Broshua Njerũ Ĩrĩa Ĩkũhũthĩrũo Ũtungata-inĩ!
1. Nĩ kĩĩ tũkaahũthĩra tũkĩhunjia mweri wa Novemba, na muoroto wa broshua ĩyo nĩ ũrĩkũ?
1 Mwaka wa 2009 hĩndĩ ya Kĩrũrũngano kĩa Ngʼongo kĩa “Endeleeni Kukesha!,” nĩ kwoimire broshua ĩtagwo Biblia—Ina Ujumbe Gani? Mweri wa Novemba, ciũngano ciothe thĩinĩ wa thĩ nĩ ikaamĩhũthĩra wĩra-inĩ wa kũhunjia. Hihi broshua ĩno ĩgũteithia andũ arĩa tũrahunjĩria na njĩra ĩrĩkũ? Andũ aingĩ, makĩria a ndini iria itarĩ cia Gĩkristiano, matiũĩ maũndũ maingĩ megiĩ Bibilia. Kwoguo, karatathi-inĩ ga 3, broshua ĩyo nĩ ĩtaarĩirie atĩ, ĩhaarĩirio nĩgetha ĩheane na njĩra ngũhĩ ũhoro ũrĩa ũrĩ thĩinĩ wa Bibilia.
2 . Tũngĩhũthĩra broshua ĩno atĩa tũkĩhunjia?
2 Ũrĩa Ũngĩmĩhũthĩra: No tuuge ũndũ ta ũyũ: “No twende kũigua mawoni maku megiĩ rĩandĩko rĩrĩ. [Thoma 2 Timotheo 3:16.] Andũ aingĩ arĩa twaragia nao nĩ metĩkagia ciugo icio; angĩ nao monaga Bibilia ĩrĩ o ibuku rĩega tu. Wee wĩciragia atĩa igũrũ rĩgiĩ Bibilia? [Eterera acokie.] O ũrĩa tũngĩkorũo twĩtĩkĩtie-rĩ, nĩ harĩ na itũmi njega cia gũthuthuria Bibilia ithuĩ ene. [Thoma kohoro ga kwambĩrĩria karatathi-inĩ ga 3.] Ũgĩthoma ũhoro wa maũndũ marĩa marĩ thĩinĩ wa Bibilia broshua-inĩ ĩno-rĩ, nĩ ũkuona ũndũ wa kũgucĩrĩria mũno: Ũhoro ũrĩa wothe ũrĩ Bibilia-inĩ ũkoragwo na kĩongo kĩmwe na ndũmĩrĩri ĩmwe.”
3 . Nĩ njĩra ĩrĩkũ ĩngĩ tũngĩhũthĩra, makĩria rĩrĩa tũrahunjĩria andũ a ndini itarĩ cia Gĩkristiano?
3 Harĩ njĩra ĩngĩ tũngĩhũthĩra, makĩria rĩrĩa tũraaria na andũ a ndini itarĩ cia Gĩkristiano: “No twende kũigua mawoni maku megiĩ ũrĩa Maandĩko (kana ibuku rĩrĩ itheru) moigĩte haha. [Thoma Thaburi 37:11.] Ũgwĩciria thĩ ĩgaakorũo ĩhaana atĩa rĩrĩa ũrathi ũcio ũkaahinga? [Eterera acokie.] Ĩyo no ngerekano tu ya mwĩhoko ũrĩa andũ a ndũrĩrĩ ciothe na a ndini ciothe mangĩona kuuma Bibilia-inĩ.” Thoma kohoro ga kwambĩrĩria karatathi-inĩ ga 3 na ũmũtigĩre broshua ĩyo.
4 . Tũngĩhũthĩra broshua ĩno atĩa kwambĩrĩria kwĩruta Bibilia na andũ?
4 Ambĩrĩria Kwĩruta Bibilia na Andũ: Rĩrĩa twacokera andũ no tũmaririkanie maũndũ marĩa twaarĩrĩirie hingo ĩyo ĩngĩ, na tũcoke twarĩrĩrie kĩbungo kĩmwe kana igĩrĩ tũkĩhũthĩra ciũria iria irĩ mũthia-inĩ wa gacunjĩ karĩa tũgũthuura. Kana angĩkorũo tũkwenda kũhũthĩra ibuku Bibilia Ĩrutanaga ĩmwe kwa ĩmwe, no tũthome hamwe nake karatathi ka mũthia ka broshua ĩyo, tũcoke tũmũnengere ibuku rĩu, tũmũũrie gĩcunjĩ kĩrĩa kĩramũkenia, na twarĩrĩrie kĩbungo kĩmwe kana igĩrĩ gĩcunjĩ-inĩ kĩu. Rekei ithuothe twĩrutanĩrie biũ kũhũthĩra broshua ĩno tũkĩhunjia mweri wa Novemba!