Ũrĩa Mahoya Mangĩgũteithia
Thutha wa Pamela kũrwara mũrimũ wa kansa, nĩ aathiire gwetha ũteithio wa mandagĩtarĩ. No ningĩ nĩ aahoire Ngai amũhe hinya wa gũkirĩrĩria ũndũ ũcio mũritũ aageragĩra. Hihi kũhoya nĩ kwamũteithirie?
Pamela ooigire ũũ: “Ngĩrigitwo mũrimũ ũcio wa kansa, kaingĩ nĩ ndaiguaga guoya. No ndahoya Jehova Ngai nĩ ndagĩaga na thayũ, na ũndũ ũcio ũkandeithia gwĩciria na njĩra ĩrĩa yagĩrĩire. O na rĩu no ngoragwo na ruo rũnene, no mahoya nĩ mandeithagia hingo ciothe gwĩciria na njĩra ĩrĩa yagĩrĩire. Hĩndĩ ĩrĩa andũ manjũria ũrĩa ndĩraigua ndĩmeeraga, ‘Ndiraigua wega, no ndĩna gĩkeno.’”
Ũrĩa kũrĩ nĩ atĩ, tũtiagĩrĩirũo gweterera nginya rĩrĩa tũgaacemania na ũndũ mũritũ nĩguo twambĩrĩrie kũhoya. Ithuothe nĩ tũcemanagia na moritũ manene na manini, na nĩ tũbataraga ũteithio. Hihi mahoya no matũteithie?
Bibilia yugaga ũũ: “Ikagĩria Jehova mũrigo waku, na nĩ arĩgũtiiragĩrĩra. Gũtirĩ hĩndĩ akaareka mũndũ ũrĩa mũthingu agwe.” (Thaburi 55:22) Na githĩ ciugo icio ti cia gwĩkĩra ngoro? Kwoguo-rĩ, mahoya mangĩgũteithia atĩa? Ũngĩhoya Ngai na njĩra ĩrĩa yagĩrĩire, nĩ arĩkũheaga kĩrĩa ũrabatara nĩguo ũhote kũhiũrania na ũndũ ũrĩa ũragerera.—Rora gathandũkũ “Mahoya Mangĩgũteithia Kũgĩa na Kĩĩ?”