Jesu Gũthuura Saulu

Saulu aarĩ Mũroma na aaciarĩirũo itũũra-inĩ rĩa Tariso. Aarĩ Mũfarisai wathomeire Watho wa Kĩyahudi na nĩ aathũire Akristiano mũno. Aarutaga athuri na atumia Akristiano kuuma mĩciĩ-inĩ yao na akamaikia njera. O na nĩ aarũgamĩrĩire kĩrĩndĩ kĩarĩ na marakara gĩkĩhũũra Stefano na mahiga nginya agĩkua.

No Saulu ndaaiganagĩra na kũnyita Akristiano arĩa maarĩ Jerusalemu. Nĩ aahoire mũthĩnjĩri-Ngai ũrĩa mũnene rũtha rwa gũthiĩ itũũra-inĩ rĩa Dameski nĩguo agacarie Akristiano arĩa maaikaraga kuo. Rĩrĩa aakuhĩrĩirie itũũra rĩu, kwaumĩrire ũtheri mũnene o rĩmwe ũkĩmũmũrĩka mĩena yothe na akĩgwa thĩ. Akĩigua mũgambo wauga ũũ: ‘Saulu, ũranyarira nĩkĩ?’ Saulu akĩũria ũũ: ‘Wee nĩwe ũ?’ Agĩcokerio ũũ: ‘Nĩ niĩ Jesu. Thiĩ Dameski na nĩ ũkwĩrũo ũrĩa wagĩrĩirũo gwĩka.’ O hĩndĩ ĩyo, Saulu agĩtuĩka gĩtumumu na akĩbatara kũnyitwo guoko nĩguo akinye Dameski.

Kũu Dameski nĩ kwarĩ na Mũkristiano mwĩhokeku wetagwo Anania. Jesu aamwĩrire ũũ kũgerera kĩoneki: ‘Thiĩ kwa Judasi njĩra-inĩ ĩrĩa ĩtagwo Nũngarũ, na ũcarie mũndũ wĩtagwo Saulu.’ Nake Anania akĩmwĩra: ‘Mwathani, nĩ njũĩ maũndũ mothe megiĩ mũndũ ũcio! Araikia arutwo aku njera!’ No Jesu akĩmwĩra ũũ: ‘Thiĩ kũrĩ we. Nĩ ndĩmũthuurĩte nĩguo ahunjie ũhoro ũrĩa mwega kũrĩ ndũrĩrĩ nyingĩ.’

Nĩ ũndũ ũcio Anania agĩthiĩ gũcaria Saulu na akĩmwĩra: ‘Mũrũ wa Ithe witũ Saulu, Jesu andũma kũrĩ we ngũhingũre maitho.’ O hĩndĩ ĩyo Saulu akĩambĩrĩria kuona rĩngĩ. Nĩ eerutire ũhoro wĩgiĩ Jesu na agĩtuĩka mũrũmĩrĩri wake. Thutha wa kũbatithio na gũtuĩka Mũkristiano, Saulu akĩambĩrĩria kũhunjia thunagogi-inĩ arĩ hamwe na Akristiano arĩa angĩ. Ta wĩcirie ũrĩa Ayahudi maamakire rĩrĩa moonire Saulu akĩrutana ũhoro wĩgiĩ Jesu. Maaugire ũũ: ‘Na githĩ ũyũ ti mũndũ ũrĩa ũratharĩkagĩra arutwo a Jesu?’

Kwa ihinda rĩa mĩaka ĩtatũ, Saulu nĩ aahunjĩirie aikari a Dameski. Ayahudi nĩ maamenete Saulu mũno na nĩ maabangire kũmũũraga. No ariũ a Ithe witũ nĩ maamenyire mũbango ũcio na makĩmũteithĩrĩria kũũra. Maamwĩkĩrire gĩkabu-inĩ na makĩmũharũrũkĩria irima rĩarĩ rũthingo-inĩ rwa itũũra.

Rĩrĩa Saulu aakinyire Jerusalemu, nĩ aageririe kũnyitanĩra na ariũ a Ithe witũ a kũu, no nĩ maamwĩtigagĩra. Thutha ũcio, mũrutwo ũmwe wetagwo Baranaba nĩ oonirie Saulu wendo, akĩmũtwara kũrĩ atũmwo na akĩmaiguithia atĩ nĩ aagarũrũkĩte biũ. Saulu akĩambĩrĩria kũhunjia ũhoro ũrĩa mwega hamwe na kĩũngano kĩrĩa kĩarĩ Jerusalemu arĩ na kĩyo. Aacokire akĩambĩrĩria gwĩtagwo Paulo.