Ũhoro Mwega Harĩ Athĩni

KIUGO KĨA NGAI gĩtwĩraga na ma ũũ: “Mũndũ ũrĩa mwagi ndangĩtũũra o ariganĩire hingo ciothe.” (Thaburi 9:18) Ningĩ Bibilia ĩkĩaria igũrũ rĩgiĩ Mũũmbi witũ yugaga ũũ: “Ũkumbatũragia guoko gwaku, kĩrĩa gĩothe kĩĩ muoyo ũgakĩhũnia kĩrĩa gĩkwenda.” (Thaburi 145:16) Kĩĩrĩgĩrĩro kĩu kĩrĩ thĩinĩ wa Kiugo kĩa Ngai ti kĩroto tu. Ngai Mwene Hinya Wothe no ahote kũniina ũthĩni. Nĩ kĩĩ andũ arĩa athĩni marabatara?

Mũthomi ũmwe wa Afrika wa maũndũ megiĩ wonjoria oigire atĩ, mabũrũri marĩa mathĩni mekũbatara “mũtongoria mũtugi no ũtangĩkararĩka.” Ũguo nĩ ta kuuga atĩ nĩguo ũthĩni ũthire, hekũbatarania mũndũ wĩna ũhoti wa kũrehe ũgarũrũku na ũrĩ na tha cia gwĩka ũguo. Kwoguo no tũkiuge atĩ mũtongoria ũrĩa ũngĩhota kwehereria andũ othe ũthĩni no mũhaka akorũo agĩatha thĩ yothe, tondũ kaingĩ ũthĩni mũnene ũrehagwo nĩ mabũrũri mamwe gũkorũo na indo nyingĩ gũkĩra marĩa mangĩ. Makĩria ma ũguo, mũtongoria ũrĩa ũngĩhota kweheria ũthĩni no mũhaka akorũo na ũhoti wa kũniina mwerekera witũ wa kwĩyenda, ũrĩa ũrehaga ũthĩni. Mũtongoria mwega ta ũcio angiuma kũ?

Ngai aatũmire Jesu arĩ na ũhoro mwega kũrĩ athĩni. Hĩndĩ ĩrĩa Jesu aarũgamire nĩguo athome harĩa haarĩtie ũhoro wa wĩra ũrĩa aaheetwo nĩ Ngai, oigire ũũ: “Roho wa Mwathani arĩ igũrũ rĩakwa, Nĩ ũndũ nĩaanjitĩrĩirie maguta ‘hunjagĩrie arĩa athĩni Ũhoro-ũrĩa-Mwega.”—Luka 4:16-18.

Ũhoro Ũrĩa Mwega nĩ Ũrĩkũ?

Ngai nĩ athuurĩte Jesu atuĩke Mũthamaki. Hatarĩ nganja ũcio nĩ ũhoro mwega. Jesu nowe Mũtongoria ũrĩa ũngĩhota kũniina ũthĩni tondũ (1) agaathana thĩinĩ wa thĩ yothe na arĩ na ũhoti wa kũrehe ũgarũrũku; (2) nĩ aiguagĩra athĩni tha na akaruta arũmĩrĩri ake marũmbũyagie athĩni; na (3) no ahote kũniina kĩrĩa kĩrehaga ũthĩni, mwerekera ũrĩa tũciarĩtwo naguo wa kwĩyenda. Rekei twarĩrĩrie maũndũ macio matatũ megiĩ ũhoro ũrĩa mwega.

1. Wathani wa Jesu harĩ ndũrĩrĩ ciothe Kiugo kĩa Ngai gĩkĩaria ũhoro wa Jesu kiugaga ũũ: “Agĩkĩheo wathani . . . Nĩ getha andũ a nduka ciothe, na a ndũrĩrĩ ciothe, na a mĩario yothe, mamũtungatagĩre.” (Danieli 7:14) Ta hũũra mbica ũrĩa andũ thĩinĩ wa thĩ yothe mangĩgunĩka magĩthamakĩrũo nĩ thirikari ĩmwe! Andũ matingĩgacoka kũrũĩra rĩngĩ indo iria irĩ thĩinĩ wa thĩ. Andũ othe nĩ makagunĩka na njĩra ĩiganaine. Jesu we mwene nĩ onanirie hatarĩ nganja atĩ agaakorũo arĩ Mũtongoria wa thĩ yothe wĩna ũhoti wa kũgarũra maũndũ. Oigire ũũ: “Nĩ’heetwo wathani wothe wa na Igũrũ na wa gũkũ thĩ.”—Mathayo 28:18.

2. Tha cia Jesu harĩ arĩa athĩni Hĩndĩ ĩrĩa yothe aatungatĩire gũkũ thĩ Jesu nĩ aiguagĩra athĩni tha. Kwa ngerekano-rĩ, mũtumia ũmwe wahũthĩrĩte indo ciake ciothe agĩcaria ũrigitani nĩ aahutirie nguo cia Jesu, ehokete kũhonio. Aakoretwo akiura thakame kwa ihinda rĩa mĩaka 12 na hatarĩ nganja aarĩ mũhinyĩrĩrĩku mũno. Kũringana na Watho-rĩ, mũndũ o wothe angĩahutirie nĩ angĩagĩire na thahu. Ĩndĩ Jesu nĩ aamũiguĩrĩire tha. Aamwĩrire ũũ: “Mwarĩ ũyũ, gwĩtĩkia gwaku nĩkuo gwatũma ũhone; thiĩ na ũhoro, ũikare wĩ mũhonu mũrimũ waku.”—Mariko 5:25-34.

Ũrutani wa Jesu ũrĩ na ũhoti wa kũgarũra ngoro cia andũ nĩguo o nao maiguanagĩre tha. Kwa ngerekano-rĩ, ta wĩcirie ũrĩa Jesu aacokeirie mũndũ ũmwe wendaga kũmenya ũrĩa angĩkenia Ngai. Mũndũ ũcio nĩ oĩ atĩ Ngai endaga twende mũndũ wa itũũra, no oririe Jesu ũũ: “Mũndũ wa itũũra riitũ, nĩ ta ũrĩkũ?”

Akĩmũcokeria, Jesu aaheanire ngerekano ĩrĩa yũĩkaine mũno ĩgiĩ mũndũ woimaga Jerusalemu agĩthiĩ Jeriko agĩkora atunyani akĩhũrũo, “makĩmũtiga atigairie hanini atumbũkane.” Mũthĩnjĩri Ngai ũmwe wagereire njĩra ĩyo aahĩtũkĩire mũkĩra ũrĩa ũngĩ. Mũlawii o nake eekire o ũguo. “No rĩrĩ, Mũsamaria ũmwe agĩthiĩ ũgeni agĩkinya o hau aarĩ: nake aamuona akĩringwo nĩ tha.” Agĩthambia ironda cia mũndũ ũcio, akĩmũtwara nyũmba ya ageni, na akĩrĩha mwene nyũmba ĩyo nĩguo atumberio. Jesu akĩmũria, “Ũgwĩciria nĩ ũrĩkũ wao wekire mũndũ ũcio wakorirũo nĩ atunyani o ta ũrĩa mũndũ angĩĩkwo nĩ mũndũ wa itũũra rĩao?” Nake agĩcokia atĩrĩ, “Nĩ ũcio wamũiguĩrĩire tha.” Nake Jesu akĩmwĩra atĩrĩ: “Thiĩ, ũgekanage o taguo.”—Luka 10:25-37.

Andũ arĩa matuĩkaga Aira a Jehova nĩ merutaga igũrũ rĩa ũrutani ta ũcio wa Jesu na makagarũra mwerekera wao harĩ gũteithia andũ arĩa marĩ na thĩna. Kwa ngerekano-rĩ, mwandĩki ũmwe wa mabuku kuuma Latvia nĩ aandĩkire igũrũ rĩa mũrimũ wake thĩinĩ wa ibuku rĩake rĩĩtagwo Women in Soviet Prisons hĩndĩ ĩrĩa aarutaga wĩra kambĩ-inĩ ya Potma mĩaka-inĩ ya 1960. Oigire ũũ: “Hĩndĩ ĩrĩa yothe ndaarĩ mũrũaru-rĩ, [Aira a Jehova] maandumberagia marĩ na kĩyo kĩnene. Ndiabataraga kũrũmbũiyo makĩrĩa ma ũguo.” Agĩcoka akiuga: “Aira a Jehova monaga arĩ wĩra wao gũteithia mũndũ o wothe matekũrora ndini kana bũrũri ũrĩa oimĩte.”

Hĩndĩ ĩrĩa kwagĩire na thĩna wa mbeca ũrĩa watũmire Aira amwe a Jehova itũũra-inĩ rĩa Ancón, bũrũri-inĩ wa Ecuador, makorũo matarĩ wĩra kana matarĩ mbeca, arĩa angĩ nĩ maacaririe ũrĩa mangĩmonera mbeca; maarugaga irio cia kwenderia ategi a thamaki makiumĩra wĩra ũtukũ (mbica ĩrĩ mwena wa ũrĩo). Andũ othe thĩinĩ wa kĩũngano kĩu, nginya ciana, nĩ maateithanirie gwĩka ũguo. Maambagĩrĩria wĩra thaa mũgwanja cia ũtukũ, nĩguo igĩkinya thaa ikũmi tũtarũ tũgĩcoka, irio igakorũo irĩ hĩu. Mbeca iria Aira acio a Jehova moonaga ciagayagĩrũo o mũndũ kũringana na mabataro make.

Maũndũ ta macio maronania atĩ kĩonereria na ũrutani wa Jesu nĩ irĩ ũhoti wa kũgarũra mwerekera wa andũ wĩgiĩ gũteithia arĩa marĩ na thĩna.

3. Ũhoti wa Jesu wa kũgarũra andũ Andũ kũndũ guothe thĩinĩ wa thĩ nĩ moĩ atĩ nĩ tũrĩ mwerekera wa kwĩyenda. Bibilia ĩwĩtaga mehia. O na mũtũmwo Paulo nĩ aandĩkire ũũ: “Tondũ wa ũguo, ha ũhoro wa watho-rĩ, nĩnyonaga atĩrĩ, atĩ o na ngĩendaga gwĩka wega-rĩ, ũũru nĩũkoragwo ũnjikairie.” Agĩcoka akĩũria: “Nũ ũngĩkĩ’honokia harĩ mwĩrĩ ũyũ wa gĩkuũ? Nĩndacokeria Ngai ngatho nĩ ũndũ wa Jesu Kristo.” (Aroma 7:21-25) Paulo aaririe ũhoro wa ũrĩa Ngai, kũgerera Jesu, angĩkahonokia athathaiya a ma kuumana na mĩerekera ya wĩhia, ta kwĩyenda, kũrĩa arĩ kuo kĩhumo kĩa ũthĩni. Ũndũ ũcio ũngĩgekĩka atĩa?

Ihinda inyinyi thutha wa Jesu kũbatithio-rĩ, Johana Mũbatithania oigire ũũ: “Onei Gatũrũme ka Ngai, karĩa ga gũtwara mehia ma kĩrĩndĩ!” (Johana 1:29) Ica ikuhĩ thĩ ĩrĩkorũo ĩiyũrĩtwo nĩ andũ mehereirio mehia marĩa tũgayaga, o hamwe na mĩerekera ya kwĩyenda. (Isaia 11:9) Hĩndĩ ĩyo Jesu nĩ agakorũo eheretie kĩhumo kĩa ũthĩni.

Githĩ ti gĩkeno kũmenya atĩ kũrĩ hĩndĩ andũ othe magakoragwo na kĩrĩa gĩothe marabatara! Kiugo kĩa Ngai kĩroiga: “No rĩrĩ, mũndũ o mũndũ wacio arĩikaraga egangarĩte o gĩtina-inĩ kĩa mũthabibũ wake, o na gĩtina-inĩ kĩa mũkũyũ wake, na gũtigĩe mũndũ wa kũmamakia.” (Mika 4:4) Ciugo icio irataarĩria ũhoro wa hĩndĩ ĩrĩa andũ othe magakorũo na wĩra mwega, ũgitĩri na mweke wa gũkenera biũ thĩ ĩtarĩ na ũthĩni, ũndũ ũrĩa ũkaagocithia Jehova.