“Nĩkĩo Kĩarĩ Kĩheo Kĩrĩa Kĩega Mũno Ndanaheo”

Ũguo nĩguo kairĩtu kamwe ka mĩaka 13 koigire thutha wa kũheo kagui. Mũtumia ũmwe mũhũri biacara ũrĩ gatũ oigire atĩ kompiuta ĩrĩa baba wao aamũheire arĩ cukuru nĩ yagarũrire ũtũũro wake. Nake mũthuri ũngĩ wakoretwo ahikania oigire atĩ, kandi ĩrĩa yathondeketwo nĩ mũtumia wake ya kũririkana mwaka ũmwe kuuma mahikania, nĩyo yarĩ kĩheo kĩrĩa kĩega mũno.

O mwaka, andũ aingĩ nĩ mahũthagĩra mahinda na hinya wao magĩcaria kĩheo kĩrĩa “kĩega mũno” mangĩhe mũrata kana mũndũ wa famĩlĩ rĩrĩa kũrĩ na ũndũ wa mwanya. Andũ arĩa aingĩ nĩ merĩgagĩrĩra kũigua ciugo ta iria igwetetwo kĩambĩrĩria-inĩ. Ĩ we nawe? Hihi no wende kũheo kana kũheana kĩheo gĩgũkenerũo?

Ũndũ ũcio no ũkorũo ũrĩ mwega, ti tondũ tu wa ũndũ ũrĩa kĩheo kĩu gĩkũhingia harĩ ũrĩa waheo no nĩ nginya ũrĩa mũheani ekũigua. Makĩria ma ũguo, Bibilia yugaga ũũ: “Kũheana nĩ kũrĩ gĩkeno kĩnene gũkĩra kwamũkĩra.” (Atũm. 20:35) Hatarĩ nganja, gĩkeno kĩrĩa kiumanaga na kũheana no kĩongerereke angĩkorũo ũrĩa ũkũheo kĩheo nĩ egũkĩona kĩrĩ kĩa bata.

O na kũrĩ ũguo-rĩ, ũngĩka atĩa nĩguo inyuerĩ mũkenere? No ona angĩkorũo ndũngĩhota kũheana kĩheo kĩrĩa “kĩega mũno-rĩ,” ũngĩka atĩa nĩguo kĩheo kĩrĩa ũkũheana gĩkenerũo?