Mabuku Marĩa Magwetetwo Thĩinĩ wa Kabuku ka Mũcemanio wa Ũtũũro na Ũtungata
© 2024 Watch Tower Bible and Tract Society of Pennsylvania
NOVEMBA 4-10
MŨTHITHŨ KUUMA KIUGO-INĨ KĨA NGAI THABURI 105
“Nĩ Aririkanaga Kĩrĩkanĩro Gĩake Tene na Tene”
it-2 1201 kĩb. 2
Kiugo kĩa Ngai
Ciũmbe ciothe, iria irĩ muoyo na iria itarĩ muoyo, nĩ ciathĩkagĩra kiugo kĩa Ngai, na no acihũthĩre kũhingia mĩoroto yake. (Thb 103:20; 148:8) No twĩhoke kiugo kĩa Ngai tondũ nĩ aririkanaga kũhingia ũndũ ũrĩa eranĩire. (Gũc 9:5; Thb 105:42-45) O ta ũrĩa we mwene augĩte, kiugo gĩake “gĩtũũraga tene na tene”; gĩtingĩmũcokerera gĩtahingĩtie muoroto wakĩo.—Isa 40:8; 55:10, 11; 1Pe 1:25.
Kũmaatha Maũndũ ma Bata Maandĩko-inĩ
w86 11/1 19 kĩb. 15
Ũrĩa Inyuĩ Andũ Ethĩ Mũngĩtũma Famĩlĩ Yanyu Ĩkorũo na Gĩkeno na Ũrũmwe
15 “Makĩoha magũrũ ma [Jusufu] na bĩngũ, ngingo yake ĩkĩohwo na igera; nginya hĩndĩ ĩrĩa kiugo gĩake kĩahingire, uuge wa Jehova nĩguo wamũtheririe.” (Thaburi 105:17-19) Kwa ihinda rĩa mĩaka 13, Jusufu nĩ aagereire moritũ arĩ ngombo na muohwo, nginya rĩrĩa kĩĩranĩro kĩa Jehova kĩahingire. Maũndũ macio aagereire nĩ maamũtheririe. O na gũtuĩka Jehova tiwe wamũreheire mathĩna macio, nĩ aametĩkĩririe arĩ na gĩtũmi. Hihi Jusufu nĩ angĩathiire na mbere kwĩhoka “uuge wa Jehova” o na akĩgeragĩra mathĩna macio? Hihi nĩ angĩarekire ngumo ciake njega ciagagĩrio makĩria na akũrie wetereri, wĩnyihia, hinya wa kĩĩroho, na kĩyo kĩrĩa kĩabataranagia nĩguo ahote kũhiũrania na wĩra mũritũ ũrĩa angĩehokeirũo? Thutha wa moritũ macio Jusufu aahaanire ta thahabu therie, agĩkorũo arĩ wa bata o na makĩria harĩ Ngai na akĩmũhũthĩra na njĩra nene thutha ũcio.— Kĩambĩrĩria 41:14, 38-41, 46; 42:6, 9.
NOVEMBA 11-17
MŨTHITHŨ KUUMA KIUGO-INĨ KĨA NGAI THABURI 106
Kũmaatha Maũndũ ma Bata Maandĩko-inĩ
w06 7/15 13 kĩb. 9
Matemo Kuuma Ibuku rĩa Gatatũ na rĩa Kana rĩa Thaburi
106:36, 37. Mĩhari ĩno yonanagia atĩ ũhoi wa mĩhianano nĩ ũhutanĩtie na kũrutĩra ndaimono magongona. Ũndũ ũcio ũronania atĩ mũndũ ũhũthagĩra mĩhianano no ekore agĩtongorio nĩ ndaimono. Bibilia ĩtũheaga mũkaana ũyũ: “mwĩthemagei mĩhianano.”—1 Johana 5:21.
NOVEMBA 18-24
MŨTHITHŨ KUUMA KIUGO-INĨ KĨA NGAI THABURI 107-108
“Cokeriai Jehova Ngatho, Tondũ nĩ Mwega”
w07 4/15 20 kĩb. 2
Reke Kĩũngano Kĩgooce Jehova
2 Kĩũngano to gĩkundi kĩa andũ gĩcemanagia hamwe tu. Ningĩ ti handũ andũ maumĩte kũndũ kũmwe kana makenagio nĩ maũndũ mahaanaine macemanagĩria. Handũ ha ũguo, muoroto mũnene wa gũkorũo na kĩũngano nĩ kũgooca Jehova Ngai. Na ũguo nĩguo gũkoretwo kwa ihinda iraihu, ta ũrĩa ibuku rĩa Thaburi rĩonanagia. Thaburi 35:18 yugaga: “Niĩ nĩ ngũgũcokeria ngatho ndĩ thĩinĩ wa kĩũngano kĩnene; nĩ ngũkũgooca ndĩ gatagatĩ-inĩ ka irĩndĩ cia andũ.” Nayo Thaburi 107:31, 32 ĩtwĩraga ũũ: “Andũ nĩ macokerie Jehova ngatho nĩ ũndũ wa wendo wake mwĩhokeku na tondũ wa mawĩra ma magegania marĩa ekaga nĩ ũndũ wa ariũ a andũ. Nĩ mamũtũũgĩrie thĩinĩ wa kĩũngano kĩa andũ.”
Kũmaatha Maũndũ ma Bata Maandĩko-inĩ
it-2 420 kĩb. 4
Moabi
Thutha-inĩ, rĩrĩa Daudi aathamakaga, nĩ kwarĩ na mbaara gatagatĩ ka Isiraeli na Moabi. Amoabi nĩ maatooririo biũ na magĩathwo matwaragĩre Daudi irĩhi rĩa igooti. Mũthia-inĩ wa mbaara ĩyo, gĩcunjĩ kĩa igĩrĩ harĩ ithatũ kĩa arũme a Moabi arĩa maarũaga nĩ mooragirũo. Kuonekaga atĩ Daudi aameerire makome thĩ, agĩthima ithimi igĩrĩ cia rũrigi cia andũ arĩa mekũragwo, na gĩthimi kĩmwe kĩa rũrigi kĩa andũ arĩa mekũrekwo matũũre muoyo. (2Sa 8:2, 11, 12; 1Ma 18:2, 11) No kũhoteke atĩ mbaara-inĩ ĩyo, nĩrĩo Benaia mũrũ wa Jehoiada “ooragire ariũ eerĩ a Arieli wa Moabi.” (2Sa 23:20; 1Ma 11:22) Ũhootani ũcio mũnene wa Daudi harĩ Amoabi nĩ wahingirie ciugo ici cia ũrathi cia Balaamu, iria ciaugĩtwo makĩria ma mĩaka 400 mbere ĩyo: “Njata nĩ ĩkooima harĩ Jakubu, naguo mũthĩgi uume Isiraeli. Na hatarĩ nganja nĩ akaahehenja thiithi wa Moabi na ihĩndĩ rĩa mũtwe rĩa ariũ othe a ngũĩ.” (Nda 24:17) No kũhoteke mwandĩki wa Thaburi aaragia ũhoro wĩgiĩ ũhootani ũcio rĩrĩa aaugire atĩ Ngai oonaga Moabi ĩrĩ “kĩraĩ [gĩake] gĩa gwĩthambĩra.”—Thb 60:8; 108:9.
NOVEMBA 25–DICEMBA 1
MŨTHITHŨ KUUMA KIUGO-INĨ KĨA NGAI THABURI 109-112
Nyitaga Mbaru Jesu, Mũthamaki Witũ!
w06 9/1 13 kĩb. 6
Matemo Kuuma Ibuku rĩa Gatano rĩa Thaburi
110:1, 2—Hihi Jesu Kristo, arĩ we “Mwathani [wa Daudi]” eekire atĩa rĩrĩa aaikarĩte thĩ guoko-inĩ kwa ũrĩo kwa Ngai? Thutha wa kũriũka, Jesu aambatire igũrũ na agĩeterera guoko-inĩ kwa ũrĩo kwa Ngai nginya mwaka wa 1914 rĩrĩa aambĩrĩirie gũthamaka arĩ Mũthamaki. Ihinda-inĩ rĩu, Jesu aathamakagĩra arũmĩrĩri ake arĩa aitĩrĩrie maguta, akĩmatongoria wĩra-inĩ wa kũhunjia na gũtua andũ arutwo, na akĩmahaarĩria nĩguo magaathamaka hamwe nake Ũthamaki-inĩ wake.—Mathayo 24:14; 28:18-20; Luka 22:28-30.
w00 4/1 18 kĩb. 3
Arĩa Marũaga na Ngai Matikagaacĩra!
3 Andũ a Jehova makoretwo magĩũkĩrĩrũo kuuma kĩambĩrĩria-inĩ kĩa mĩaka ya 1900. Mabũrũri-inĩ maingĩ, andũ matarĩ na muoroto mwega makoretwo makĩgeria kũrũgamia wĩra wa kũhunjia ũhoro mwega wa Ũthamaki wa Ngai. Makoretwo magĩtongorio nĩ Thũ itũ ĩrĩa nene, Mũcukani, ũrĩa “[ũcangacangaga] ta mũrũthi ũrararama, agĩetha mũndũ wa gũtambura.” (1 Petero 5:8) Thutha wa “mahinda marĩa matuĩtwo ma ndũrĩrĩ” gũthira mwaka-inĩ wa 1914, Ngai nĩ aatuire Mũriũ wake Mũthamaki mwerũ wa thĩ, na akĩmwatha ũũ: “Thiĩ ũgĩtooranagia gatagatĩ-inĩ ga thũ ciaku.” (Luka 21:24; Thaburi 110:2) Kristo nĩ aahũthĩrire hinya wake kũingata Shaitani kũrĩa igũrũ na akĩmũharũrũkia gũkũ thĩ. Nĩ ũndũ wa kũmenya ihinda rĩake no inini, Mũcukani erekagĩria marakara make harĩ Akristiano aitĩrĩrie maguta na arĩa mamanyitaga mbaru. (Kũguũrĩrio 12:9, 17) Maumĩrĩro ma tharĩkĩro icio nyingĩ cia arĩa marũaga na Ngai makoretwo marĩ marĩkũ?
Kũmaatha Maũndũ ma Bata Maandĩko-inĩ
it-1 524 kĩb. 2
Kĩrĩkanĩro
Kĩrĩkanĩro gĩa Gũtuĩka Mũthĩnjĩri-Ngai o ta Melikisedeki. Kĩrĩkanĩro kĩu kĩgwetetwo thĩinĩ wa Thaburi 110:4, na mwandĩki wa ibuku rĩa Ahibirania nĩ aagwetire ũndũ ũcio akĩaria ũhoro wĩgiĩ Kristo thĩinĩ wa Ahibirania 7:1-3, 15-17. Nĩ kĩrĩkanĩro Jehova maarĩkanĩire na Jesu Kristo tu. Kwahoteka kĩrĩkanĩro kĩu nĩkĩo Jesu aaragia ũhoro wakĩo rĩrĩa aarĩkanĩire kĩrĩkanĩro gĩa ũthamaki hamwe na arũmĩrĩri ake. (Lu 22:29) Kũgerera mwĩhĩtwa wa Jehova, Jesu Kristo Mũriũ wa Ngai wa kĩĩroho, nĩ angĩgatuĩka mũthĩnjĩri-Ngai o ta ũrĩa Melikisedeki aatariĩ. Melikisedeki aarĩ mũthamaki na mũthĩnjĩri-Ngai wa Ngai gũkũ thĩ. Jesu Kristo angĩgatuĩka Mũthamaki na Mũthĩnjĩri-Ngai Mũnene kũrĩa igũrũ no ti gũkũ thĩ. Aaheirũo mawĩra macio merĩ rĩrĩa aambatire igũrũ. (Ahi 6:20; 7:26, 28; 8:1) Kĩrĩkanĩro kĩu gĩgũtũũra tene na tene, tondũ Jesu egũtũũra arĩ Mũthamaki na Mũthĩnjĩri-Ngai Ũrĩa Mũnene agĩtongorio nĩ Jehova tene na tene.—Ahi 7:3.
DICEMBA 2-8
MŨTHITHŨ KUUMA KIUGO-INĨ KĨA NGAI THABURI 113-118
Hihi Tũngĩrĩha Jehova na Kĩĩ?
w01 1/1 11 kĩb. 13
Reke Wendo Ũgwĩkĩre Hinya
13 Ciugo cia Jesu ironania wega atĩ mũndũ wa mbere ũrĩa twagĩrĩirũo kwenda nĩ Jehova. O na kũrĩ ũguo, tũticiaragwo tũrĩ na wendo mũrikĩru harĩ Jehova. Tũbataraga gũthiĩ tũkĩũkũragia. Rĩrĩa twaiguire rĩa mbere ũhoro ũmwĩgiĩ, ũhoro ũcio nĩ watũgucĩrĩirie harĩ we. O kahora, nĩ twerutire ũrĩa aathondekire thĩ nĩguo ĩtũũrũo nĩ andũ. (Kĩambĩrĩria 2:5-23) Nĩ twĩrutĩte ũrĩa aahiũranirie na andũ rĩrĩa mehia maaingĩrire thĩinĩ wa thĩ, akĩoya makinya ma kũmakũũra handũ ha kũmaniina. (Kĩambĩrĩria 3:1-5, 15) Nĩ aarũmbũirie arĩa ehokeku, na mũthia-inĩ akĩruta Mũrũ wake wa mũmwe nĩguo tuoherũo mehia. (Johana 3:16, 36) Gũthiĩ tũkĩmenyaga maũndũ macio nĩ gwatũmire wendo witũ harĩ Jehova ũkũre. (Isaia 25:1) Mũthamaki Daudi aaugire atĩ nĩ eendete Jehova nĩ ũndũ wa ũrĩa aamũrũmbũyagia. (Thaburi 116:1-9) Mahinda-inĩ maya, Jehova nĩ atũrũmbũyagia, agatũtongoria, agatwĩkĩra hinya, na agatũũmĩrĩria. O ũrĩa tũrathiĩ na mbere kwĩruta ũhoro ũmwĩgiĩ, noguo wendo witũ harĩ we ũkũraga.—Thaburi 31:23; Zefania 3:17; Aroma 8:28.
w09 7/15 29 kĩb. 4-5
Amũkagĩra Ũteithio ũrĩ na Ngatho, na Ũheanage na Ngoro Yothe
Mwandĩki wa Thaburi eeyũririe ũũ: “Hihi ngũrĩha Jehova na kĩĩ tondũ wa maũndũ marĩa mothe mega anjĩkĩire?” (Thab. 116:12) Nĩ maũndũ marĩkũ mega aamwĩkĩire? Jehova nĩ aamũteithĩtie hĩndĩ ĩrĩa aarĩ na “mĩtangĩko na kĩeha.” Makĩria ma ũguo, Jehova nĩ aamũhonoketie “kuuma harĩ gĩkuũ.” Kwoguo nĩ aaiguaga akĩenda ‘kũrĩha’ Jehova. Mwandĩki ũcio wa Thaburi angĩekire atĩa? Aaugire: “Nĩ ngũhingĩria Jehova mĩĩhĩtwa yakwa.” (Thab. 116:3, 4, 8, 10-14) Nĩ aatuire itua rĩa kũhingia ciĩranĩro iria ciothe eerĩire Jehova, na gwĩka maũndũ mothe marĩa eerĩgagĩrĩra eke.
O nawe no ũhote gwĩka ũguo. Atĩa? Na njĩra ya gũtũũra kũringana na mawatho ma Ngai na ithimi ciake hĩndĩ ciothe ũtũũro-inĩ waku. Kwoguo tigagĩrĩra atĩ ũthathaiya wa Jehova nĩguo ũndũ ũrĩa wa bata makĩria ũtũũro-inĩ waku, na ũrekage roho wa Ngai ũgũtongoragie maũndũ-inĩ marĩa mothe ũreka. (Koh. 12:13; Gal. 5:16-18) Ũrĩa kũrĩ nĩ atĩ, ndũngĩhota kũrĩha Jehova biũ nĩ ũndũ wa maũndũ marĩa mothe agwĩkĩire. O na kũrĩ ũguo, nĩ ‘ũkenagia ngoro ya Jehova,’ rĩrĩa ona ũkĩĩrutanĩria na ngoro yaku yothe ũtungata-inĩ wake. (Thim. 27:11) Nĩ mweke wa mwanya gũkenia Jehova na njĩra ta ĩyo!
Kũmaatha Maũndũ ma Bata Maandĩko-inĩ
Ciũria Kuuma Kũrĩ Athomi
Mwandĩki ũmwe wa Thaburi aatongoririo nĩ roho mũtheru kũina ũũ: “Gĩkuũ kĩa andũ ake arĩa ehokeku nĩ kĩa goro mũno maitho-inĩ ma Jehova.” (Thab. 116:15) Muoyo wa mũthathaiya o wothe wa ma wa Jehova nĩ wa bata mũno harĩ we. O na kũrĩ ũguo, ciugo icio cia Thaburi 116 itiaragia o ũhoro wa gĩkuũ kĩa mũndũ ũmwe.
Mũndũ akĩruta mĩario ya mathiko ya Mũkristiano, ti wega kũhũthĩra ciugo cia Thaburi 116:15 kwaria ũhoro wĩgiĩ mũndũ ũcio ũkuĩte, o na angĩkorũo akuĩte arĩ ndungata njĩhokeku ya Jehova. Nĩkĩ? Tondũ ciugo icio cia Thaburi itiaragia o ũhoro wa mũndũ ũmwe. Cionanagia atĩ Ngai onaga gĩkuũ kĩa andũ ake ehokeku marĩ gĩkundi kĩrĩ kĩa goro mũno, ũũ atĩ ndangĩtĩkĩria ũndũ ta ũcio wĩkĩke.—Rora Thaburi 72:14; 116:8.
DICEMBA 9-15
MŨTHITHŨ KUUMA KIUGO-INĨ KĨA NGAI THABURI 119:1-56
“Mũndũ Mwĩthĩ-rĩ, Angĩtheria Mĩthiĩre Yake Atĩa?”
w87 11/1 15 10
Nĩ Wĩrutanagĩria Gũikara Ũrĩ Mũtheru Maũndũ-inĩ Mothe?
10 Thĩinĩ wa Aefeso 5:5 Paulo aaheanire mũkaana ũyũ: “Nĩ gũkorũo nĩ mũĩ ũndũ ũyũ, na mũkaũmenya inyuĩ ene, atĩ gũtirĩ mũndũ o na ũrĩkũ wĩingĩragia ngomanio-inĩ itagĩrĩire kana mũndũ ũtarĩ mũtheru kana mũndũ mũkoroku, ũguo nĩ kuuga mũhoi mĩhianano, ũrĩ na igai o na rĩrĩkũ thĩinĩ wa Ũthamaki wa Kristo na wa Ngai.” O na kũrĩ ũguo, Akristiano ngiri nyingĩ o mwaka nĩ maheagwo mũkaana kana makeherio kĩũngano-ini, nĩ ũndũ wa ‘kwĩhĩria mĩĩrĩ yao,’ ũguo nĩ kuuga kwĩingĩria ngomanio-inĩ itagĩrĩire. (1 Akorintho 6:18) Kaingĩ ũndũ ũcio ũhaanĩkaga nĩ ũndũ wa kwaga “kwĩgitĩra kũringana na kiugo [kĩa Ngai].” (Thaburi 119:9) Kwa ngerekano, ariũ a Ithe witũ aingĩ nĩ magaga kwĩmenyerera kĩĩmĩtugo rĩrĩa mathiĩ kũndũ gwĩkenia. Ihinda-inĩ rĩu, handũ ha kũhũthĩra mahinda na arata ega, mahũthagĩra mahinda na andũ matendete Jehova. Magĩciria atĩ acio nĩ andũ ega mũno, Akristiano amwe mekoraga meingĩrĩtie maũndũ-inĩ matarĩ mega. Angĩ nao nĩ magĩaga na ũrata wa hakuhĩ mũno na arĩa marutaga wĩra nao. Mũthuri ũmwe wa kĩũngano, aagĩire na ũrata wa hakuhĩ mũno na mũtumia ũmwe maarutithanagia wĩra nake, nginya agĩtiganĩria famĩlĩ yake na makĩambĩrĩria gũikarania na mũtumia ũcio, na kwoguo akĩeherio kĩũngano-inĩ. Bibilia ndĩhĩtagia rĩrĩa ĩkuuga “thiritũ njũru nĩ ithũkagia mĩtugo mĩega.”—1 Akorintho 15:33.
w06 6/15 25 kĩb. 1
“Nĩ Nyendete Iririkania Ciaku”
JEHOVA nĩ aheaga andũ ake iririkania nĩguo amateithie kũhiũrania na mathĩna mahinda-inĩ maya maritũ. Imwe cia iririkania icio tũcionaga hĩndĩ ya wĩruti wa Bibilia wa mũndũ kĩũmbe, rĩrĩa tũrarutwo mĩcemanio-inĩ ya kĩũngano, kana aarĩ na ariũ a Ithe witũ makĩruta macokio mao. Maũndũ maingĩ marĩa tũthomaga kana tũkaigua mĩcemanio-inĩ matikoragwo marĩ mageni harĩ ithuĩ. Kaingĩ ũkoraga twanathoma ũhoro ũcio mbere ĩyo. No tondũ nĩ tũriganagĩrũo maita maingĩ, nĩ tũbataraga gũikara tũkĩririkanagio ũhoro wĩgiĩ mĩoroto, mawatho, na motaaro ma Jehova. Nĩ twagĩrĩirũo gũkorũo na ngatho nĩ ũndũ wa iririkania cia Ngai. Nĩ itwĩkĩraga ngoro na njĩra ya gũtũteithia kũiga meciria maitũ harĩ itũmi iria ciatũmire twende gũikaraga mũtũũrĩre wa gũtungatĩra Ngai. Nĩkĩo mwandĩki wa Thaburi aainĩire Jehova ũũ: “Nĩ nyendete iririkania ciaku.”—Thaburi 119:24.
w10 4/15 20 kĩb. 2
Hũgũra Maitho Maku Kuuma Harĩ Maũndũ Matarĩ Kĩene!
2 Maũndũ marĩa twĩroragĩra no matũthũkie. Maũndũ marĩa tuonaga na tũgeciria nĩ matũhutagia na njĩra nene mũno ũũ atĩ no twambĩrĩrie kwĩrirĩria maũndũ macio ngoro-inĩ citũ. Na tondũ tũratũũra thĩinĩ wa thĩ ĩiyũire andũ mendete kũhingia merirĩria mao ma mwĩyendo, ĩrĩa ĩtongoragio nĩ Shaitani ũrĩa Mũcukani, no tũhatĩkwo kwĩrorera mbica njũru, kana gũthikĩrĩria ndeto cia maheeni iria ingĩtũma tũtiganĩrie Jehova o na tũngĩciĩrorera o hanini tu. (1 Joh. 5:19) Nĩkĩo mwandĩki wa Thaburi aathaithire Ngai ũũ: “Hũgũra maitho makwa matige kũrora ũndũ wa tũhũ; ndũũria muoyo njĩra-inĩ yaku.”—Thb 119:37.
Kũmaatha Maũndũ ma Bata Maandĩko-inĩ
w05 4/15 10 kĩb. 2
Wĩhokage Kiugo kĩa Jehova
2 Ũndũ ũrĩa mũnene warĩrĩirio nĩ Thaburi ya 119, nĩ bata wa kiugo kĩa Ngai kana ndũmĩrĩri yake. Mwandĩki wayo aamĩandĩkire kũringana na ũrĩa ndemwa ciarũmanĩrĩire, hihi nĩgetha andũ mahote kũririkana rwĩmbo rũu. Thaburi ĩyo ĩkoragwo na mĩhari 176, na yothe ĩbangĩtwo kũringana na ũrĩa ndemwa cia Kĩhibirania irũmanĩrĩire. Rũthiomi-inĩ rwa Kĩhibirania gĩa tene, ibungo ciothe 22 cia thaburi ĩyo, ikoragwo na mĩhari ĩnana ĩrĩa yambagĩrĩria na ndemwa ĩhaanaine. Thaburi ĩyo yaragĩrĩria kiugo kĩa Ngai, watho, iririkania, njĩra, mawatho, maathani, matuĩro ma ciira, na uuge wa Ngai. Thĩinĩ wa gĩcunjĩ gĩkĩ na kĩrĩa kĩrũmĩrĩire, Thaburi ya 119 ĩkwarĩrĩrio kũringana na ũtaũri ũrĩa wagĩrĩire wa maandĩko ma Kĩhibirania ma Bibilia. Gwĩcũrania ũhoro wa maũndũ marĩa ndungata cia Jehova cia tene, na cia mahinda maya icemanĩtie namo, no gũtũme tuongerere ngatho citũ harĩ rwĩmbo rũu rwandĩkirũo rũtongoretio nĩ roho wa Ngai na gũtũme twende o na makĩria Kiugo kĩa Ngai Bibilia.
DICEMBA 16-22
MŨTHITHŨ KUUMA KIUGO-INĨ KĨA NGAI THABURI 119:57-120
Ũrĩa Ũngĩkirĩrĩria Moritũ
w06 6/15 20 kĩb. 2
“Nĩ Nyendete Watho waku Mũno”
2 No wĩyũrie kĩũria gĩkĩ: “Watho wa Ngai womagĩrĩria mwandĩki wa Thaburi na njĩra ĩrĩkũ?” Ũndũ ũrĩa wamũteithagia nĩ kũririkana atĩ Jehova nĩ amwendete. Kũmenya maũndũ mega marĩa maarĩ watho-inĩ ũcio nĩ kwamũrehagĩra gĩkeno, o na gũtuĩka nĩ aarĩ na moritũ marĩa maarehagwo nĩ arĩa maamũkararagia. Nĩ aamenyaga atĩ Jehova nĩ aamũrũmbũyagia wega. Makĩria ma ũguo, kũrũmĩrĩra ũtongoria ũrĩa ũrĩ watho-inĩ wa Ngai, nĩ gwatũmire mwandĩki wa Thaburi akorũo arĩ mũũgĩ gũkira thũ ciake, na nginya gũkĩmũtũũria muoyo. Gwathĩkĩra watho ũcio nĩ kwamũreheire thayũ na gũgĩtũma agĩe na thamiri njega.—Thaburi 119:1, 9, 65, 93, 98, 165.
w00 12/1 14 kĩb. 3
Hihi nĩ Wendete Iririkania cia Jehova Mũno?
3 Mwandĩki wa Thaburi nĩ eendete iririkania cia Jehova mũno. Aaugire ũũ: “Nĩ hiũhaga na ndiceragĩrũo gwathĩkĩra maathani maku. Mĩkwa ya andũ arĩa aganu nĩ ĩndigicagĩria, ĩndĩ ndiriganagĩrũo nĩ watho waku.” (Thaburi 119:60, 61) Iririkania cia Jehova nĩ itũteithagia gũkirĩrĩria rĩrĩa tũranyarirũo tondũ nĩ tũkoragwo na ma atĩ Ithe witũ wa igũrũ no atinie mĩkwa ya gũtũgirĩrĩria ĩrĩa tuohagwo nĩ thũ citũ. Ihinda-inĩ rĩrĩa rĩagĩrĩire nĩ atuohoraga kuumana na mĩhĩnga ta ĩyo nĩguo tũthiĩ na mbere kũhunjia ũhoro ũrĩa mwega wa Ũthamaki.—Mariko 13:10.
w06 9/1 14 kĩb. 4
Matemo Kuuma Ibuku rĩa Gatano rĩa Thaburi
119:71—Nĩ ũndũ ũrĩkũ mwega ũngiumana na kũnyamarĩka? Moritũ no matũrute kwĩhoka Jehova makĩria, kũmũhoya tũtegũtigithĩria, kwĩruta Bibilia na kĩyo makĩria na kũhũthĩra maũndũ marĩa kiugĩte. Makĩria ma ũguo, ũrĩa tũhiũranagia na mathĩna no kũguũrie maũndũ marĩ tũngĩbatara kũrũnga harĩ ũmũndũ witũ. Mathĩna matingĩtũma tũrakare, tũngĩreka mathondeke ũmũndũ witũ.
Kũmaatha Maũndũ ma Bata Maandĩko-inĩ
w06 9/1 14 kĩb. 5
Matemo Kuuma Ibuku rĩa Gatano rĩa Thaburi
119:96—Ciugo “ũkinyanĩru o wothe nĩ ũrĩ mĩhaka” ciugĩte atĩa? Mwandĩki wa Thaburi aaragia ũhoro wa ũkinyanĩru kũringana na muonere wa mũndũ. No kũhoteke eendaga kuonania atĩ muonere wa mũndũ ũhoro-inĩ wĩgiĩ ũkinyanĩru nĩ ũrĩ mĩhaka. Ngũrani na ũguo, rĩathani rĩa Ngai rĩtirĩ mĩhaka ta ĩyo. Ũtongoria warĩo ũhũthĩkaga maũndũ-inĩ mothe ma ũtũũro witũ. Nĩkĩo Bibilia yugaga ũũ: “Nĩ nyonete atĩ ũkinyanĩru o wothe nĩ ũrĩ mĩhaka, no rĩathani rĩaku rĩtirĩ mĩhaka.”
DICEMBA 23-29
MŨTHITHŨ KUUMA KIUGO-INĨ KĨA NGAI THABURI 119:121-176
Ũrĩa Ũngĩĩthema Kwĩrehera Ruo rwa Ngoro
w93 4/15 17 kĩb. 12
Andũ Ethĩ—Nĩ Maũndũ Marĩkũ Mũthingataga?
12 No mũhaka ũmene na ũthũũre ũndũ ũrĩa mũũru. (Thaburi 97:10) Ũngĩhota atĩa gũthũũra ũndũ ũrĩa ũngĩoneka ta wĩ mwega kana wa gwĩkenia? Na njĩra ya gwĩciria ũhoro wa maumĩrĩro. “Mũtikahĩtithio: Ngai ti wa kũnyũrũrio. Nĩ gũkorũo kĩrĩa gĩothe mũndũ arahanda, kĩu nokĩo akaagetha; tondũ mũndũ ũrĩa ũrahanda atongoretio nĩ mwĩrĩ akaagetha kũbutha kuumana na mwĩrĩ wake, no ũrĩa ũrahanda atongoretio nĩ roho akaagetha muoyo wa tene na tene kuumana na roho.” (Agalatia 6:7, 8) Rĩrĩa wagerio wĩke ũndũ wa gwĩkenia ũtarĩ mwega, wĩcũranagie maumĩrĩro marĩa moru mũno, na nĩmo gũtuurithia Jehova Ngai. (Ringithania Thaburi 78:41.) Ningĩ wĩciragie ũhoro wa maumĩrĩro mangĩ ta kũgĩa nda ĩtabangĩirũo, kana kũgĩa mũrimũ ta wa mũkingo. Wĩcirie ũrĩa ũngĩkua ngoro na ũigue wĩmenete. Ningĩ no gũkorũo na maumĩrĩro ma ihinda iraihu. Mũtumia ũmwe Mũkristiano aaugire: “Twĩna mũthuri wakwa o mũndũ nĩ eeingĩrĩtie ngomanio-inĩ itagĩrĩire tũtanahikania. O na gũtuĩka ũmũthĩ ũyũ ithuerĩ tũrĩ Akristiano, mũtũũrĩre ũcio wa hau kabere nĩ ũtũmaga twage kũiguithania, na ũgatũma tũiguanĩre ũiru thĩinĩ wa kĩhiko gitũ.” Ningĩ ndũkariganĩrũo atĩ no ũũrũo nĩ mĩeke ya ũtungata, kana weherio kĩũngano-inĩ gĩa Gĩkristiano. (1 Akorintho 5:9-13) Hihi nĩ ũkuona ta kũrĩ ũndũ o wothe wa gwĩkenia kwa ihinda inini, ũngĩkorũo ũrĩ mwega angĩkorũo ũgũkũrehera moimĩrĩro ta macio?
DICEMBA 30–JANUARĨ 5
MŨTHITHŨ KUUMA KIUGO-INĨ KĨA NGAI THABURI 120-126
Maahandire na Maithori, no Makĩgetha na Gĩkeno
Ngai nĩ Arathimaga Arĩa Mamũheaga Rũgooco
10 Rĩrĩa twatuĩka arutwo a Jesu, tũkoragwo tũkĩrũa na Shaitani. Jakubu 4:7 ĩtwĩrĩire ũũ: “Reganagai na Mũcukani, nake nĩ ekũmũũrĩra.” No ti kuuga atĩ gwĩka ũguo nĩ ũndũ mũhũthũ. Gũtungatĩra Ngai nĩ kũbataraga kĩyo kĩnene. (Luka 13:24) No Bibilia ĩtwĩrĩire ũũ thĩinĩ wa Thaburi 126:5: “Arĩa mahandaga mbeũ na maithori makaagetha makĩanagĩrĩra nĩ gũkena.” Kwoguo, tũtungatagĩra Ngai ũrĩ ngatho. Nĩ “aheaga arĩa mamũcaragia na kĩyo ngerenwa” na nĩ arathimaga arĩa mamũheaga rũgooco.—Ahibirania 11:6.
w01 7/15 18-19 kĩb. 13-14
Thiĩ na Mbere Wĩra-inĩ wa Magetha!
13 Ciugo cia Thaburi 126:5, 6 nĩ ciũmagĩrĩria mũno arĩa marutaga wĩra wa Ngai wa magetha, na makĩria arĩa makoragwo makĩnyarirũo. Ciugaga ũũ: “Arĩa mahandaga mbeũ na maithori makaagetha makĩanagĩrĩra nĩ gũkena. Mũndũ ũrĩa uumagaraga, o na akĩrĩraga, akuuĩte mũhuko wake wa mbeũ, akaahũndũka akĩanagĩrĩra nĩ gũkena, akuuĩte itĩa ciake.” Ciugo icio cia mwandĩki wa Thaburi ciĩgiĩ kũhanda na kũgetha, cionanagia ũrĩa Jehova aarũmbũirie na akĩrathima arĩa maacokire kuuma ithamĩrio Babuloni. Nĩ maakenire mũno rĩrĩa maarekereirio, no no kũhoteke nĩ maarĩraga makĩhanda mbeũ tĩri-inĩ ũcio ũtaarĩmĩtwo mĩaka 70 ĩrĩa maarĩ ithamĩrio. O na kũrĩ ũguo, arĩa maathiire na mbere na wĩra wa kũhanda na gwaka, nĩ maakeneire maciaro ma wĩra wao na makĩigua maiganĩire.
14 No tũrĩre rĩrĩa tũracemania na magerio kana rĩrĩa Akristiano arĩa angĩ maranyamarĩka nĩ ũndũ wa ũthingu. (1 Petero 3:14) Kĩambĩrĩria-inĩ twĩ wĩra-inĩ wa magetha, no tũgĩe na ihinda iritũ nĩ ũndũ wa kuona ta tũtarĩ na maumĩrĩro mega ũtungata-inĩ. No twathiĩ na mbere kũhanda na gũitĩrĩria maĩ, Ngai nĩ egũkũria o na gũkĩra ũrĩa tũngĩĩrĩgĩrĩra. (1 Akorintho 3:6) Ũndũ ũcio nĩ wonekaga wega kuumana na maumĩrĩro marĩa tũkoragwo namo nĩ ũndũ wa kũheana Bibilia na mabuku maitũ.