Ũthĩni

Hihi athĩni no makorũo na gĩkeno?

MAWONI MA ANDŨ

Andũ aingĩ meciragia atĩ gĩkeno na kũiganĩra irehagwo nĩ indo iria mũndũ arĩ nacio, na atĩ ũtũũro wa mũndũ ũgaacagĩra kũringana na mbeca iria arĩ nacio. Tondũ athĩni kaingĩ matikoragwo na gĩthomo kĩiganu, ũrigitani mwega, na maũndũ mangĩ ta macio, monagwo ta matangĩgĩa na gĩkeno kana magaacĩre ũtũũro-inĩ.

ŨRĨA BIBILIA YUGAGA

Bibilia ĩrutanaga atĩ gĩkeno kĩa ma kiumanaga na mũndũ gũkorũo arĩ na ũrata mwega na Ũrĩa wamũmbire, no ti indo kana mbeca iria mũndũ arĩ nacio. Bibilia yugaga ũũ: “Gũkena-rĩ, nĩ arĩa mahũtagĩra maũndũ marĩa ma ũthingu.” (Mathayo 5:6) Andũ arĩa mahũtagĩra maũndũ ma ũthingu, o na marĩ athĩni kana atongu, nĩ mendaga kũmenya mawoni ma Ngai rĩrĩa marenda gwĩka ũndũ mũna na kwoguo nĩ merutaga ma cia Bibilia iria irehaga thayũ wa meciria o hamwe na kĩĩrĩgĩrĩro. Ũndũ ũcio nĩguo ũrehaga gĩkeno kĩa ma.

Andũ arĩa mataũkagĩrũo nĩ ũtaaro wa Bibilia na makaũrũmĩrĩra nĩ mahotaga kũhiũrania na ũthĩni wega makĩria. Kwa ngerekano, ũtaaro wa Bibilia nĩ ũteithagia andũ gwĩthema mĩtugo ĩtagĩrĩire ta kũnyua thigara na kũhũthĩra njohi ũũru. Mĩtugo ta ĩyo nĩ ĩtũmaga mũndũ anange mbeca na rĩmwe o na no ahũthĩre mbeca nyingĩ mũno akĩrigitwo.​—Thimo 20:1; 2 Akorintho 7:1.

Ningĩ Bibilia nĩ yonanagia mathĩna marĩa marehagwo nĩ ũkoroku na kwenda indo cia gũkũ thĩ. (Mariko 4:19; Aefeso 5:3) Ũtaaro wa Bibilia no ũteithie mũndũ gwĩthema gũũtha ciũthi iria ingĩtũma anange mbeca kana “kwĩrirĩria mbia,” ũndũ ũrĩa Bibilia yugaga “nĩ kĩhumo kĩa maũũru ma mĩthemba yothe.” (1 Timotheo 6:10) Bibilia ĩheanaga mũkaana ũyũ: “Muoyo wa mũndũ nduonekaga nĩ ũndũ wa ũrĩa indo ciingĩhĩte iria arĩ nacio.” (Luka 12:15) Na njĩra nguhĩ-rĩ, o na mũndũ angĩkorũo na mbeca nyingĩ atĩa, ndangĩhota kũgũra muoyo. O na kũrĩ ũguo, kũrũmĩrĩra ũtaaro wa Bibilia nĩ kũrehaga gĩkeno na gũgatũma mũndũ agĩe na ũtũũro mũgaacĩru.

O na gũtuĩka ti ũndũ mũhũthũ harĩ andũ arĩa athĩni kuona irio, nguo cia kwĩhumba, kana handũ ha gũikara, no magĩe na gĩkeno mangĩĩruta kũiganĩra, na gwĩkaga wendi wa Ngai hingo ciothe. No mone ũũma wa ciugo cia Bibilia iria ciugaga atĩ, “kĩrathimo kĩa Jehova nĩkĩo kĩrehage ũtonga, na ndarĩ kĩeha onganagĩrĩria nakĩo.”​—Thimo 10:22.

RĨANDĨKO RĨA MŨTHINGI: “Gũkena-rĩ, nĩ arĩa mahũtagĩra maũndũ marĩa ma ũthingu.”​—Mathayo 5:6.

Hihi nĩ kũrĩ hĩndĩ ũthĩni ũgaathira?

ŨRĨA BIBILIA YUGAGA

O na gũtuĩka andũ nĩ maremetwo kũniina ũthĩni, ihinda rĩtarĩ coho Ngai nĩ arĩeheria kĩhumo kĩa ũthĩni​—mwerekera ũrĩa wonanagio nĩ thirikari na andũ arĩa meyendete wa kwaga kũrũmbũiya andũ arĩa angĩ. (Kohelethu 8:9) Mũũmbi witũ nĩ akaanina thirikari cia thĩ tondũ itirũmbũyagia andũ arĩa angĩ. Ũthamaki wake, kana thirikari ya igũrũ, nĩ ũkaahe andũ othe kĩrĩa marabatara hatarĩ mũthutũkanio. Bibilia yonanagia wega atĩ Mũthamaki wa Ũthamaki wa Ngai nĩ akaahingĩria athĩni mabataro mao arĩ na tha. ‘Mũndũ mũthĩni aakaya, nĩ akaamũteithũra. Ũcio ũtarĩ na hinya, o ũcio mwagi-rĩ, nĩ akaamũiguĩra tha; andũ acio athĩni, akĩhonokie mĩoyo yao.’​—Thaburi 72:​12-14.

Thĩ yothe ĩgaatuĩka paradiso na gũkorũo na nyũmba njega cia gũikara na irio cia kũigana andũ othe, naguo ũthĩni ndũkoneka rĩngĩ. Thĩinĩ wa ibuku rĩa Isaia, Ngai eranĩire atĩ andũ ake “nĩmagaaka nyũmba, na macitũũre, na mahande mĩgũnda ya mĩthabibũ, o na marĩage maciaro mayo. . . . Nao andũ akwa arĩa athure nĩmarĩkenagĩra wĩra wa moko mao ihinda iraya.” (Isaia 65:​21, 22) Andũ matikaahiũrania rĩngĩ na mathĩna ma ũtũũro. Handũ ha ũguo, magaakenagĩra “iruga rĩa nyamũ noru” na maũndũ mangĩ mega marĩa Jehova akaamahe.​—Isaia 25:6.

BATA WA KŨMENYA ŨNDŨ ŨCIO

Gwĩcũrania ũhoro wa kĩĩranĩro kĩa Ngai gĩa kũniina ũthĩni thĩinĩ wa thĩ nĩ gũteithagia athĩni kuona atĩ Ngai nĩ amarũmbũyagia, na atĩ mũthia wa mathĩna mao ũrĩ hakuhĩ. Gwĩciria ũhoro wa kĩĩranĩro kĩu no gwĩkĩre mũndũ hinya nĩguo ahote gũtooria moritũ mahinda-inĩ maya.

RĨANDĨKO RĨA MŨTHINGI: ‘Mũndũ mũthĩni aakaya, nĩ akaamũteithũra. Ũcio ũtarĩ na hinya, o ũcio mwagi-rĩ, nĩ akaamũiguĩra tha; andũ acio athĩni, akĩhonokie mĩoyo yao.’​—Thaburi 72:12, 13.