Ũndũ Ũngĩka

Tua Maũndũ Marĩa Ũngĩenda Kwambĩrĩria Kwĩruta

Ithuothe tũtikoragwo na mahinda maingĩ ma gwĩka wĩruti wa mũndũ kĩũmbe. Tũngĩhũthĩra wega atĩa mahinda macio manini tũrĩ namo? Ũndũ wa mbere, hũthĩra mahinda ma kũigana harĩ kĩrĩa ũrathoma. No ũgunĩke makĩria ũngĩthomaga na kinyi ũhoro mũnini handũ ha gũthoma ũhoro mũingĩ igũrũ igũrũ.

Ũcoke ũtue nĩ maũndũ marĩkũ ũngĩenda kwambĩrĩria kwĩruta. (Ef. 5:15, 16) Geria gwĩka maũndũ maya:

• Thomaga Bibilia o mũthenya. (Thab. 1:2) No wambagĩrĩrie na gũthoma mĩrango ĩrĩa tũgaĩirũo gũthoma Mũcemanio-inĩ wa Gatagatĩ-inĩ ga Kiumia.

• Haaragĩria Wĩruti wa Mũrangĩri na mũcemanio wa gatagatĩ-inĩ ga kiumia. Koragwo wĩhaarĩirie kũruta macokio.—Thab. 22:22.

• Ningĩ wĩrutanagĩrie kũgunĩka nĩ irio ingĩ cia kĩĩroho, ta gũthoma ngathĩti citũ, kwĩrorera video, na indo ingĩ iria irĩ thĩinĩ wa website ya jw.org.

• Ĩka ũthuthuria wa ũndũ mũna ũrĩa ũngĩenda kũmenya. No wĩke ũthuthuria wĩgiĩ ũndũ mũritũ ũrahiũrania naguo, kĩũria ũngĩkorũo nakĩo, kana ũhoro mũna wa Bibilia ũngĩkorũo ũkĩenda gũtaũkĩrũo nĩguo makĩria. Nĩguo wone maũndũ ũngĩĩruta igũrũ rĩamo, rora gĩcunjĩ gĩa “Tũmaũndũ twa Kwĩruta Bibilia” thĩinĩ wa jw.org/ki.