie, na makĩria rĩrĩa ũmwe wao acemania na ũndũ mũritũ kana aariguo ũrĩa egũcokeria mwene nyũmba. (Koh. 4:9, 10) Mũhunjia ũmwe angĩremererũo, ũrĩa marĩ nake no amũteithĩrĩrie ũndũ-inĩ ũcio, o na rĩngĩ agwete kaũndũ kangĩmũteithia kũgaacĩrithia ũtungata wake. (Thim. 27:17) Ningĩ nĩ amwĩkĩraga ngoro kũgerera mĩario ĩrĩa makoragwo nayo hĩndĩ ĩrĩa marĩ ũtungata-inĩ.—Afil. 4:8.

Ũrĩa Tũngĩka:

Twarana nake Bibilia-inĩ yaku, rĩrĩa arathoma rĩandĩko. Ũngĩka ũguo, nĩ ũrĩkoragwo ũrĩ ũndũ mũhũthũ kũmũteithia rĩrĩa arabatara ũteithio.
Mũgĩtongoria wĩruti wa Bibilia, nĩ wega kũgweta kaũndũ kangĩteithia mũrutwo wa ũrĩa mũrahunjia nake. O na kũrĩ ũguo, rĩrĩa mũrahunjia nyũmba kwa nyũmba, ti wega gũtinia na mĩario ũrĩa mũrahunjia nake, hĩndĩ ĩrĩa araria na mwene nyũmba. No angĩriguo nĩ ũrĩa ekuuga, kana akorũo arĩ mũhunjia ũtarĩ na ũmenyeru, nĩ wega kũmũteithĩrĩria. Ti wega kũingĩrĩra kana kuoerera mĩario ya ũrĩa mũrahunjia nake o na kana kũgeria gũcenjia kĩongo kĩa mĩario hĩndĩ ĩrĩa mũrahunjia nyũmba kwa nyũmba, mũgĩcokera andũ kana mũgĩtongoria wĩruti wa Bibilia.
Ũngĩona kaũndũ kangĩteithia ũrĩa mũrahunjia nake agacĩrithie ũtungata wake, nĩ wega gũkagweta. (Thim. 3:27) Ũngĩona kwagĩrĩire, no ũmwĩre ũũ: “Hihi wona ndeereti ĩyo yathiĩ atĩa?” kana “No ngwĩre kaũndũ kangĩgũteithia?” kana “Niĩ ngeragia gwĩka ũũ . . . ” Nĩ wega kũririkana atĩ, tũngĩtuĩka akũrutaga ahunjia arĩa angĩ mahĩtia hĩndĩ ciothe, nĩ marĩkuaga ngoro, no rĩrĩa twamahe ũteithio rĩmwe na rĩmwe nĩ marĩtĩkĩraga.

Geria Gwĩka ũũ Mweri-inĩ Ũyũ: