Mabuku Marĩa Magwetetwo Thĩinĩ wa “Kabuku ka Mũcemanio wa Ũtũũro na Ũtungata”

Mabuku Marĩa Magwetetwo Thĩinĩ wa Kabuku ka Mũcemanio wa Ũtũũro na Ũtungata

SEPTEMBA 2-8

MŨTHITHŨ KUUMA KIUGO-INĨ KĨA NGAI THABURI 79-81

Kũmaatha Maũndũ ma Bata Maandĩko-inĩ

it-2 111

Jusufu

Ũrĩa Rĩĩtwa Jusufu Rĩatũũgĩririo. Nĩ ũndũ wa ũrĩa Jusufu aatĩĩkĩte gatagatĩ-inĩ ka ariũ a Jakubu, warĩ ũndũ mwagĩrĩru rĩmwe kũhũthĩra rĩĩtwa rĩake kũrũgamĩrĩra mĩhĩrĩga yothe ya Isiraeli, (Thb 80:1) kana mĩhĩrĩga ĩrĩa yacokire gũtuĩka ũthamaki wa mwena wa rũgongo. (Thb 78:67; Am 5:6, 15; 6:6) Rĩĩtwa rĩake ningĩ nĩ rĩonekaga morathi-inĩ ma Bibilia. Thĩinĩ wa kĩoneki kĩa ũrathi kĩrĩa Ezekieli oonire, igai rĩa Jusufu rĩarĩ icunjĩ igĩrĩ (Ezk 47:13), na kĩhingo kĩmwe kĩa itũũra rĩrĩa rĩtagwo “Jehova Arĩ Kuo” kĩarĩ na rĩĩtwa Jusufu (Ezk 48:32, 35). Na ũhoro-inĩ wĩgiĩ kũnyitithanio kwa andũ a Jehova, ũrathi ũcio wonanĩtie atĩ Jusufu nĩwe mũtongoria wa gĩcunjĩ kĩmwe kĩa rũrĩrĩ nake Juda nĩwe mũtongoria wa gĩcunjĩ kĩu kĩngĩ. (Ezk 37:15-26) Ũrathi wa Obadia woonanĩtie atĩ “nyũmba ya Jusufu” nĩ ĩngĩkanyita itemi harĩ kwananga “nyũmba ya Esau” (Ob 18), naguo ũrathi wa Zekaria woonanĩtie atĩ Jehova nĩ angĩkahonokia “nyũmba ya Jusufu.” (Zek 10:6) Marĩĩtwa-inĩ ma mĩhĩrĩga ya Aisiraeli a kĩĩroho, Jusufu nĩwe ũgwetetwo handũ ha Efiraimu.—Kũg 7:8.

Gũkorũo atĩ Jusufu nĩ agwetetwo thĩinĩ wa Kũguũrĩrio 7:8 kũronania atĩ ũrathi ũrĩa Jakubu aarathire arĩ hakuhĩ gũkua nĩ ũngĩkahinga harĩ Aisiraeli a kĩĩroho. Nĩkĩo Bibilia yugaga atĩ Ũrĩa ũrĩ Hinya wa Jakubu, Jehova Ngai, nĩ aaheanire Kristo Jesu arĩ we Mũrĩithi ũrĩa Mwega, ũrĩa warutire muoyo wake nĩ ũndũ wa “ngʼondu.” (Joh 10:11-16) Ningĩ Kristo Jesu nĩwe ihiga rĩa mũthingi rĩa kona rĩrĩa rĩnyitĩrĩire hekarũ ya Ngai ĩrĩa ĩkoragwo na Aisiraeli a kĩĩroho. (Ef 2:20-22; 1Pe 2:4-6) Na Mũrĩithi ũcio o we wĩtĩtwo Ihiga, arĩ hamwe na Ngai Mwene-Hinya-Wothe.—Joh 1:1-3; Atũ 7:56; Ahi 10:12; ringithania Kĩa 49:24, 25.

SEPTEMBA 9-15

MŨTHITHŨ KUUMA KIUGO-INĨ KĨA NGAI THABURI 82-84

Kenagĩra Mĩeke Ĩrĩa wĩ Nayo

w08 7/15 30 kĩb. 3-4

Ĩka Maũndũ Marĩa Ũngĩhota, Nĩguo Ũkorũo na Gĩkeno

No tũremwo gwĩka maũndũ maingĩ ũtungata-inĩ wa Jehova nĩ ũndũ wa ũkũrũ kana mathĩna ma mwĩrĩ. Angĩkorũo wĩ mũciari, no gũkorũo wonaga ta ũtagunĩkaga mũno kuumana na wĩruti waku kĩũmbe kana mĩcemanio ya Gĩkristiano tondũ ũhũthagĩra mahinda maku maingĩ na hinya kũhangʼĩra ciana ciaku. No rĩrĩ, rĩmwe gwĩciria mũno ũhoro wa maũndũ marĩa ũtarahota kũhingia no gũtũme wage kuona maũndũ marĩa ũngĩhota kũhingia.

Mĩaka ngiri nyingĩ mĩhĩtũku, Mũlawii ũmwe nĩ aagwetire wendi aarĩ naguo atangĩahotire kũhingia. Aarĩ na mweke wa gũtungataga hekarũ-inĩ ihinda rĩa ciumia igĩrĩ o mwaka. No nĩ aagwetire wendi wake wa gũikaraga hakuhĩ na kĩgongona hĩndĩ ciothe, na ũcio warĩ ũndũ mwega. (Thab. 84:1-3) Nĩ kĩĩ kĩamũteithirie kũiganĩra? Nĩ oonire atĩ gũkorũo nja-inĩ cia hekarũ o na mũthenya ũmwe tu warĩ mweke wa mwanya. (Thab. 84:4, 5, 10) O na ithuĩ, handũ ha gwĩciria mũno maũndũ marĩa tũtarahota, twagĩrĩirũo kũrora maũndũ marĩa tũngĩhota na tũkenere mĩeke ĩrĩa twĩ nayo.

Kũmaatha Maũndũ ma Bata Maandĩko-inĩ

it-1 816

Mwana Ũtarĩ Ithe

Tondũ warĩ ũndũ mũhũthũ kwaga gũtindanĩra na ciana icio ciakuĩrĩirũo na itangĩahotire gwĩtetera, Jehova aahũthĩrire ciugo “mwana ũtarĩ ithe” agĩtaarĩria ũrĩa Aisiraeli maarĩ athingu kana ũrĩa maagĩte ũthingu. Rĩrĩa rũrĩrĩ rũu rwathiaga na mbere wega kĩĩroho, mwana ũtarĩ ithe nĩ aarũmbũyagio. Rĩrĩa gũtaarĩ na kĩhooto thĩinĩ wa bũrũri, mwana ũtarĩ ithe nĩ aatiganagĩrio, na ũndũ ũcio woonanagia atĩ rũrĩrĩ rũu rwarĩ na thĩna kĩĩroho. (Thb 82:3; 94:6; Isa 1:17, 23; Je 7:5-7; 22:3; Ezk 22:7; Zek 7:9-11; Mal 3:5) Jehova aaugĩte atĩ mũndũ o wothe ũngĩahinyĩrĩirie mwana ũtarĩ ithe nĩ angĩanyitirũo nĩ kĩrumi. (Gũc 27:19; Isa 10:1, 2) Jehova aaugire atĩ nĩwe Mũmagitĩri (Thi 23:10, 11), Mũteithia wao (Thb 10:14), na Ithe wao. (Thb 68:5) Nĩ atuaga ciira wao (Gũc 10:17, 18), akamonia tha (Ho 14:3), akamahe mabataro mao (Thb 146:9), na akamatũũria muoyo.—Je 49:11.

Ũndũ ũmwe ũmenyithanagia Akristiano a ma nĩ ũrĩa marũmbũyagia arĩa makuĩrĩirũo nĩ athuri ao kana aciari ao. Mũtũmwo Jakubu aandĩkĩire Akristiano akĩmeera ũũ: “Ũthathaiya ũrĩa mũtheru na ũtarĩ thahu kũringana na mawoni ma Ngai o we Ithe witũ nĩ ũyũ: kũrũmbũyagia ciana cia ndigwa na atumia a ndigwa mathĩna-inĩ mao, na mũndũ gũikaraga atarĩ na kameni kuumana na thĩ ĩno.”—Jak 1:27.

SEPTEMBA 16-22

MŨTHITHŨ KUUMA KIUGO-INĨ KĨA NGAI THABURI 85-87

Kũmaatha Maũndũ ma Bata Maandĩko-inĩ

it-1 1058 kĩb. 5

Ngoro

Gũtungata na “Ngoro Yothe.” Ngoro ĩrĩa ĩhũũraga thakame no nginya ĩkorũo ĩrĩ ngʼima nĩguo ĩrute wĩra wega, no ngoro ya mũhaano no ĩkorũo ĩgayũkanĩte. Daudi aahoire akiuga: “He ngoro ĩtagayũkanĩte nĩguo ndĩtigagĩre rĩĩtwa rĩaku,” kuonania atĩ ngoro ya mũndũ no ĩkorũo ĩgayũkanĩte ũhoro-inĩ wĩgiĩ maũndũ marĩa yendete na marĩa ĩĩtigĩrĩte. (Thb 86:11) Mũndũ ta ũcio no akorũo na “ngoro igĩrĩ,” ũthathaiya wake harĩ Ngai ũgakorũo ũrĩ mũraru. (Thb 119:113; Kũg 3:16) Ningĩ mũndũ no akorũo na “ngoro igĩrĩ” (Kĩhibirania, mũndũ ũrĩ na ngoro na ngoro), akageria gũtungatĩra athani erĩ, kana akaheenania akauga ũndũ mũna no areciria ũndũ ũngĩ. (1Ma 12:33; Thb 12:2, kohoro ka magũrũ-inĩ) Jesu nĩ aamenereirie andũ ta acio a ngoro igĩrĩ akiuga atĩ nĩ hinga.—Mat 15:7, 8.

OKTOMBA 14-20

MŨTHITHŨ KUUMA KIUGO-INĨ KĨA NGAI THABURI 96-99

Kũmaatha Maũndũ ma Bata Maandĩko-inĩ

it-2 994

Rwĩmbo

Ciugo “rwĩmbo rwerũ” nĩ igwetetwo ibuku-inĩ rĩa Thaburi o hamwe na maandĩko-inĩ ma Isaia na mũtũmwo Johana. (Thb 33:3; 40:3; 96:1; 98:1; 144:9; 149:1; Isa 42:10; Kũg 5:9; 14:3) Gũthuthuria ũhoro ũrĩa ũthiũrũrũkĩirie maandĩko marĩa magwetete “rwĩmbo rwerũ” kuonanagia atĩ rwĩmbo rũu rwainagwo thutha wa ũndũ mwerũ gwĩkĩka nĩ ũndũ wa Jehova kũhũthĩra ũnene wake. Thaburi 96:10 ĩkoragwo na ciugo ici: “Jehova nĩ atuĩkĩte Mũthamaki.” Kuonekaga atĩ “rwĩmbo rwerũ” rũrĩa rwainirũo thaburi-inĩ ĩyo, rwainirũo nĩ ũndũ wa Jehova kwararamia wathani wake, o hamwe na ũrĩa ũndũ ũcio wahutirie arĩa marĩ kũrĩa igũrũ na gũkũ thĩ.—Thb 96:11-13; 98:9; Isa 42:10, 13.

OKTOMBA 21-27

MŨTHITHŨ KUUMA KIUGO-INĨ KĨA NGAI THABURI 100-102

Kũmaatha Maũndũ ma Bata Maandĩko-inĩ

it-2 596

Nyoni ya Gakuua-ũrogi

Rĩrĩa nyoni ĩtagwo gakuua-ũrogi yarĩa yahũna, yũmbũkaga ĩgathiĩ kũndũ werũ-inĩ, ĩgaikara ĩthikĩire ta ĩrĩ na kĩeha na ĩtekwĩnyagunyia, ũũ atĩ mũndũ arĩ haraihu no one ta arĩ ihiga rĩa rangi mwerũ. Nyoni ĩyo ĩikaraga ũguo ihinda iraihu, na nĩkĩo mwandĩki wa thaburi eeringithanirie nayo rĩrĩa aataaragĩria kĩeha kĩrĩa aarĩ nakĩo akiuga: “Haana ta nyoni ĩrĩa ĩtagwo gakuua-ũrogi ya werũ-inĩ.” (Thb 102:6) Haha kiugo “werũ-inĩ” gĩtirũgamĩrĩire kũndũ kũũmũ, no nĩ kũndũ kũraihu na kũrĩa andũ maikaraga, hihi matomboya-inĩ. Mahinda-inĩ mamwe ma mwaka, nyoni icio nĩ ikoragwo matomboya-inĩ marĩa marĩ mwena wa rũgongo wa Mũkuru wa Jorodani. Gũkoragwo na mĩthemba ĩtatũ ya nyoni cia gakuua-ũrogi bũrũri-inĩ wa Isiraeli. Mũthemba ũrĩa wonekaga mũno nĩ eastern white pelican. Nayo mĩthemba ya Dalmatian pelican na pink-backed pelican ndĩonekaga maita maingĩ.

Nyoni ĩno yendete kũndũ gũtarĩmagwo, tondũ ĩrĩ kũu ndĩgũthumbũrũo nĩ andũ. Kũu nĩkuo yakaga gĩtara kĩayo, ĩgatũrĩkia tũcui, na ĩkahurũka thutha wa kũnyita thamaki. Nĩ ũndũ wa ũrĩa yendete kũndũ kwĩikarĩtie na gũtiganĩrie, nyoni ĩyo nĩ ĩhũthĩrĩtwo thĩinĩ wa Bibilia kuonania kũndũ gũtiganĩrie. Rĩrĩa Isaia aataaragĩria ũrĩa Edomu kũngĩgatuĩka kũndũ gũtiganĩrie, aarathire atĩ nyoni ya gakuua-ũrogi nĩ ĩngĩkegwatĩra bũrũri ũcio. (Isa 34:11) Zefania aarathire atĩ nyoni ya gakuua-ũrogi nĩ ĩngĩgaikaraga itugĩ-inĩ cia Nineve, kuonania ũrĩa kũngĩkanangwo biũ nginya kwage andũ maraikara kuo.—Zef 2:13, 14.