Maũndũ Mega Marĩ Hakuhĩ!

“Amu-rĩ, no ihinda inyinyi, ũrĩa mwaganu acoke aagwo . . . No rĩrĩ, andũ arĩa ahoreri nĩo makagaya thĩ, na matũũre mekenagĩra tondũ wa kũingĩhĩrũo nĩ thayũ.”​—THABURI 37:10, 11.

HIHI no wende kuona ũrathi ũcio ũgwetetwo hau igũrũ ũkĩhinga? Hatarĩ nganja, no wende. Harĩ na itũmi njega cia gũtũma twĩtĩkie atĩ nĩ ũkũhinga ica ikuhĩ.

Icunjĩ iria hĩtũku, nĩ ciarĩrĩirie morathi mamwe ma Bibilia marĩa maronania wega atĩ tũratũũra thĩinĩ wa “matukũ ma kũrigĩrĩria.” (2 Timotheo 3:1-5) Ngai aatongoririe aandĩki a Bibilia marathe maũndũ macio nĩguo tũgĩe na kĩĩrĩgĩrĩro. (Aroma 15:4) Kũhinga kwa morathi ta macio kũronania atĩ mathĩna marĩa tũrĩ namo ũmũthĩ marĩ hakuhĩ gũthira.

Matukũ ma kũrigĩrĩria mathira-rĩ, hihi nĩ kĩĩ gĩkarũmĩrĩra? Ũthamaki wa Ngai nĩ ũgaathamakĩra andũ othe. (Mathayo 6:9) Ta rora wone ũrĩa Bibilia ĩtaarĩirie ũrĩa maũndũ magakorũo matariĩ thĩinĩ wa thĩ hĩndĩ ĩyo:

● Ngʼaragu nĩ ĩkaniinwo. “Bũrũri ũrogĩaga na bũthi wa ngano nginya o irĩma igũrũ.”​—Thaburi 72:16.

● Mĩrimũ nĩ ĩkaniinwo. “Nake mũndũ ũrĩa ũtũũraga bũrũri ũcio ndarĩ hingo agacoka kuuga ũũ: Ndĩ mũrũaru.”​—Isaia 33:24.

● Thĩ nĩ ĩkerũhio. “Werũ, o na kũndũ kũrĩa kwagĩte andũ-rĩ, nĩgũgakena; o naruo rũngʼũrĩ no rũgakena, na rũagĩre rũmere mahũa ma nyeki-inĩ.”​—Isaia 35:1.

Macio no mamwe ma morathi ma Bibilia marĩa matwĩkagĩra ngoro, marĩa marĩhinga o ica ikuhĩ. Ũria Aira a Jehova magũtaarĩrie kĩrĩa gĩtũmaga makorũo na ma biũ atĩ maũndũ mega marĩ hakuhĩ.