GŨCOKERA ANDŨ
ITHOMO RĨA 7
Kwaga Gũtigithĩria
Ũtaaro: “Na magĩthiĩ na mbere mategũtigithĩria . . . kũrutana na kũhunjia ũhoro ũrĩa mwega.”—Atũm. 5:42.
Ũrĩa Paulo Eekire
1. Wĩrorere VIDEO ĩno, kana ũthome Atũmwo 19:8-10. Ũcoke ũcokie ciũria ici:
Handũ ha gũkua ngoro rĩrĩa andũ amwe maamũkararirie-rĩ, Paulo aathiire na mbere atĩa gũteithia arĩa moonanirie wendi wa gũthikĩrĩria ategũtigithĩria?
Paulo aacokire maita maigana kũruta arĩa moonanagia wendi, na eekire ũguo ihinda rĩigana atĩa?
Tũreruta Atĩa na Paulo?
2. Nĩ tũrabatara kũhũthĩra mahinda maitũ na gwĩkĩra kĩyo, nĩguo tũkorũo na maumĩrĩro mega tũgĩcokera andũ na twambĩrĩrie wĩruti wa Bibilia na andũ.
Wĩgerekanie na Paulo
3. Cokera mũndũ ihinda rĩrĩa rĩngĩmwagĩrĩra. Wĩyũrie: ‘Nĩ ihinda rĩrĩkũ rĩega harĩ niĩ kũmũcokera? Nĩ rĩ angĩona ihinda rĩega rĩa kwaranĩria na niĩ, na nĩ kũ angĩkorũo?’ Korũo wĩhaarĩirie kũmũcokera o na angĩkorũo ihinda rĩake rĩtiratwarana na rĩaku.
4. Banga ihinda rĩrĩa ũgaacoka. O hĩndĩ thutha wa kwaria na mũndũ, bangai ihinda rĩna rĩrĩa ũngĩcoka nĩguo mũtwarithie ndeereti. Tigĩrĩra nĩ wacoka ihinda rĩrĩa mwabanga.
5. Ndũgate mwĩhoko. Ndũgatue itua na ihenya atĩ mũndũ ndarenda gũthikĩrĩria, atĩ tondũ ndũmũkoraga mũciĩ kana tondũ kaingĩ akoragwo na mĩhangʼo. (1 Kor. 13:4, 7) Handũ ha ũguo, wĩrutanĩrie gũcoka, no ũtigĩrĩre nĩ ũrahũthĩra mahinda maku na ũũgĩ.—1 Kor. 9:26.