Kwagagĩria Ũtungata Witũ—Kwambĩrĩria Wĩruti wa Bibilia Mũrango-inĩ Ũkĩhũthĩra Broshua ya Ũhoro Mwega Kuuma Kũrĩ Ngai!
Ũndũ Ũcio nĩ wa Bata Nĩkĩ? No mũhaka tũkorũo tũrĩ arutani a Kiugo kĩa Ngai, nĩguo tũtue andũ arutwo. (Mathayo 28:19, 20) Ithuothe no tũhote kũrutana ũhoro ũrĩa wa ma na njĩra ĩrĩa yagĩrĩire tũngĩhũthĩra indo iria tũheetwo. Broshua ya Ũhoro Mwega Kuuma Kũrĩ Ngai!, ĩhaarĩrĩirio nĩguo ĩtũteithie kũrutana ũhoro ũrĩa wa ma. O na no tũmĩhũthĩre kwambĩrĩria kwĩruta Bibilia na mũndũ mũrango-inĩ twamũhunjĩria rĩa mbere.
Geria Gwĩka ũũ Mweri-inĩ Ũyũ:
Hoya ũgĩe na wendi wa kwĩruta Bibilia na mũndũ. Thaitha Jehova agũteithie ũtuĩke mũrutani mwega wa ũhoro ũrĩa wa ma, na wone mũndũ ũrenda kwĩruta Bibilia.—Afil. 2:13.
Hĩndĩ ya ũthathaiya wa famĩlĩ kana wĩruti waku kĩũmbe, hũthĩra mahinda kwĩmenyeria kĩonereria kĩrĩa ũkahũthĩra. Ũngĩka ũguo, nĩ ũkũhota kwaria ũrĩ na ũũma na ũhote kwambĩrĩria wĩruti wa Bibilia na mũndũ mũrango-inĩ.