Ũcanjamũku

ŨCANJAMŨKU ũtũmaga mĩario ĩgĩe na cama. O na gũtuĩka harĩ bata kũheana mĩario ĩrĩ na ũguni, kũruta mĩario na ũcanjamũku nĩkuo gũtũmaga athikĩrĩria mathikĩrĩrie na kinyi. No ũhote gũkũria ngumo ya ũcanjamũku, gũtekũmakania ũrĩa warerirũo kana ũmũndũ waku.

Aria Kuuma Ngoro. Rĩrĩa Jesu aaragia na mũtumia Mũsamaria, oigire atĩ arĩa mahoyaga Jehova no mũhaka mahoyage “na roho na mahoyage na ma.” (Joh. 4:24) No mũhaka ũthathaiya wao ũtindĩkagwo nĩ ngoro ciyũrĩtwo nĩ wendo na ningĩ ũtwaranage na ma cia Kiugo kĩa Ngai. Mũndũ angĩkorũo na wendo mũnene ũguo, ũrĩonekaga kũringana na ũrĩa aragia. Arĩkoragwo na merirĩria manene ma kwĩra andũ igũrũ rĩgiĩ maũndũ marĩa Jehova aharĩrĩirie nĩ ũndũ wa wendo wake. Ũthiũ wake, ũrĩa arahũthĩra ciĩga ciake, na mũgambo wake nĩ irĩonanagia kũna ũrĩa araigua.

Gũkĩrĩ ũguo-rĩ, nĩ kĩĩ kĩngĩtũma mwaria wendete Jehova na wĩtĩkĩtie biũ ũhoro ũrĩa araheana age ũcanjamũku rĩrĩa araruta mĩario? Gũkorũo ahaarĩirie ũhoro gwiki ti kũiganu. No mũhaka ũhoro ũcio ũkorũo ũmũingĩrĩte biũ; ngoro yake yothe ĩkorũo thĩinĩ waguo. Ta reke tuuge aheetwo mĩario ĩgiĩ igongona rĩa ũkũũri rĩa Jesu Kristo. Makĩria ma gũtaarĩria ũhoro mũingĩ wĩgiĩ igongona rĩu, akĩruta mĩario yake, no mũhaka mwaria akorũo aiyũrĩtwo nĩ ngatho nĩ ũndũ wa kũmenya ũrĩa igongona rĩa ũkũũri rĩa Jesu rĩrĩ na ũguni harĩ we na harĩ athikĩrĩria ake. Nĩ ekũbatara gũkorũo na ngatho nyingĩ harĩ Jehova Ngai na harĩ Kristo Jesu nĩ ũndũ wa kĩheo kĩu kĩa magegania. Nĩ ekũbatara gwĩciria ũrĩa rĩreheire andũ kĩĩrĩgĩrĩro kĩnene gĩa ũtũũro wa tene na tene marĩ na ũgima mũkinyanĩru thĩinĩ wa thĩ ĩtuĩtwo paradiso! Nĩ ũndũ ũcio ekũbatara gwĩkĩra ngoro yake ũhoro-inĩ ũcio.

Bibilia ĩkĩaria igũrũ rĩgiĩ Ezara, mũrutani ũmwe thĩinĩ wa Isiraeli, yugaga “nĩaatuĩte na ngoro yake atĩ arongorie watho wa Jehova, o na awĩkage, o na arutanage . . . thĩinĩ wa Isiraeli.” (Ezar. 7:10) Tũngĩkaga take—kũhaarĩria ũhoro o hamwe na ngoro citũ—tũrĩaragia kuuma ngoro-inĩ. Kwaria ma cia Bibilia kuuma ngoro-inĩ no gũteithie athikĩrĩria mũno makũrie wendo wa biũ harĩ ma icio.

Wĩcirie Ũhoro wa Athikĩrĩria Aku. Ũndũ ũngĩ wa bata harĩ kuonania ũcanjamũku nĩ gũkorũo na ma atĩ athikĩrĩria aku nĩ marabatara kũigua ũrĩa ũrameera. Ũguo nĩ kuuga atĩ rĩrĩa ũrahaarĩria mĩario yaku, makĩria ma gũcokanĩrĩria ũhoro mwega nĩ ũkũbatara kũhoya Jehova agũtongorie ũrute mĩario ĩyo na njĩra ĩkũguna athikĩrĩria aku. (Thab. 32:8; Mat. 7:7, 8) Wĩcirie nĩkĩ athikĩrĩria aku nĩ marabatara kũigua ũhoro ũcio, ũrĩa mekũgunĩka nĩguo, na ũrĩa ũngĩũheana na njĩra megũkenio nĩguo.

Haarĩria mĩario yaku biũ nginya ũigue ũrĩ na mĩĩto mĩnene ya kũmĩruta. To mũhaka ũhoro ũrĩa ũraheana ũkorũo ũrĩ mwerũ, ĩndĩ njĩra yaku ya kũũheana no ĩkorũo ĩrĩ ngũrani. Ũngĩhaarĩria ũhoro ũgũteithia athikĩrĩria aku mekĩre ũkuruhanu wao na Jehova hinya, mone maũndũ marĩa aheanĩte marĩ ma bata, mahote kũhiũrania na mĩtangĩko ya ũtũũro mũtabarĩre-inĩ ũyũ mũũru, kana nĩguo makorũo na moimĩrĩro mega thĩinĩ wa ũtungata, ũrĩ na itũmi njega cia gũcanjamũkĩra mĩario yaku.

Ĩ angĩkorũo mĩario yaku nĩ ya gũthoma mbere ya andũ? Nĩguo ũthome na ũcanjamũku, harĩ maũndũ mangĩ marabatarania makĩria ma gũtamũka ciugo ũrĩa kwagĩrĩire na gũthoma ibungo cia ciugo wega. Thoma ũhoro ũcio. Angĩkorũo ũgaathoma gĩcunjĩ kĩa Bibilia, ĩka ũthuthuria wĩgiĩ gĩcunjĩ kĩu. Tigĩrĩra atĩ nĩ wataũkĩrũo nĩ maũndũ makĩo ma mũthingi. Wĩcirie ũrĩa gĩcunjĩ kĩu kĩngĩkũguna na kĩgune athikĩrĩria aku, na ũthome ũrĩ na muoroto wa kũmateithia mone ũguni ũcio.

Hihi ũrehaarĩria gũthiĩ kũhunjia? Thuthuria ũhoro ũrĩa ũkwarĩrĩria na maandĩko marĩa ũbangĩte kũhũthĩra. Ningĩ, wĩcirie maũndũ marĩa mangĩkorũo meciria-inĩ ma andũ. Nĩ maũndũ marĩkũ magũthĩte ciongo cia mohoro? Nĩ mathĩna marĩkũ andũ maracemania namo? Ũngĩkorũo wĩhaarĩirie wega kuonia andũ atĩ Kiugo kĩa Ngai nĩ gĩkoragwo na kĩhonia kĩa mathĩna marĩa marĩ namo, ũrĩiguaga ũrĩ na wendi mũnene wa kũhunjia, na ũcanjamũku nĩ ũrĩĩrehage guo mwene.

Onania Ũcanjamũku na Njĩra ya Kũruta Mĩario ĩrĩ na Cama. Ũcanjamũku wonanagio wega na njĩra ya kũruta mĩario ĩrĩ na cama. Ũndũ ũcio wagĩrĩirũo kuoneka ũthiũ-inĩ waku. No mũhaka ũiguĩke ũrĩ na ũũma na kĩrĩa ũroiga, to kũnyitĩrĩra maũndũ.

Ũigananĩru nĩ ũbataranagia. Andũ amwe mahota gũcanjamũkĩra maũndũ mothe. No mabatare gũteithio mamenye atĩ mũndũ angĩcanjamũka gũkĩria njano, athikĩrĩria megwĩciria ũhoro wake handũ ha ndũmĩrĩri ĩrĩa aramahe. Nao arĩa marĩ thoni nĩ mekũbatara gwĩkĩrũo ngoro maragie marĩ na ũcanjamũku.

Ũcanjamũku nĩ ngumo ĩgwatanagio. Angĩkorũo nĩ ũraikara ũkĩroraga athikĩrĩria aku na ũgacanjamũkĩra ũhoro ũrĩa ũramahe, o nao nĩ megũcanjamũka. Apolo aaragia na ũcanjamũku, na gũtuĩkaga aarĩ mwaria mwega. Ũngĩrurumũrũo nĩ roho wa Ngai, mĩario yaku ya ũcanjamũku nĩ ĩrĩtũmaga arĩa maragũthikĩrĩria moe ikinya.—Atũm. 18:24, 25; Rom. 12:11.

Ũcanjamũku Ũringaine na Ũhoro. Wĩmenyerere ndũgacanjamũke mũno mĩario-inĩ yaku yothe ũndũ ũkũnogia athikĩrĩria aku. Ũngĩka ũguo no mage kũnyita ũrĩa ũramekĩra ngoro meke. Ũguo nĩ kuuga atĩ ũkũbatara kũhaarĩria ũhoro ũngĩrutwo na njĩra itiganĩte. Ndũkarute mĩario na njĩra ĩronania atĩ ũhoro ũrĩa ũraria ti wa bata mũno. Ũngĩthuura ũhoro waku wega, ũrĩwonaga ũrĩ wa bata mũno. Ĩndĩ thĩinĩ wa mĩario maũndũ mamwe nĩ mabataraga ũcanjamũku kũrĩ marĩa mangĩ, no maũndũ macio mothe magĩrĩirũo kũrutwo na ũtaũku na ũcanjamũku ũtiganĩte mĩario-inĩ yaku yothe.

Makĩria maũndũ marĩa ma bata mũno magĩrĩirũo kũgwetwo na ũcanjamũku. No mũhaka mĩario yaku ĩkorũo na tũtũũrũ tũrĩa ũhoro waku wĩhocetie harĩ tuo. Tondũ tũu nĩtuo maũndũ marĩa ma bata mũno ma mĩario yaku, twagĩrĩirũo kwarĩrĩrio na njĩra ĩkũrurumũra athikĩrĩria aku. Thutha wa kũiguithia athikĩrĩria aku, ũkũbatara kũmarurumũra, ũmonie bata wa kũhũthĩra maũndũ marĩa warĩrĩria. Ũcanjamũku waku nĩ ũgũgũteithia gũkinyĩra ngoro cia athikĩrĩria aku. Ũcanjamũku ndwagĩrĩirũo nĩ gũtindĩkĩrĩrio mĩario-inĩ. No mũhaka hakorũo na gĩtũmi gĩa gũcanjamũka, kĩrĩa kĩhocetie harĩ ũhoro ũrĩa ũraheana.