[kuuma ũmotho gũthiĩ ũrĩo] Marcelo, Yomara, na Hiver. O ũmwe wao anyitĩte gĩcunjĩ kĩa Bibilia ya New World Translation ya braille yandĩkĩtwo na rũthiomi rwa Kĩhispania
Nĩ Moonirio Wendo Kĩũngano-inĩ
MWARĨ WA ITHE WITŨ Yomara, na ariũ a nyina Marcelo na Hiver, maikaraga itũũra-inĩ rĩmwe bũrũri-inĩ wa Guatemala. Yomara nĩwe waambĩrĩirie kwĩruta Bibilia na Aira a Jehova, na thutha ũcio ariũ a nyina makĩambĩrĩria kwĩruta o nao. No nĩ kwaumĩrire thĩna tondũ othe atatũ nĩ atumumu na matingĩahotire gũthoma mabuku ma braille. Kwoguo mwarimũ wao wa Bibilia aamathomagĩra ibungo na mĩhari ya Bibilia ya gĩcunjĩ kĩrĩa mareruta.
Ningĩ warĩ ũndũ mũritũ harĩ o gũthiĩ mĩcemanio ya kĩũngano. Ndwarĩ ũndũ mũhũthũ harĩ o gũthiĩ marĩ aiki thabarĩ ya ndagĩka 40 nĩguo makinye Nyũmba-inĩ ya Ũthamaki ĩrĩa yarĩ hakuhĩ nao. No ariũ a Ithe witũ kĩũngano-inĩ kĩao nĩ maamateithagĩrĩria gũthiĩ mĩcemanio yothe. Na rĩrĩa maambĩrĩirie kũheo tũcunjĩ twa arutwo mũcemanio-inĩ wa gatagatĩ-inĩ ga kiumia, ariũ a Ithe witũ nĩ maamateithagĩrĩria kũhaarĩria na kũiga meciria-inĩ maũndũ marĩa mekuuga makĩruta tũcunjĩ twao.
Mweri-inĩ wa Mĩĩ 2019, nĩ kwambĩrĩirio mĩcemanio ya kĩũngano itũũra-inĩ rĩao. Gũkinyĩria hĩndĩ ĩyo, mũrũ wa Ithe witũ ũmwe na mũtumia wake arĩa maarĩ mapainia a hĩndĩ ciothe nĩ maathamĩire itũũra-inĩ rĩu. Mũrũ wa Ithe witũ ũcio na mũtumia wake nĩ maatuire itua rĩa kũruta Yomara na ariũ a nyina gũthoma na kwandĩka braille, o na gũtuĩka mũrũ wa Ithe witũ ũcio na mũtumia wake o nao matioĩ kũhũthĩra braille. Maathiire library ĩmwe nĩguo mone mabuku mangĩamateithirie kũmenya ũhoro wĩgiĩ braille na kwĩruta ũrĩa mangĩteithia andũ angĩ kũmĩhũthĩra.
Marcelo akĩruta macokio hĩndĩ ya mũcemanio wa kĩũngano
Thutha wa mĩeri mĩnini, Yomara na ariũ a nyina nĩ mangĩahotire gũthoma braille na njĩra hũthũ, na ũndũ ũcio nĩ wamateithĩrĩirie gũthiĩ na mbere gũkũra kĩĩroho.a Rĩu Yomara, Marcelo, na Hiver matungataga marĩ mapainia a hĩndĩ ciothe. Ningĩ Marcelo nĩ ndungata ya kĩũngano. Othe nĩ merutanagĩria mũno maũndũ-inĩ ma kĩĩroho o kiumia, na kĩyo kĩao nĩ gĩtũmaga arĩa angĩ o nao merutanĩrie.
Yomara na ariũ a nyina nĩ macokagia ngatho mũno nĩ ũndũ wa ũteithio ũrĩa maheetwo nĩ kĩũngano. Yomara aaugire ũũ: “Kuuma rĩrĩa twacemanirie rĩa mbere na Aira a Jehova, nĩ matuonetie wendo wa ma.” Nake Marcelo akiuga: “Nĩ tũgĩte na arata ega kĩũngano-inĩ gitũ, na tũkagĩa na famĩlĩ ĩrĩ na ũrũmwe ya thĩ yothe.” Yomara na ariũ a nyina nĩ meriragĩria mũno mũthenya ũrĩa makoona thĩ ĩgarũrĩtwo ĩgatuĩka paradiso.—Thab. 37:10, 11; Isa. 35:5.
a Nĩ kũhaarĩrĩirio broshua ĩtagwo Learn to Read Braille ya gũteithia atumumu kana arĩa matarĩ ũhoti mwega wa kuona kwĩruta gũthoma na kwandĩka braille.