Ũrĩa Tũngĩteithia Arĩa Marĩ na Mathĩna ma Kĩĩmeciria

Ũguo nĩ Kuuga Atĩa?

No tũigue tũritũhĩirũo, mũrata witũ angĩkorũo arĩ na thĩna wa kĩĩmeciria. No no tũmuonie atĩ nĩ tũramũrũmbũiya, tũngĩmũteithia kũhiũrania na thĩna wake wa kĩĩmeciria. Tũngĩka ũguo na njĩra ĩrĩkũ?

Kũhũthĩra Ũtaaro wa Rĩandĩko Rĩu Kũngĩteithia Atĩa?

‘Hiũhaga gũthikĩrĩria.’—JAKUBU 1:19.

Njĩra ĩmwe njega ya gũteithia mũrata ta ũcio nĩ kũmũthikĩrĩria rĩrĩa arenda kwaria. Ndũkaigue atĩ nĩ ũrabatara kũmũcokeria maũndũ-inĩ mothe marĩa ekuuga. Muonie atĩ nĩ ũramũthikĩrĩria, na atĩ nĩ ũramwĩciria. Wĩrutanĩrie gũtaũkĩrũo nĩ ũrĩa araigua, na wĩtheme kũmũtuĩra. Ririkana atĩ rĩmwe no auge maũndũ atecirĩtie, na thutha-inĩ acoke kwĩrira.—Ayubu 6:2, 3.

“Mũũmagĩrĩrie.”—1 ATHESALONIKE 5:14.

Mũrata waku no akorũo agĩtangĩka kana akĩĩyona ta atarĩ kĩene. Ũngĩreka amenye atĩ nĩ ũramũrũmbũiya, no aigue omĩrĩirio na agekĩrũo ngoro, o na angĩkorũo ndũramenya ciugo iria ũngĩmwĩra.

“Mũrata wa ma onanagia wendo hingo ciothe.”—THIMO 17:17.

Wĩrutĩre kũmũteithia. Handũ ha gũtua atĩ nĩ ũĩ ũteithio ũrĩa mũrata waku arabatara, mũrie ũrĩa angĩenda ũmwĩkĩre. Mũrata waku angĩritũhĩrũo gũkwĩra ũteithio ũrĩa angĩenda, geria kũmũgwetera ũndũ mũngĩka hamwe, ta gũthiĩ kũnogoranga magũrũ. Ningĩ no wĩrutĩre gũthiĩ kũmũteithia kũgũra indo, gwĩka ũtheru, kana wĩra ũngĩ o wothe.—Agalatia 6:2.

‘Koragwo na wetereri.’—1 ATHESALONIKE 5:14.

Rĩmwe mũrata waku no akorũo atekwenda kwaria. Reke amenye atĩ nĩ wĩhaarĩirie kũmũthikĩrĩria rĩrĩa rĩothe angĩenda kwaria. Nĩ ũndũ wa mũrimũ wake, mũrata waku no auge kana eke maũndũ mangĩgũtuurithia. Na no age kũhingia maũndũ mũbangĩte nake, kana o na ambĩrĩrie kũrakara na ihenya. Koragwo na wetereri, na ũgeragie gũtaũkĩrũo nĩwe rĩrĩa ũramũteithia.—Thimo 18:24.

Ũteithio Waku no Ũgune Mũrata Waku

“Nĩ ndekaga mũrata wakwa amenye atĩ no arie na niĩ hĩndĩ o yothe. O na angĩkorũo ndirĩ na kĩhonia kĩa mathĩna make, nĩ ndigagĩrĩra atĩ nĩ ndĩrathikĩrĩria maũndũ marĩa arenda kuuga. Rĩmwe ũndũ ũrĩa abataraga no mũndũ wa kũmũthikĩrĩria, na ũndũ ũcio ũgatũma aigue wega.”—Farrah,a ũrĩa mũrata wake akoragwo na mũrimũ wa gũtangĩka na wa depression ũrĩa ũtũmaga aremwo nĩ kũrĩa.

“Mũrata ũmwe wakwa nĩ anyonagia wendo na akanjĩkĩra ngoro mũno. Nĩ aanyitire ũgeni gwake mũciĩ tũrĩanĩre irio hamwe. Nĩ ũndũ wa wendo ũcio aanyonirie nĩ ndahotire kũmwĩra maũndũ marĩa maarĩ ngoro-inĩ yakwa. Ũndũ ũcio nĩ wanjĩkĩrire ngoro mũno.”—Ha-eun, ũrĩa ũkoragwo na mũrimũ wa depression.

“Gũkirĩrĩria nĩ kwa bata mũno. Mũtumia wakwa angĩka kaũndũ kangĩtũma ndakare, nĩ ndĩririkanagia atĩ ndareka ũguo nĩ ũndũ wa kwenda, no nĩ ũndũ wa mũrimũ wake. Ũndũ ũcio nĩ ũndeithagia kwaga kũrakara na ngahota kũmuonia ũcayanĩri makĩria.”—Jacob, ũrĩa mũtumia wake akoragwo na mũrimũ wa depression.

“Mũtumia wakwa akoretwo arĩ ũteithio mũnene harĩ niĩ na nĩ anyũmagĩrĩria. Rĩrĩa ndĩraigua nditũhĩirũo mũno nĩ mĩtangĩko, ndandindĩkagĩrĩria gwĩka ũndũ itarenda gwĩka. Ũguo nĩ kuuga atĩ rĩmwe na rĩmwe o na nĩ eimaga akaga gwĩka ũndũ ũrĩa angĩendire gwĩka. Ũtaana wake na roho wake wa kwĩima nĩ itũmaga akorũo arĩ wa mwanya mũno harĩ niĩ.”—Enrico, ũrĩa ũkoragwo na mũrimũ wa gũtangĩka meciria.