Gũtiriha Wega

NO KŨHOTEKE nĩ ũthuthurĩtie na ũbarĩrĩru na ũkabanga ndeto ya mĩario yaku. Ningĩ no kũhoteke nĩ ũhaarĩirie ũhoro mwega wa kwarũka mĩario. Ĩndĩ, nĩ harĩ ũndũ ũngĩ ũmwe ũrabatarania—gũtiriha wega. Ndũkahũthie bata wa gũtiriha wega. Ũndũ ũrĩa mũndũ oigaga agĩtiriha kaingĩ nĩ ũririkanagwo ihinda iraya. Ũngĩaga gũtiriha wega, o na maũndũ marĩa ũkwarĩtie no mage kũguna andũ wega.

Ririkana maũndũ maya: Hakuhĩ mũico-inĩ wa ũtũũro wake, Joshua nĩ aaheire athuri a rũrĩrĩ rwa Isiraeli mĩario ĩtangĩriganĩra. Thutha wa gũtaarĩria maũndũ marĩa Jehova eekĩire Isiraeli kuuma o hĩndĩ ya Iburahimu, hihi Joshua aacokerire maũndũ macio na njĩra nguhĩ? Aca. Ithenya rĩa ũguo, aahatĩrĩirie andũ kuuma ngoro-inĩ akĩmeera: “Wĩtigĩrei Jehova, mũmũtungatagĩre mũtarĩ na ũhinga, mũmũiguĩte na ma o ma.” Thoma Joshua 24:14, 15 wone ũrĩa aatirihire ũhoro ũcio.

Mĩario ĩngĩ ya bata nĩ thĩinĩ wa Atũmwo 2:14-36, ĩrĩa yarutirũo nĩ mũtũmwo Petero kĩrĩndĩ-inĩ kĩrĩa kĩagomanĩte Jerusalemu hĩndĩ ya Gĩkũngũĩro kĩa Bendegothito ya 33 M.M. Aambire agĩtaarĩria atĩ ũndũ ũcio meyonagĩra warĩ kũhinga kwa ũrathi wa Joeli wĩgiĩ gũitĩrĩrio roho wa Ngai. Agĩcoka akĩonania ũrĩa ũndũ ũcio wakonainie na morathi ma Kĩĩmesia thĩinĩ wa Thaburi iria ciarathĩte ũhoro wa kũriũka kwa Jesu Kristo na gũtũgĩrio gwake guoko-inĩ kwa ũrĩo kwa Ngai. Ningĩ, agĩtiriha, Petero akĩonania cara rũkũ ũndũ ũrĩa wahutĩtie o mũndũ thĩinĩ wa athikĩrĩria. Oigire: “Nĩ ũndũ ũcio, andũ othe a Isiraeli nĩ mamenye kũna atĩ Jesu ũcio inyuĩ mwacurithirie mũtĩ igũrũ, nĩwe Ngai atuĩte Mwathani o na Kristo.” Arĩa maarĩ ho makĩũria: “Ariũ a Awa, tũgũgĩĩka atĩa?” Petero akĩmacokeria: “Mwĩrirei, mũcoke mũbatithio o mũndũ o mũndũ thĩinĩ wa rĩĩtwa rĩa Jesu Kristo.” (Atũm. 2:37, 38, NW) Mũthenya ũcio athikĩrĩria 3,000 makĩhutio mũno nĩ ndeto ĩrĩa maaiguire, magĩĩtĩkĩra ma ĩgiĩ Jesu Kristo.

Maũndũ ma Kũririkana. Ũrĩa ũkuuga ũgĩtiriha wagĩrĩirũo gũkorũo ũkonainie ĩmwe kwa ĩmwe na ũhoro wa mũthingi wa mĩario yaku. Ũgĩtiriha, gweta maũndũ marĩa ma bata makĩria mathingataine ta ũrĩa ũkũmarĩrĩirie. O na gũtuĩka no wende kũgweta ciugo imwe cia ũhoro waku wa mũthingi, nĩwe ũkũmenya kana nĩ ũgũcicokera ĩmwe kwa ĩmwe.

Kaingĩ, muoroto waku ũkĩaria nĩ gwĩkĩra andũ ngoro moe ikinya rĩna kũringana na ũhoro ũrĩa ũramahe. Muoroto ũmwe mũnene wa gũtiriha nĩ kũmonia ũrĩa megwĩka. Ũgĩthuura ũhoro waku wa mũthingi na maũndũ marĩa ma bata makĩria-rĩ, hihi nĩ wĩcirĩtie na ũbacĩrĩru bata wa ndeto ĩyo harĩ athikĩrĩria aku na muoroto waku harĩ kũmĩheana? Angĩkorũo nĩguo-rĩ, nĩ ũramenya ikinya rĩrĩa ũngĩenda moe. Rĩu ũrabatara gũtaarĩria nĩ ikinya rĩrĩkũ na hihi ũrĩa mangĩhota gwĩka ũguo.

Makĩria ma kuonia athikĩrĩria aku ũrĩa megwĩka, nĩ wagĩrĩirũo kũmarurumũra ũgĩtiriha. Ũgĩtiriha, wagĩrĩirũo kũmonia wega gĩtũmi gĩa kuoya ikinya na hihi irathimo iria ciumanaga na gwĩka ũguo. Kohoro ga kũrĩkĩrĩria kangĩhaarĩrio na kabangwo wega, nĩ gekwagĩria na gekĩre mĩario yaku hinya.

Ririkana atĩ nĩ gũtiriha ũratiriha mĩario. Kĩrĩa ũkuga kĩagĩrĩirũo kuonania ũguo. Ningĩ mũthiĩre waku wagĩrĩirũo gũkorũo ũrĩ na ũigananĩru. Ndũkaarie na ihenya mũno mĩario-inĩ yaku yothe ũcoke ũtirihe o na ihenya. Ningĩ, ndũkareke mũgambo waku ũhoerere. Mũgambo waku wagĩrĩirũo gũkorũo ũrĩ mũiganu ĩndĩ ndũgakĩrie njano. Ciugo ciaku nyinyi cia mũico ciagĩrĩirũo kuonania atĩ nĩ kũrĩkia ũrarĩkia. Njĩra ĩrĩa ũkũgweta ciugo icio nayo yagĩrĩirũo kuonania kĩyo na ũũma. Rĩrĩa ũrahaarĩria ũrĩa ũkaaruta mĩario, ikara ũkĩĩmenyagĩria ũrĩa ũkamĩtiriha.

Gũtiriha kwagĩrĩirũo kuoya kahinda kaigana atĩa? Ũcio ti ũndũ wĩhocetie tu harĩ kũrora thaa. Gũtiriha gũtiagĩrĩire gwĩkururia. Kahinda karĩa ũkũhũthĩra ũgĩtiriha gekũringana na ũrĩa ũrona mĩario yaku ĩhutĩtie athikĩrĩria. Hingo ciothe gũtiriha na njĩra njega, hũthũ, ya ĩmwe kwa ĩmwe nĩ kwa bata. Gũtiriha na njĩra ndaihu ũkĩhũthĩra ngerekano nguhĩ o nakuo no gũkorũo na moimĩrĩro kũngĩhaarĩrio wega. Rora ũrĩa ibuku rĩothe rĩa Kohelethu rĩtirihĩtwo na njĩra nguhĩ thĩinĩ wa Kohelethu 12:13, 14, rĩringithanĩtio na ũrĩa Mahunjio ma Kĩrĩma-inĩ marĩa marĩ thĩinĩ wa Mathayo 7:24-27 matirihĩtwo na njĩra nguhĩ makĩria.

Ũtungata-inĩ. Kũrĩa ũrĩbataraga gũtiriha maita maingĩ makĩria nĩ ũtungata-inĩ. Kwĩhaarĩria na kwenda andũ nĩ kũrĩgũteithagia mũno. Ũtaaro ũrĩa ũheanĩtwo gĩcunjĩ-inĩ gĩkĩ no ũkorũo na ũguni ũngĩhũthĩrũo mũndũ akĩaria na mũndũ ũmwe.

Ndeereti no ĩkorũo ĩrĩ nguhĩ mũno. Mũndũ ũcio ahota gũkorũo na mĩhangʼo. Wahota gũkorũo na mweke wa kwaria o ndagĩka ĩmwe. Kũngĩhoteka no ũmwĩre ta ũũ: “Ũroneka ũrĩ na mĩhangʼo mĩingĩ. O na kũrĩ ũguo reke ngũtigĩre ũndũ mwega wĩciragie ũhoro waguo. Bibilia yonanagia atĩ Mũũmbi witũ arĩ na muoroto wa magegania—gũtua thĩ ĩno kũndũ andũ mangĩkenera gũtũũra tene na tene. No kũhoteke tũgaakorũo thĩinĩ wa Paradiso ĩyo, ĩndĩ nĩ tũkũbatara kwĩruta wendi wa Ngai.” Kana ũmwĩre nĩ ũrĩcoka hĩndĩ ĩngĩ njagĩrĩru makĩria.

Mwene nyũmba angĩgũtinia na mĩario—kana akwarĩrie ũũru—harĩ o ũndũ ũngĩhingia. Ririkana ũtaaro wa Mathayo 10:12, 13 na Aroma 12:17, 18. Macokio maku ma ũhooreri no kũhoteke macenjie ũrĩa onaga Aira a Jehova. Macio no makorũo marĩ moimĩrĩro mega.

Ona kũrĩ ũguo no kũhoteke nĩ mwagĩa na ndeereti njega na mwene nyũmba. Githĩ ti wega gũcokera ũndũ ũrĩa wa bata makĩria ũrenda aririkane? Ongerera maũndũ mangĩmũrurumũra oe ikinya ũndũ-inĩ ũcio.

Ũngĩona harĩ na mweke wa gũtwarithia ndeereti hĩndĩ ĩngĩ, mwĩre ũndũ ũrĩa mũkaarĩrĩria. Mũrie kĩũria—hihi kuuma ibuku-inĩ rĩa Kutoa Sababu kwa Kutumia Maandiko kana ibuku rĩrongoreirio kũruta andũ Bibilia. Ririkana muoroto waku, ũrĩa wonanirio nĩ Jesu na wandĩkĩtwo thĩinĩ wa Mathayo 28:19, 20.

Hihi nĩ gũtiriha ũratiriha wĩruti wa Bibilia na mũndũ? Gũcokera ũhoro wa mũthingi gũgũteithia mũrutwo kũririkana maũndũ marĩa mwarĩrĩria. Kũhũthĩra ciũria cia kwĩririkania gũgũkindĩra maũndũ marĩa ma bata meciria-inĩ ma mũrutwo, makĩria angĩkorũo mũgũcihĩtũkĩra mũtarĩ na ihenya. Kũria mũrutwo kĩũria kĩgiĩ ũrĩa ũhoro ũrĩa eruta ũngĩmũguna kana ũrĩa angĩwarĩrĩria na andũ angĩ no kũmũteithie ecirie ũrĩa angĩhũthĩra maũndũ marĩa erutĩte.—Thim. 4:7.

Ririkana—gũtiriha nĩ kũhutĩtie moimĩrĩro marĩa ndeereti yaku yothe ĩgũkorũo namo.