KUUMA NGOTHI-INĨ | AIRA A JEHOVA NĨA?
Aira a Jehova metĩkĩtie atĩa?
Aira a Jehova metĩkĩtie atĩ “ũhoro o wothe wandĩkĩtwo Maandĩko-inĩ nĩwekĩrirũo nĩ Ngai ngoro-inĩ ya mũwandĩki, na wĩ na kĩguni.” (2 Timotheo 3:16) Tũhũthagĩra Bibilia nĩguo ĩtũteithie kwĩruta ũhoro wa Mũũmbi na gũtũũra ũtũũro ũrĩ na muoroto.
Bibilia yugaga ũũ: “Nĩguo mamenye atĩ wee, o wee wĩtagwo Jehova, nowe wiki Ũrĩa-wĩ-Igũrũ-Mũno o igũrũ rĩa thĩ yothe.” (Thaburi 83:18) Nĩ ũndũ ũcio, tũthathayagia o Jehova Ngai wiki na tũkerutanĩria kũmenyithania rĩĩtwa rĩake tũrĩ Aira ake.—Isaia 43:10-12.
Tũrĩ Akristiano, twĩtĩkĩtie atĩ Jesu, “Mũrũ wa Ngai,”a nĩ okire gũkũ thĩ na agĩtuĩka Mesia. (Johana 1:34, 41; 4:25, 26) Thutha wa gũkua, Jesu nĩ aariũkirio na akĩambata igũrũ. (1 Akorintho 15:3, 4) Thutha ũcio agĩtuĩka Mũthamaki wa Ũthamaki wa Ngai. (Kũguũrĩrio 11:15) Ũthamaki ũcio nĩ thirikari ya biũ ĩrĩa ĩgaacokia Paradiso gũkũ thĩ. (Danieli 2:44) Bibilia yugaga ũũ: “Arĩa ahoreri nĩo makagaya thĩ, na matũũre mekenagĩra tondũ wa kũingĩhĩrũo nĩ thayũ.”—Thaburi 37:11, 29.
Aira a Jehova metĩkĩtie atĩ motaaro ma Bibilia no magune andũ nginya ũmũthĩ. (Isaia 48:17, 18) Nĩ ũndũ ũcio, nĩ twĩrutanagĩria biũ kũrũmĩrĩra motaaro macio. Kwa ngerekano, tondũ Bibilia nĩ ĩtũkaanagia mĩtugo ĩrĩa ĩthũkagia meciria maitũ o na mĩĩrĩ, tũtinyuaga thigara na tũtihũthagĩra ndawa cia kũrebia. (2 Akorintho 7:1) Ningĩ nĩ twĩthemaga mĩtugo ĩrĩa ĩkaananĩtio ĩmwe kwa ĩmwe thĩinĩ wa Bibilia, ta ũrĩĩu, mĩtugo mĩũru ya ngomanio, na kũiya.—1 Akorintho 6:9-11.
a Bibilia ningĩ nĩ ĩtaga Jesu “Mũriũ wa Ngai wa mũmwe” tondũ nĩwe warĩ wa mbere kũũmbwo, ningĩ nowe tu Jehova ombire ĩmwe kwa ĩmwe.—Johana 3:18; Akolosai 1:13-15.
“Hĩndĩ ĩrĩa marathoma Bibilia, metĩkĩtie atĩ nĩ Ngai ũkoragwo akĩaria nao. Rĩrĩa maacemania na mathĩna ũtũũro-inĩ wao, moyaga Kiugo kĩa Ngai na magacaria kĩhonia thĩinĩ wakĩo. . . . Monaga Kiugo kĩa Ngai kĩrĩ o muoyo.”—Mũtongoria ũmwe wa ndini ya Gatoreki, Benjamin Cherayath, thĩinĩ wa Ngathĩti ya Njĩrĩmani Münsterländische Volkszeitung