Kũhũthĩra Broshua ya Ũhoro Mwega Tũkĩrutana
1. Broshua ya Ũhoro Mwega ĩhaarĩirio atĩa?
1 O ta ũrĩa twarĩrĩirie thĩinĩ wa Ũtungata Witũ wa Ũthamaki wa Julaĩ, broshua ya Ũhoro Mwega Kuuma Kũrĩ Ngai! nĩ ĩmwe ya indo iria cia bata harĩ kũrutana. Nĩguo ene nyũmba makenere gwĩthomera Kiugo kĩa Ngai, ciugo cia maandĩko marĩa monanĩtio iticabĩtwo. O na gũtuĩka mabuku maingĩ maitũ ma kũrutana mandĩkĩtwo na njĩra andũ mangĩĩthomera o ene, broshua ĩno ĩhaarĩirio nĩguo mũhunjia amĩarĩrĩrie na mwene nyũmba. Nĩ ũndũ ũcio, rĩrĩa tũramĩtigĩra mwene nyũmba, twagĩrĩirũo kũgeria kũmuonia ũrĩa twĩkaga nĩguo agucĩrĩrio nĩ kwĩruta ũhoro mwega wa Bibilia.—Mat. 13:44.
2. Tũngĩhũthĩra atĩa broshua Ũhoro Mwega riita rĩa mbere rĩrĩa twaceerera mwene nyũmba?
2 Riita rĩa mbere. No ũmwĩre ũũ: “Tondũ andũ nĩ meyũragia kũrĩa thĩ ĩno ĩrorete-rĩ, hihi nĩ ũgwĩciria nĩ kũrĩ hĩndĩ maũndũ makaagĩra? [Eterera acokie.] Bibilia nĩ ĩkoragwo na ũhoro mwega ũngĩtũhee mwĩhoko. Ta rora ciũria imwe iria Bibilia ĩcoketie.” Nengera mwene nyũmba broshua na ũmũũrie athuure kĩũria kĩmwe mwena wa thutha. Ũcoke ũmuonie ũrĩa tũrutanaga ũkĩhũthĩra kĩbungo kĩa mbere kĩa ithomo rĩrĩa athuura. Ningĩ no ũrie mwene nyũmba kĩũria kĩragucĩrĩria kuuma ithomo rĩrĩa wee mwene ũthuurĩte, ũcoke ũmuonie ũrĩa broshua ĩyo ĩngĩmũteithia kuona macokio ma Bibilia. Ahunjia amwe nĩ monagia mwene nyũmba video thĩinĩ wa jw.org angĩkorũo nĩ kũrĩ ĩkonainie na ithomo rĩu.
3. Taarĩria ũrĩa tũngĩruta mũndũ Bibilia tũkĩhũthĩra broshua ya Ũhoro Mwega.
3 Kũrutana: (1) Thoma kĩũria kĩmwe kĩa iria nyandĩke na rangi mũmata nĩguo mwene nyũmba amenye kĩrĩa mũraarĩrĩria. (2) Thoma kĩbungo. (3) Thoma maandĩko marĩa mainamĩtio, na ũmũrie ciũria na njĩra ya ũgĩ nĩguo ũmũteithie kuona ũrĩa maandĩko macio maracokia kĩũria kĩrĩa mũraarĩrĩria. (4) Angĩkorũo kĩũria kĩu nĩ kĩhutĩtie kĩbungo kĩngĩ, cokera ikinya rĩa 2 na rĩa 3. Angĩkorũo nĩ kũrĩ video ĩratwarana na kĩũria gĩkĩ na ndũmĩonetie mwene nyũmba gũkinyĩria haha, no ũmĩonanie rĩu ndeereti-inĩ yanyu. (5) Marigĩrĩrio-inĩ, nĩguo wĩkĩre mũkonde atĩ mwene nyũmba nĩ anyita, mwĩre akũhe macokio ma kĩũria kĩrĩa mũraarĩrĩria.
4. Nĩ ũndũ ũrĩkũ ũrĩtũteithagia kũhũthĩra broshua ĩno wega?
4 Menya wega broshua ĩno ya bata. Mĩhũthĩre hĩndĩ o yothe njagĩrĩru. Mbere ya gũthoma na mũrutwo ithomo o rĩothe, amba wĩcirie mabataro make na wĩcirie njĩra ĩrĩa njega makĩria ũngĩaria nake ũkĩhũthĩra maandĩko marĩa marĩ thĩinĩ wa ithomo. (Thim. 15:28; Atũm. 17:2, 3) O ũrĩa ũgũthiĩ ũkĩgĩaga na ũmenyeru na ũhoti makĩria, nĩ ũkuona broshua ĩno ĩrĩ ĩmwe ya indo iria njega mũno cia kũhũthĩra ũkĩruta andũ ma!