MACOKIO MA CIŨRIA CIA BIBILIA
Bibilia ĩkoragwo na morathi nĩkĩ?
Bibilia ĩtaaragĩria maũndũ marĩa marekĩka ihinda-inĩ rĩrĩ nĩkĩ?—Luka 21:10, 11.
Bibilia nĩ ĩkoragwo na morathi maingĩ maarĩrĩirio na njĩra ndikĩru. Gũtirĩ mũndũ ũngĩhota kũratha ũhoro wa ihinda rĩũkĩte na njĩra ndikĩru. Nĩ ũndũ ũcio, kũhinga kwa morathi ma Bibilia gũtũheaga ũũma atĩ Bibilia nĩ Kiugo kĩa Ngai.—Thoma Joshua 23:14; 2 Petero 1:20, 21.
Morathi ma Bibilia marĩa mahingĩte nĩ matũheaga gĩtũmi kĩega gĩa gwĩtĩkia Ngai. (Ahibirania 11:1) Ningĩ nĩ matũmaga tũkorũo na ma atĩ ciĩranĩro cia Ngai cia ihinda rĩega rĩũkĩte nĩ ikahinga. Kwoguo ũrathi wa Bibilia nĩ ũtũheaga kĩĩrĩgĩrĩro kĩa ma.—Thoma Thaburi 37:29; Aroma 15:4.
Morathi ma Bibilia matũteithagia atĩa?
Morathi mamwe maheaga ndungata cia Ngai mũkaana nĩguo cioe ikinya rĩna. Kwa ngerekano, rĩrĩa Akristiano a karine ya mbere moonire morathi mamwe makĩhinga, nĩ mooimire Jerusalemu. Thutha ũcio rĩrĩa itũũra rĩu rĩanangirũo tondũ andũ aingĩ nĩ maaregete Jesu, Akristiano nĩ maathiĩte kũndũ kũraya gũtaarĩ na ũgwati.—Thoma Luka 21:20-22.
Ũmũthĩ, morathi marĩa mahingĩte maronania atĩ Ũthamaki wa Ngai ũrĩ hakuhĩ kũniina mothamaki na thirikari cia andũ. (Danieli 2:44; Luka 21:31) Kwoguo nĩ wega o mũndũ oe ikinya na ihenya nĩguo etĩkĩrĩke nĩ Jesu Kristo, Mũthamaki ũrĩa Ngai amũrĩte.—Thoma Luka 21:34-36.