Mabuku Marĩa Magwetetwo Thĩinĩ wa Kabuku ka Mũcemanio wa Ũtũũro na Ũtungata
© 2024 Watch Tower Bible and Tract Society of Pennsylvania
MĨĨ 6-12
MŨTHITHŨ KUUMA KIUGO-INĨ KĨA NGAI THABURI 36-37
“Ndũgatangĩke nĩ Ũndũ wa Andũ Arĩa Aganu”
“Gĩaga na Gĩkeno Kĩnene nĩ Ũndũ wa Jehova”
Hĩndĩ ĩyo, “andũ arĩa ahooreri nĩ makaagaya thĩ.” (Thaburi 37:11a) No andũ acio “ahooreri” nĩa? Kiugo kĩrĩa gĩtaũrĩtwo “ahooreri” kiumanĩte na kiugo kĩngĩ kiugĩte “kũnyarira, kũnyihia, gũconorithia.” Kwoguo “andũ arĩa ahooreri” nĩ arĩa metagĩrĩra Jehova marĩ na wĩnyihia arũnge maũndũ mothe matarĩ ma kĩhooto marĩa mekĩtwo. “Nĩ magaakena mũno nĩ ũndũ wa kũingĩhĩrũo nĩ thayũ.” (Thaburi 37:11b) O na ihinda-inĩ rĩrĩ, nĩ makoragwo na thayũ mũingĩ paradiso-inĩ ya kĩĩroho thĩinĩ wa kĩũngano kĩa andũ a Jehova.
Kũmaatha Maũndũ ma Bata Maandĩko-inĩ
it-2 445
Kĩrĩma
Kũrũma, gũtũũra, kana gũtũũgĩra. Kĩndũ kĩrũmu na gĩa gũtũũra nĩ kĩringithanagio na irĩma. (Isa 54:10; Hab 3:6; ringithania Thb 46:2.) Kwoguo rĩrĩa mwandĩki wa Thaburi aaugire atĩ ũthingu wa Jehova ũhaana o ta “irĩma cia Ngai,” (Thb 36:6, kohoro ka magũrũ-inĩ) no kũhoteke eendaga kuuga ũthingu wake ndũngĩenyenyeka. Kana tondũ irĩma nĩ ndũũgĩru mũno, no kũhoteke eendaga kuuga atĩ ũthingu wa Ngai nĩ wa gĩkĩro kĩa igũrũ gũkĩra wa mũndũ. (Ringithania Isa 55:8, 9) Ũhoro-inĩ wĩgiĩ gũita mbakũri ya mũgwanja ya marakara ma Jehova, Kũguũrĩrio 16:20 yugaga: “Nacio irĩma ikĩagwo.” Ũndũ ũcio ũronania atĩ o na kĩndũ kĩngĩkorũo kĩrĩ gĩtũũgĩru ta irĩma, gĩtingĩĩthema marakara ma Ngai.—Ringithania Je 4:23-26.
MĨĨ 13-19
MŨTHITHŨ KUUMA KIUGO-INĨ KĨA NGAI THABURI 38-39
w02 11/15 20 kĩb. 1-2
Tũngĩka Atĩa Nĩguo Matukũ Maitũ Makenie Jehova?
MATUKŨ ma ũtũũro witũ monekaga marĩ manini na mathiraga na ihenya. Thutha wa Daudi gwĩcũrania ũrĩa ũtũũro ũrĩ mũkuhĩ, aahoire Ngai akĩmwĩra: “Atĩrĩrĩ Jehova, ndeithia kũmenya ũrĩa mũthia wakwa ũkaahana, na ũndeithie kũmenya mũigana wa matukũ makwa, nĩgetha menye ũrĩa ũtũũro wakwa ũrĩ mũkuhĩ. Ti itherũ nĩ ũtũmĩte matukũ makwa manyihe; na ũraihu wa ũtũũro wakwa ti kĩndũ harĩ wee.” Daudi nĩ eendaga gũtũũra na njĩra ĩgũkenia Ngai, kũgerera ciugo na ciĩko ciake. Oonanirie ũrĩa eehokete Ngai amũteithie akiuga: “Wee nowe kĩĩrĩgĩrĩro gĩakwa.” (Thaburi 39:4, 5, 7) Jehova nĩ aathikĩrĩirie Daudi, agĩthuthuria maũndũ marĩa eekire, na akĩmũrathima.
Nĩ ũndũ mũhũthũ gũtahwo nĩ mĩhangʼo, tondũ ũtũũro ũkoragwo na maũndũ maingĩ ma gwĩka. Ũndũ ũcio no ũtũme tũgĩe na mĩtangĩko, tondũ nĩ kũrĩ maũndũ maingĩ twendaga gwĩka, no ihinda rĩrĩa twĩ narĩo nĩ inini. Hihi wendi witũ nĩ ta ũrĩa Daudi aarĩ naguo—wa gũtũũra ũtũũro witũ na njĩra ĩgũtũma twĩtĩkĩrĩke nĩ Ngai? Hatarĩ nganja Jehova nĩ atũroraga, na agathuthuria o ũmwe witũ. Ayubu aarĩ mũndũ wetigĩrĩte Ngai, na mĩaka ta 3,600 mĩhĩtũku, nĩ aaugire atĩ Jehova nĩ oonaga njĩra ciake na agatara makinya make mothe. Aacokire akiuga: “Ingĩmũcokeria atĩa angĩnjirithia?” (Ayubu 31:4-6, 14) No tũhote gũtũma matukũ maitũ mekenie Jehova na njĩra ya kũiga maũndũ ma kĩĩroho mbere, gwathĩkĩra maathani make, na kũhũthĩra mahinda maitũ na njĩra ya ũũgĩ. Reke tũthuthurie maũndũ macio na njĩra ndikĩru.
MĨĨ 20-26
MŨTHITHŨ KUUMA KIUGO-INĨ KĨA NGAI THABURI 40-41
Kũmaatha Maũndũ ma Bata Maandĩko-inĩ
it-2 16
Jehova
Bibilia ĩrĩ yothe ĩkoragwo ĩkĩaria ũhoro wa gũtũũgĩrio kwa ũnene wa Jehova, na ũndũ ũcio nĩ wonanagia atĩ muoroto mũnene ũrĩa Jehova Ngai akoragwo naguo nĩ gũtheria rĩĩtwa rĩake. Gũtherio kwa rĩĩtwa rĩu kũhutĩtie kũrĩehereria gĩko kĩrĩa rĩhakĩtwo. No makĩria ma ũguo nĩ kũhutĩtie kũrĩtĩa, na kuonwo rĩrĩ itheru nĩ araika o hamwe na andũ. Nĩ ũndũ ũcio magetĩkĩra atĩ Jehova nĩwe Mwathani Ũrĩa Mũnene, na kwoguo magatĩa ũnene wake meyendeire, makerutĩra kũmũtungatĩra, na magakenera gwĩka wendi wake nĩ ũndũ wa kũmwenda. Ihoya rĩrĩa Daudi aahoire Jehova thĩinĩ wa Thaburi 40:5-10, nĩ rĩonanagia atĩ aarĩ na mwerekera ta ũcio na nĩ aatheririe rĩĩtwa rĩa Jehova. (Rora wone ũrĩa mũtũmwo Paulo aahũthĩrire ciugo imwe cia thaburi ĩyo kwaria ũhoro wa Kristo Jesu thĩinĩ wa Ahi 10:5-10.)
MĨĨ 27–JUNI 2
MŨTHITHŨ KUUMA KIUGO-INĨ KĨA NGAI THABURI 42-44
Gunĩka Biũ Kuumana na Ũrutani wa Jehova
w06 6/1 9 kĩb. 4
Matemo Kuuma Ibuku rĩa Kerĩ rĩa Thaburi
42:4, 5, 11; 43:3-5. Tũngĩĩkora twamũranĩtio na kĩũngano gĩa Gĩkristiano kwa ihinda nĩ ũndũ wa gĩtũmi gĩkĩrĩte ũhoti witũ, kũririkana maũndũ marĩa twakenagĩra rĩrĩa twanyitanagĩra nakĩo no gũtwĩkĩre hinya. O na gũtuĩka kĩambĩrĩria-inĩ ũndũ ũcio no ũtũme tũgĩe na ihooru mũno, gwĩka ũguo no gũtũririkanie atĩ Ngai nĩwe rĩũrĩro ritũ na atĩ nĩ twagĩrĩirũo kũmweterera atũteithie.
Ũrĩa Ũngĩkenera Wĩruti Waku na Ũgunĩke Kuumana Naguo
HOYA: Ũndũ wa mbere ũrĩa ũbatiĩ gwĩka nĩ kũhoya. (Thab. 42:8) Nĩkĩ? Tondũ kwĩruta Kiugo kĩa Ngai nĩ gĩcunjĩ gĩa ũthathaiya witũ. Kwoguo nĩ twagĩrĩirũo kũhoya Jehova atũteithie kũnyita wega kĩrĩa tũrathoma na atũhe roho wake mũtheru. (Luk. 11:13) Barbara, ũrĩa ũtungatĩte arĩ mishonarĩ ihinda iraihu, aaugire ũũ: “Hĩndĩ ciothe nĩ hoyaga itanathoma kana kwĩruta Bibilia. Thutha wa kũhoya nĩ njiguaga atĩ Jehova arĩ hamwe na niĩ na nĩ arakenio nĩ ũndũ ũrĩa ndĩreka.” Kũhoya tũtaneruta nĩ gũtũteithagia kũhingũra meciria na ngoro citũ, nĩgetha ciĩtĩkĩre kwamũkĩra irio cia kĩĩroho iria tũrarĩa.
Kũmaatha Maũndũ ma Bata Maandĩko-inĩ
it-1 1242
Ngui ya Gĩthaka
Ngui ya gĩthaka nĩ ĩgwetetwo maita maingĩ thĩinĩ wa Maandĩko, ĩkĩrũgamĩrĩra maũndũ matiganĩte. Rĩrĩa Ayubu aataragĩria moritũ marĩa aarĩ namo, aaugire atĩ aatuĩkĩte “mũrũ wa nyina na ngui cia gĩthaka.” (Ayu 30:29) Mwandĩki ũmwe wa Thaburi akĩaria ũhoro wĩgiĩ ũrĩa andũ a Ngai maatooretio, aaugire ũũ: “Wee ũtũhehenjeire kũrĩa ngui cia gĩthaka cikaraga.” (Thb 44:19) No kũhoteke aaragia ũhoro wa kĩhaaro kĩa mbaara, kũrĩa ngui cia gĩthaka ciacemanagĩria nĩgetha irĩe andũ arĩa mooragĩtwo. (ringithania Thb 68:23) Rĩrĩa Babuloni yarigicĩirie Jerusalemu mwaka wa 607 M.M.M., nĩ kwagĩire ngʼaragu nene nginya atumia makĩaga tha na ciana ciao. Nĩkĩo rĩrĩa Jeremia aataaragĩria ũrĩa ‘andũ aoʼ maagĩte tha, aamaringithanirie na ũrĩa ngui cia gĩthaka irũmbũyagia ciana ciacio.—Mac 4:3, 10.
JUNI 3-9
MŨTHITHŨ KUUMA KIUGO-INĨ KĨA NGAI THABURI 45-47
Rwĩmbo Rwĩgiĩ Ũhiki wa Mũthamaki
it-2 1169
Mbaara
Rĩrĩa mbaara ĩyo ĩgaathira, thĩ nĩ ĩgaakorũo na thayũ ihinda rĩa mĩaka ngiri. Ũrathi ũrĩa ũrĩ thĩinĩ wa thaburi ũrĩa uugaga atĩ “[Jehova] aniinaga mbaara kũndũ guothe thĩinĩ wa thĩ. Oinangaga ũta na agathũkangia itimũ; acinaga ngaari cia mbaara na mwaki,” wahingire riita rĩa mbere bũrũri-inĩ wa Isiraeli rĩrĩa Ngai aathũkangirie indo cia mbaara cia thũ ciao. Thutha wa Kristo gũtooria arĩa magaacogera mbaara ya Hari–Magedoni, thĩ yothe nĩ ĩgaakenera gũkorũo na thayũ mũingĩ. (Thb 46:8-10) Arĩa makaaheo muoyo wa tene na tene nĩ arĩa maturĩte “hiũ ciao cia njora ituĩke hiũ cia mĩraũ na matimũ mao matuĩke hiũ cia gũceha” na arĩa “[materutaga] mbaara rĩngĩ.” “Nĩ gũkorũo kanua ka Jehova mũnene wa ita nĩko koigĩte ũguo.”—Isa 2:4; Mik 4:3, 4.
Wĩrutanĩrie Biũ Ũtungata-inĩ
g 12/10 22-23
Andũ Ethĩ Moragia
Ingĩtaarĩria Atĩa Mawoni ma Bibilia Megiĩ Ngomanio cia Andũ a Mũthemba Ũmwe?
Igongona-inĩ rĩa kũheana iheo, andũ magacanjamũka mũno thutha wa atumia erĩ athaaki kũmumunyana. Eroreri makagega, no makaugĩrĩria mũno kuonania nĩ maranyita ũndũ ũcio mbaru. Andũ arĩa meingĩragia ngomanio-inĩ cia andũ a mũthemba ũmwe makauga ũcio nĩ ũhootani. No arĩa mamenagĩrĩria ũndũ ũcio makauga andũ acio nĩ igweta mareyethera. Thutha ũcio, video ĩyo ĩgiĩ atumia acio makĩmumunyana ĩkonanio TV-inĩ na ĩgatheremio mũno Intaneti-inĩ.
TA ŨRĨA ngerekano ĩyo yonania, rĩrĩa andũ meyumĩria na mauga atĩ nĩ meingĩragia ngomanio-inĩ cia andũ a mũthemba ũmwe, kana makauga nĩ magucagĩrĩrio nĩ arũme o hamwe na atumia, maũndũ macio nĩ maragĩrĩrio mũno mohoro-inĩ. Andũ amwe magaathagĩrĩria andũ ta acio makauga atĩ marĩ na ũmĩrĩru; angĩ nao makamamenereria nĩ ũndũ wa mĩtugo ĩyo mĩũru. No andũ aingĩ monaga ngomanio cia andũ a mũthemba ũmwe ta arĩ o mũtũũrĩre wa kawainda. Daniel, ũrĩa ũrĩ na mĩaka 21 aaugire ũũ: “Rĩrĩa ndaarĩ cukuru, nginya ciana iria ciarĩ njega ciaugaga atĩ angĩkorũo mũndũ arona ngomanio cia andũ a mũthemba ũmwe itarĩ njega, arĩ na mũthutũkanio na nĩ aratuĩra arĩa angĩ.”
Mawoni megiĩ ngomanio cia andũ a mũthemba ũmwe no makorũo marĩ ngũrani harĩ andũ a mĩaka ĩtiganĩte na mabũrũri ngũrani. No Akristiano matitwaragwo “mwena na mwena nĩ rũhuho o ruothe rwa morutani.” (Aefeso 4:14) Handũ ha ũguo, marũmagĩrĩra mawoni ma Bibilia.
Mawoni ma Bibilia nĩ marĩkũ megiĩ ngomanio cia andũ a mũthemba ũmwe? Angĩkorũo ũtũũraga kũringana na ithimi cia Bibilia-rĩ, ũngĩtaarĩria atĩa arĩa maugaga atĩ ũrĩ na mũthutũkanio, nĩ ũratuĩra arĩa angĩ, kana nĩ ũmenete andũ arĩa meingĩragia ngomanio-inĩ cia andũ a mũthemba ũmwe? Rora ciũria ici irũmĩrĩire na macokio marĩa ũngĩheana.
Bibilia yugaga atĩa igũrũ rĩgiĩ ngomanio cia andũ a mũthemba ũmwe? Bibilia nĩ yonanagia wega atĩ Ngai aabangĩte ngomanio ĩkoragwo gatagatĩ ka mũthuri na mũtumia o arĩa tu marĩ thĩinĩ wa kĩhiko. (Kĩambĩrĩria 1:27, 28; Maũndũ ma Alawii 18:22; Thimo 5:18, 19) Rĩrĩa Bibilia yamenereria ngomanio itagĩrĩire, ĩkoragwo ĩkĩaria ũhoro wa ngomanio cia andũ a mũthemba ũmwe, na ngomanio gatagatĩ-inĩ ka mũndũrũme na mũtumia arĩa matahikanĩtie.—Agalatia 5:19-21.
Mũndũ angĩkũũria: “Mawoni maku megiĩ ngomanio cia andũ a mũthemba ũmwe nĩ marĩkũ?”
No ũmwĩre: “Ndithũire andũ arĩa meingĩragia ngomanio-inĩ cia andũ a mũthemba ũmwe, no ndingĩnyita mbaru mĩtugo yao.”
Ririkana: Angĩkorũo ũtongoragio nĩ ithimi cia Bibilia ciĩgiĩ mĩtugo, ũcio nĩguo mũtũũrĩre ũrĩa wee ũthuurĩte, na ũrĩ na kĩhooto gĩa gũtũũra kũringana na itua rĩu. (Joshua 24:15) Ndwagĩrĩirũo kũigua ũgĩconoka nĩ ũndũ wa mawoni maku.—Thaburi 119:46.
Hihi Akristiano nĩ magĩrĩirũo kũhe andũ othe gĩtĩo gũtekũmakania mawoni mao megiĩ ngomanio? Ĩĩ. Bibilia yugaga: “Tĩagai andũ a mĩthemba yothe.” (1 Petero 2:17) Nĩ ũndũ ũcio, Akristiano matikoragwo mathũire andũ arĩa meingĩragia ngomanio-inĩ cia andũ a mũthemba ũmwe. Mekagĩra andũ othe maũndũ mega, nginya arĩa meingĩragia ngomanio-inĩ ta icio.—Mathayo 7:12.
Mũndũ angĩkũũria: “Na githĩ mawoni maku megiĩ ngomanio cia andũ a mũthemba ũmwe matironania mũthutũkanio kwerekera andũ ta acio?”
No ũmwĩre: “Aca tiguo. Niĩ ndeganaga na ngomanio cia andũ a mũthemba ũmwe, no ti andũ arĩa mekaga maũndũ macio thũire.”
No wongerere: “Ta rĩu kwa ngerekano-rĩ, nĩ nduĩte itua rĩa kwaga kũnyua thigara. Na nyonaga kũnyua thigara arĩ ũndũ mũũru. Ĩ angĩkorũo wee nĩ ũnyuaga thigara na ũkoragwo na mawoni ngũrani na makwa? Ndingĩkũmena nĩ ũndũ wa mawoni maku, na ndĩ na ma o nawe ndũngĩmena nĩ ũndũ wa mawoni makwa. Kana tiguo? Ũguo noguo harĩ ũhoro-inĩ wĩgiĩ mawoni maitũ ngũrani megiĩ ngomanio cia andũ a mũthemba ũmwe.
Na githĩ Jesu ndaarutanire tũkiragĩrĩrie arĩa angĩ? Angĩkorũo nĩguo-rĩ, na githĩ Akristiano matiagĩrĩirũo gũkirĩrĩria arĩa meingĩragia ngomanio-inĩ cia andũ a mũthemba ũmwe? Jesu ndeerire arũmĩrĩri ake atĩ metĩkagĩre mĩtũũrĩre o yothe. Handũ ha ũguo, aarutanire atĩ arĩa makaahonoka nĩ “mũndũ o wothe ũrĩonanagia wĩtĩkio harĩ we.” (Johana 3:16) Kuonania wĩtĩkio harĩ Jesu nĩ hamwe na gwathĩkĩra ithimi cia Ngai ciĩgiĩ mĩtugo, iria igirĩtie mĩtugo ĩmwe ta ngomanio cia andũ a mũthemba ũmwe.—Aroma 1:26, 27.
Mũndũ angiuga: “Arĩa meingĩragia ngomanio-inĩ cia andũ a mũthemba ũmwe matingĩcenjia ũrĩa mahaana; ũguo nĩguo maaciarirũo.”
No ũmwĩre: “Bibilia ndĩaragia ũhoro wa andũ mombĩtwo marĩ na ũndũ ũcio wa kwenda kwĩingĩria ngomanio-inĩ cia andũ a mũthemba ũmwe, no nĩ yugaga atĩ maũndũ mamwe nĩ makoragwo marũmĩte mũno. (2 Akorintho 10:4, 5) O na angĩkorũo andũ amwe nĩ magucagĩrĩrio nĩ andũ a mũthemba ũmwe nao, Bibilia ĩraga Akristiano metheme ngomanio cia andũ a mũthemba ũmwe.”
Ũndũ ũngĩka: Handũ ha kwarĩrĩria kĩrĩa gĩtũmaga andũ amwe makorũo na merirĩria ma ngomanio cia andũ a mũthemba ũmwe, tĩtĩrithia atĩ Bibilia nĩ ĩgirĩtie ngomanio ta icio. No ũringithanie ũndũ ũcio na ngerekano ĩno: “Andũ amwe maugaga atĩ mũndũ no akorũo na mwerekera wa kũrakara nĩ ũndũ wa kũgaya ũndũ ũcio kuuma kũrĩ aciari, na atĩ nĩkĩo andũ amwe mahiũhaga kũrakara. (Thimo 29:22) Ĩ angĩkorũo ũndũ ũcio nĩ wa ma? O ta ũrĩa ũĩ, Bibilia nĩ ĩmenagĩrĩria marakara. (Thaburi 37:8; Aefeso 4:31) Hihi no tuuge ũndũ ũcio ti wa kĩhooto atĩ tondũ andũ amwe nĩ marakaraga na ihenya?”
Kũngĩhoteka atĩa Ngai ere mũndũ ũgucagĩrĩrio nĩ andũ a mũthemba ũmwe nake etheme ngomanio cia andũ a mũthemba ũmwe? Na githĩ kũu ti kwaga tha? Mwĩcirĩrie ta ũcio wĩhocetie harĩ mawoni moru atĩ no mũhaka andũ mahingie merirĩria mao ma ngomanio. Bibilia nĩ yonanagia atĩ andũ no mahote gũthuura kwaga kũhingia merirĩria moru ma ngomanio angĩkorũo no mende gwĩka ũguo.—Akolosai 3:5.
Mũndũ angiuga: “O na angĩkorũo ndwĩingĩragia ngomanio-inĩ cia andũ a mũthemba ũmwe, wagĩrĩirũo gũcenjia mawoni maku megiĩ ũndũ ũcio.”
No ũmwĩre: “Ĩ angĩkorũo niĩ ndiendete gũũtha ciũthi cia gũcinda mbeca na wee nĩ wendete. Hihi no ũkorũo ũrĩ ũndũ wa kĩhooto wee kũndindĩkĩrĩria njenjie mawoni makwa atĩ tondũ andũ aingĩ nĩ mothaga ciũthi icio?”
Ririkana ũndũ ũyũ: Andũ aingĩ (nginya arĩa meingĩragia ngomanio-inĩ cia andũ a mũthemba ũmwe), nĩ makoragwo na maũndũ marũmagĩrĩra marĩa matũmaga mamene maũndũ mamwe ta ũtunyani, wagi wa kĩhooto, kana mbaara. Bibilia nĩ ĩgirĩtie maũndũ macio; na ningĩ nĩ ĩgirĩtie mĩtugo ĩmwe ya ngomanio, ta ngomanio cia andũ a mũthemba ũmwe.—1 Akorintho 6:9-11.
Bibilia kũgiria maũndũ macio ti kuonania atĩ ndĩrĩ kĩhooto kana nĩ ĩnyitaga mbaru mũthutũkanio. No ĩraga andũ arĩa magucagĩrĩrio nĩ ngomanio cia andũ a mũthemba ũmwe o ũndũ ũrĩa ĩraga arĩa meingĩragia ngomanio-inĩ cia andũ arĩa matahikanĩtie, ‘moragĩre ngomanio itagĩrĩire.ʼ—1 Akorintho 6:18.
Ũrĩa kũrĩ nĩ atĩ, andũ milioni nyingĩ arĩa mendaga gũtũũra kũringana na ithimi cia Bibilia, nĩ makũragia ngumo ya kwĩgirĩrĩria na ĩkamateithia gũtooria magerio mothe moru mangĩcemania namo. Andũ acio nĩ hamwe na andũ aingĩ arĩa makoragwo matuĩte itua rĩa kwaga kũingĩra kĩhiko-inĩ, na andũ aingĩ arĩa makoragwo mahikanĩtie na mũndũ ũrĩ na thĩna wa mwĩrĩ ũtangĩhota kũhingia merirĩria ma ngomanio. Nĩ mahotaga gũtũũra marĩ na gĩkeno o na matekũhingia merirĩria mao ma ngomanio. Arĩa makoragwo na merirĩria ma ngomanio cia andũ a mũthemba ũmwe, o nao no mahote gwĩka ũguo angĩkorũo na ma biũ no mende gũkenia Ngai.—Gũcokerithia Maathani 30:19.
JUNI 10-16
MŨTHITHŨ KUUMA KIUGO-INĨ KĨA NGAI THABURI 48-50
Aciari, Teithiai Famĩlĩ Cianyu Kwĩhoka Ithondeka rĩa Jehova Biũ
w11 3/15 19 kĩb. 5-7
Tũrĩ na Gĩtũmi Kĩega gĩa Gũkena
“Ceeraceerai Zayuni; mĩthiũrũrũkei; tarai nyũmba ciayo iria ndaya na igũrũ. Erekeriai ngoro cianyu harĩ njirigo ciayo. Thuthuriai nyũmba ciayo iria ndaya na igũrũ irĩ na ũgitĩri, nĩgetha mũkeera njiarũa iria igooka thutha-inĩ ũhoro wayo.” (Thab. 48:12, 13) Mwandĩki wa thaburi eekagĩra Aisiraeli ngoro merorere Jerusalemu marĩ hakuhĩ. Ta hũũra mbica maũndũ mega marĩa famĩlĩ cia Isiraeli ciaaragĩrĩria thutha wa kuuma gũceera itũũra rĩu itheru nĩ ũndũ wa ciathĩ cia o mwaka na kwĩrorera riri wa hekarũ ĩrĩa yarĩ kuo. No mũhaka akorũo nĩ meeriragĩria kwĩra “njiarũa iria igooka thutha-inĩ ũhoro wayo.”
Ta wĩcirie ũhoro wa mũtumia mũthamaki wa Sheba. Kĩambĩrĩria-inĩ aigua ũhoro wĩgiĩ ũrĩa ũthamaki wa Suleimani watheremete, na ũrĩa aarĩ na ũũgĩ mũingĩ, nĩ aagĩire na nganja. Nĩ kĩĩ kĩamũteithirie gwĩtĩkia atĩ maũndũ marĩa aaiguĩte maarĩ ma ma? Aaugire ũũ: “Ndietĩkirie ũhoro ũcio nginya rĩrĩa ndĩrokire ndĩreyonera na maitho makwa.” (2 Maũ. 9:6) Nĩ ma, maũndũ marĩa twĩyonagĩra na ‘maitho maitũʼ nĩ matũhutagia mũno.
Ũngĩteithia ciana ciaku atĩa kwĩyonera magegania ma ithondeka rĩa Jehova na ‘maitho maoʼ? Angĩkorũo nĩ harĩ wabici ya rũhonge ya Aira a Jehova hakuhĩ na kwanyu, bangai gũceera. Kwa ngerekano Mandy na Bethany, maaikaraga kilomita ta 1,500 kuuma kũrĩa Betheli yarĩ bũrũri-inĩ wao. O na kũrĩ ũguo, aciari ao nĩ maabangaga gũceera kuo maita maingĩ, makĩria rĩrĩa airĩtu acio maarĩ anini. Mandy na Bethany maaugire ũũ: “Tũtanaceera Betheli, tweciragia atĩ tũtingĩakeneire na atĩ no andũ akũrũ makoragwo kuo. No nĩ twakorire nginya andũ ethĩ arĩa maatungatagĩra Jehova na kĩyo, na nĩ maakenagĩra mũno. Nĩ tuoonire atĩ ithondeka rĩa Jehova rĩarĩ inene gũkĩra ũrĩa tweciragia, na o hĩndĩ twaceera Betheli twaumaga kuo twĩkĩrĩtwo hinya kĩĩroho.” Kwĩyonera ithondeka rĩa Jehova rĩrĩ hakuhĩ nĩ gwekĩrire ngoro Mandy na Bethany mambĩrĩrie gũtungata marĩ mapainia, na thutha-inĩ nĩ maaheirũo mweke wa gũtungata Betheli rĩmwe na rĩmwe.
Kũmaatha Maũndũ ma Bata Maandĩko-inĩ
it-2 805
Ũtonga
Rĩrĩa Aisiraeli maagaacĩrĩte marĩ rũrĩrĩ, nĩ maakenagĩra irio na indo cia kũnyua (1Ath 4:20; Koh 5:18, 19), na ũtonga wao nĩ wamagitagĩra kuumana na mathĩna marĩa marehagwo nĩ ũthĩni. (Thi 10:15; Koh 7:12) No rĩrĩ, o na gũtuĩka warĩ wendi wa Jehova Aisiraeli makenere kĩyo kĩa wĩra wao (ringithania Thi 6:6-11; 20:13; 24:33, 34), ningĩ nĩ aamaheire mũkaana matikanariganĩrũo atĩ we nĩwe warĩ kĩhumo kĩa ũtonga wao na mambĩrĩrie kwĩhoka ũtonga ũcio wao. (Gũc 8:7-17; Thb 49:6-9; Thi 11:4; 18:10, 11; Je 9:23, 24) Nĩ maaririkanagio atĩ ũtonga no wa ihinda inini (Thi 23:4, 5), ndũngĩheo Ngai ũtuĩke ũkũũri wa kũhonokia mũndũ kuuma gĩkuũ-inĩ (Thb 49:6, 7), na ndũngĩteithia arĩa makuĩte (Thb 49:16, 17; Koh 5:15). Nĩ maaririkanagio atĩ kwenda ũtonga mũno no gũtũme mũndũ eingĩrie maũndũ-inĩ matarĩ mega na age gwĩtĩkĩrĩka harĩ Jehova. (Thi 28:20; ringithania Je 5:26-28; 17:9-11.) Ningĩ nĩ meekagĩrũo ngoro ‘matĩithagie Jehova na indo ciao cia goro.ʼ—Thi 3:9.
JUNI 17-23
MŨTHITHŨ KUUMA KIUGO-INĨ KĨA NGAI THABURI 51-53
Kũmaatha Maũndũ ma Bata Maandĩko-inĩ
it-1 644
Doegu
Aarĩ Mũedomu mũnene wa arĩithi a Mũthamaki Saulu, na eehokeirũo wĩra mũnene wa kũmarũgamĩrĩra. (1Sa 21:7; 22:9) No kũhoteke Doegu aarĩ mũndũ wagarũrũkĩte agatuĩka Mũyahudi. Nĩ ũndũ wa Doegu gũkorũo ‘ahingĩrĩirio mbere ya Jehova’ itũũra-inĩ rĩa Nobu, hihi no kũhoteke nĩ ũndũ wa mwĩhĩtwa, gũkorũo atarĩ mũtheru, kana gwĩcirĩrio aarĩ na mangũ, nĩ oonire Mũthĩnjĩri-Ngai Mũnene Ahimeleku akĩhe Daudi mũgate na rũhiũ rwa njora rwa Goliathu. Thutha-inĩ rĩrĩa Saulu aaragia na ndungata ciake, na akiuga atĩ ciabangaga njama ya kũmũũkĩrĩra, Doegu nĩ aaumbũrire ũndũ ũrĩa oonete itũũra-inĩ rĩa Nobu. Thutha wa gũtũmanĩra mũthĩnjĩri-Ngai ũrĩa mũnene na athĩnjĩri-Ngai arĩa angĩ a Nobu, na Ahimeleku akĩũrio ciũria, Saulu agĩatha arangĩri morage athĩnjĩri-Ngai othe. Rĩrĩa maaregire, Saulu agĩatha Doegu amorage, nake akĩũraga athĩnjĩri-Ngai 85 o rĩo. Thutha wa gĩĩko kĩu kĩũru, Doegu agĩtharĩkĩra itũũra rĩa Nobu, akĩniina aikari othe a rĩo, ciana na andũ akũrũ, o hamwe na mahiũ mao.—1Sa 22:6-20.
Ta ũrĩa kohoro ga gũtaarĩria thĩinĩ wa Thaburi 52 konanĩtie, Daudi aandĩkire ũũ ũhoro-inĩ wĩgiĩ Doegu: “Rũrĩmĩ rũu rwaku rũũgĩ ta kanyoi, rũbangaga maũndũ moru na rũkaheenania. Wee wendete maũndũ marĩa moru gũkĩra marĩa mega, ũkenda kũheenania gũkĩra kwaria maũndũ marĩa magĩrĩru. Nĩ wendete kiugo o gĩothe gĩa gũtuurithia, wee rũrĩmĩ rũrũ rwaragia maheeni!”—Thb 52:2-4.
JUNI 24-30
MŨTHITHŨ KUUMA KIUGO-INĨ KĨA NGAI THABURI 54-56
Ngai Arĩ Mwena Waku
w06 8/1 22 kĩb. 10-11
Koragwo na Ũũgĩ, Wĩtigagĩre Ngai!
Hĩndĩ ĩmwe, Daudi nĩ oorĩire kũrĩ Akishi mũthamaki wa Afilisti itũũra-inĩ rĩa Gathu, kũrĩa kwarĩ kwa Goliathu. (1 Samueli 21:10-15) Ndungata cia mũthamaki ciaugire atĩ aarĩ thũ yao. Daudi eekire atĩa ũndũ-inĩ ũcio ũngĩaingĩririe muoyo wake ũgwati-inĩ? Aaitũrũrire ngoro yake harĩ Jehova kũgerera mahoya. (Thaburi 56:1-4, 11-13) O na gũtuĩka nĩ eetuire mũgũrũki nĩguo ahote kũũra, Daudi nĩ aamenyaga atĩ nĩ Jehova wamũhonokirie na njĩra ya kũrathima ũndũ ũcio eekĩte. Nĩ ũndũ wa Daudi kwĩhoka Jehova na ngoro yothe, nĩ oonanirie atĩ aarĩ mũndũ wetigĩrĩte Ngai.—Thaburi 34:4-6, 9-11.
O ta Daudi, no tuonanie atĩ nĩ twĩtigĩrĩte Ngai na njĩra ya kwĩhoka ciĩranĩro ciake itũteithie kũhiũrania na mathĩna maitũ. Daudi aaugire: “Rekagĩrĩria njĩra yaku harĩ Jehova; mwĩhokage, nake nĩ arĩgũteithagia.” (Thaburi 37:5) Ũguo ti kuuga atĩ tũkera Jehova mathĩna maitũ tũgacoka tũgaikara o ro ũguo hatarĩ ũndũ tũreka, na twĩrĩgĩrĩre atĩ nĩ egũtũteithia. Daudi ndaahoire Jehova ũteithio agĩcoka agĩikara o ũguo hatarĩ ũndũ areka. Aahũthĩrire ũhoti na ũũgĩ ũrĩa Jehova aamũheete kũhiũrania na thĩna ũcio aarĩ naguo. O na kũrĩ ũguo, nĩ aamenyaga atĩ kĩyo kĩa mũndũ wiki ti kĩiganu gĩa gũteithĩrĩria mũndũ atoorie. Noguo o na ithuĩ twagĩrĩirũo gwĩka. Rĩrĩa tweka ũrĩa wothe tũngĩhota, twagĩrĩirũo gũtigĩra Jehova maũndũ macio mangĩ. Ũrĩa kũrĩ nĩ atĩ, maita maingĩ no tũremwo gwĩka ũndũ, tũbatare o kwĩhoka Jehova. Hĩndĩ ta ĩyo, nĩrĩo mũndũ onanagia ũrĩa etigĩrĩte Jehova. No tũũmĩrĩrio nĩ ciugo ici Daudi aaririe kuuma ngoro: “Ũrata wa hakuhĩ na Jehova nĩ wa arĩa mamwĩtigĩrĩte.”—Thaburi 25:14.
Kũmaatha Maũndũ ma Bata Maandĩko-inĩ
it-1 857-858
Kũbanga Maũndũ Kabere
Gĩĩko gĩa ũkunyanĩri kĩa Judasi Mũisikariota nĩ kĩahingirie ũrathi, na gĩkĩonania ũhoti wa Jehova na Mũrũwe wa kũmenya maũndũ kabere. (Thb 41:9; 55:12, 13; 109:8; Atũ 1:16-20) O na kũrĩ ũguo, tũtingiuga atĩ Ngai nĩ aabangĩte atĩ Judasi we mwene nĩwe ũngĩgeka ũguo. Morathi nĩ moonanĩtie atĩ mũrata wa hakuhĩ wa Jesu nĩwe ũngĩkamũkunyanĩra, no matiaugĩte nĩ mũrata ũrĩkũ ũngĩgeka ũguo. Ningĩ kũringana na motaaro ma Bibilia, no tuone wega atĩ Ngai ndaabangĩte ciĩko njũru cia Judasi. Ũtaaro ũmwe Paulo aaheanire nĩ: “Ndũkanahĩkĩke kũigĩrĩra mũndũ o na ũrĩkũ moko; o na kana ũnyitanĩre mehia-inĩ ma andũ angĩ; tũũra ũrĩ mũtheru.” (1Ti 5:22; ringithania 1Ti 3:6.) Nĩguo Jesu atigĩrĩre atĩ nĩ athuura atũmwo ake 12 na njĩra ya ũũgĩ, aahoire Ithe ũtukũ mũgima, thutha ũcio akĩmenyithania itua rĩake. (Lu 6:12-16) Angĩkorũo Ngai nĩ aabangĩte atĩ Judasi nĩwe ũngĩgaakorũo arĩ mũkunyanĩri, ũndũ ũcio ũngĩonanirie atĩ ũtongoria wa Ngai ti mũrũngĩrĩru, na kũringana na ũtaaro ũcio waheanirũo nĩ Paulo, ũndũ ũcio ũngĩatũmire Ngai akorũo anyitanĩire na mehia macio meekirũo.
Kwoguo nĩ kũroneka wega atĩ rĩrĩa Judasi aathuurirũo atuĩke mũtũmwo, ngoro yake ndĩonanagia ũndũ o wothe wa gũkorũo arĩ mũkunyanĩri. Aarekire ngoro-inĩ yake ‘kuumĩre mũri ũrĩ thumuʼ na ũkĩmũthũkia, ũndũ ũrĩa watũmire acenjie age gwathĩkĩra Ngai na handũ ha ũguo agĩtĩkĩra ũtongoria wa mũcukani, ũrĩa watũmire atuĩke mũici na mũkunyanĩri. (Ahi 12:14, 15; Joh 13:2; Atũ 1:24, 25; Jak 1:14, 15) Hĩndĩ ĩrĩa ũndũ ũcio wakũrire biũ ngoro-inĩ ya Judasi, Jesu nĩ aahotire gũthoma ngoro yake na akiuga atĩ nĩwe ũngĩamũkunyanĩire.—Joh 13:10, 11.