Iburahimu​—Mũthuri Warĩ na Wĩtĩkio

Nĩ hwaĩ-inĩ, Iburahimu arũngiĩ nja. Aacũthĩrĩria matu-inĩ, akona maiyũire njata irametameta, ũndũ ũcio ũgatũma ecirie ũhoro wa kĩĩranĩro kĩrĩa eerĩirũo nĩ Ngai atĩ njiarũa ciake ikaingĩha o ta njata icio. (Kĩambĩrĩria 15:5) Kũringana na Iburahimu, njata icio nĩ rũũri rwa kũmũririkania kĩĩranĩro kĩu kĩa Jehova. Ningĩ ikonania atĩ ũndũ ũcio nĩ wa kwĩhokeka. Ningĩ-rĩ, angĩkorũo Jehova arĩ na ũhoti wa kũũmba igũrũ na thĩ na indo iria ciothe irĩ kuo-rĩ, na githĩ to ahotithie Iburahimu na Sara magĩe kaana? Ũguo nĩguo wĩtĩkio wa Iburahimu ũtariĩ.

WĨTĨKIO NĨ KĨĨ? Ta ũrĩa kĩhũthĩrĩtwo Bibilia-inĩ, kiugo “wĩtĩkio” kĩonanagia gũkorũo na kĩĩrĩgĩrĩro kĩrũmu biũ harĩ kĩndũ, o na ũtarĩ wakĩona. Wĩtĩkio ũcio ũkoragwo wĩhocetie harĩ ũira mũrũmu. Mũndũ ũrĩ na wĩtĩkio harĩ Ngai akoragwo na ma biũ harĩ kũhinga gwa ciĩranĩro cia Jehova, o ta irĩkĩtie kũhinga.

IBURAHIMU ONANIRIE WĨTĨKIO NA NJĨRA IRĨKŨ? Iburahimu nĩ onanirie atĩ aarĩ na wĩtĩkio harĩ ciĩranĩro cia Ngai. Nĩ ũndũ wa wĩtĩkio, Iburahimu nĩ oimire bũrũri ũrĩa aaciarĩirũo, arĩ na ma biũ atĩ Jehova nĩ angĩkaahingia kĩĩranĩro Gĩake gĩa kũmũhe bũrũri ũngĩ. Nĩ ũndũ wa wĩtĩkio, Iburahimu aathiũrũrũkire Kanaani, arĩ na ma biũ atĩ macũngĩrĩro-inĩ njiarũa ciake nĩ ingĩkagaya bũrũri ũcio. Ningĩ, nĩ ũndũ wa wĩtĩkio Iburahimu nĩ aathĩkire akĩgeria kũruta Isaaka igongona, arĩ na ma biũ atĩ hangĩabataranirie, Jehova nĩ angĩariũkirie Isaaka.—Ahibirania 11:8, 9, 17-19.

Iburahimu eeciragia ũhoro wa mahinda marĩa magooka handũ ha marĩa mahĩtũku. O na gũtuĩka no kũhoteke Iburahimu na Sara nĩ maakenagĩra mũtũũrĩre mwega marĩ Uru, gũkĩra Kanaani-rĩ, matiatũũrire “maririkanaga bũrũri ũrĩa moimĩte.” (Ahibirania 11:15) Ithenya rĩa ũguo, meeciragia ũrĩa Ngai angĩamarathimire na arathime njiarũa ciao thutha-inĩ.—Ahibirania 11:16.

Hihi wĩtĩkio wa Iburahimu warĩ na mũthingi mwega? Hatirĩ nganja. Jehova nĩ aamũhingĩirie ciĩranĩro ciake ciothe. Macũngĩrĩro-inĩ rũciaro rwa Iburahimu nĩ ruongererekire rũgĩtuĩka rũrĩrĩ rwa Isiraeli. Thutha wa ihinda, Aisiraeli nĩ maatũũrire bũrũri wa Kanaani, ũrĩa Jehova eerĩire Iburahimu.—Joshua 11:23.

TŨRERUTA ATĨA? No tũkorũo na ma biũ atĩ Jehova nĩ akaahingia ciĩranĩro ciake. O na gũtuĩka ciĩranĩro imwe no cioneke ta citangĩhoteka kũringana na andũ, tũrĩ na wĩtĩkio atĩ ‘maũndũ mothe no mahoteke nĩ ũndũ wa Ngai.’—Mathayo 19:26.

Ningĩ kĩonereria kĩa Iburahimu nĩ kĩratũruta tũtikaigage meciria maitũ harĩ ũrĩa maũndũ maatariĩ tene, ĩndĩ twĩciragie maũndũ marĩa tũgaakenera mahinda marĩa maroka. Ũguo nĩguo mũthuri wĩtagwo Jason ekaga. Jason akoragwo na mũrimũ mũũru ũrĩa ũtũmĩte ciĩga ciothe cia mwĩrĩ wake ikue. Jason oigire ũũ: “Kũrĩ hĩndĩ ndĩĩkoraga ngĩciria ũhoro wa mahinda marĩa mahĩtũku. Ndĩriragĩria gwĩka nginya tũmaũndũ tũrĩa tũnini ta kũhĩmbĩria Amanda, mũtumia wakwa.”

O na kũrĩ ũguo, Jason akoragwo na wĩtĩkio mũrũmu atĩ Jehova nĩ akaahingia ciĩranĩro ciake, hamwe na kĩĩranĩro gĩa atĩ ica ikuhĩ thĩ ĩno, nĩ ĩrĩtuĩka paradiso ĩtũũrũo tene na tene nĩ andũ ehokeku marĩ na ũgima mũkinyanĩru wa mwĩrĩ.a (Thaburi 37:10, 11, 29; Isaia 35:5, 6; Kũguũrĩrio 21:3, 4) Jason aacokire akiuga ũũ: “Nĩ ndĩririkanagia atĩ mahinda mega mũno marĩ hakuhĩ gũka. Ica ikuhĩ, maũndũ maya matigakorũo kuo rĩngĩ—mĩtangĩko, ihooru, kwĩigua ndĩ na mahĩtia.” Na githĩ kĩu ti kĩonereria kĩega mũno kĩa wĩtĩkio ta wa Iburahimu?

[Kohoro ka magũrũ-inĩ]