MACOKIO MA CIŨRIA CIA BIBILIA
Hihi no tũmenye ũhoro wa ma wĩgiĩ Ngai?
Ngai endaga tũmenye ũhoro wa ma nĩkĩ? Thoma Johana 17:3
Ngai nĩ akoretwo akĩaranĩria na andũ. Aahũthĩrire roho wake mũtheru, kana hinya wake, gwĩkĩra meciria make thĩinĩ wa ngoro cia arĩa maandĩkire Bibilia. (2 Petero 1:20, 21) No tũmenye ũhoro wa ma wĩgiĩ Ngai kũgerera gũthoma Bibilia.—Thoma Johana 17:17; 2 Timotheo 3:16.
Thĩinĩ wa Bibilia, Ngai nĩ aguũrĩtie maũndũ maingĩ mamwĩgiĩ. Nĩ amenyithanĩtie kĩrĩa gĩatũmire ombe mũndũ, maũndũ marĩa atanyĩte gwĩkĩra andũ, na ũrĩa endaga tũikare. (Atũmwo 17:24-27) Jehova Ngai nĩ endaga tũmenye ũhoro wa ma ũmwĩgiĩ.—Thoma 1 Timotheo 2:3, 4.
Ngai agucagĩrĩria andũ arĩa mendete ũhoro wa ma nĩkĩ?
Jehova nĩ Ngai mwene ũhoro ũrĩa wa ma, na aatũmire Mũrũwe Jesu, arute andũ ũhoro wa ma. Kwoguo, andũ arĩa mendete ũhoro wa ma nĩ magucagĩrĩrio harĩ Jesu. (Johana 18:37) Ngai endaga andũ ta acio mamũthathayagie.—Thoma Johana 4:23, 24.
Shaitani ũrĩa Mũcukani nĩ atũmĩte andũ aingĩ matikamenye Ngai na njĩra ya gũtheremia morutani ma maheeni megiĩ Ngai. (2 Akorintho 4:3, 4) Andũ arĩa matendete maũndũ mega nĩ magucagĩrĩrio nĩ morutani ta macio ma maheeni. (Aroma 1:25) No andũ milioni nyingĩ arĩa marĩ na ngoro njega nĩ marathiĩ na mbere kũmenya ũhoro wa ma wĩgiĩ Ngai na njĩra ya kwĩruta Bibilia.—Thoma Atũmwo 17:11.