Rekei Tuonanie Ngatho Ciitũ
Kĩririkano Gĩgakorũo Ĩpuro 17
1. Nĩ ciugo irĩkũ cia mwandĩki wa Thaburi ciagĩrĩire mũno makĩria ihinda rĩrĩ rĩa Kĩririkano?
1 Agĩtindĩkĩrĩrio nĩ ciĩko nyingĩ cia tha na cia kũhonokania cia Jehova, mwandĩki wa Thaburi oririe ũũ: “Nĩ kĩ ngũthukĩra [ngũrĩha] Jehova nakĩo nĩ ũndũ wa wega wake wothe ũrĩa anjĩkĩte?” (Thab. 116:12) Ũmũthĩ, ndungata cia Ngai nĩ ikoragũo na itũmi nyingĩ makĩria cia gũcokia ngatho. Mĩaka mĩingĩ thutha wa ciugo icio kwandĩkwo, Jehova nĩ aheire andũ kĩheo kĩnene mũno — ũkũũri. O tũkĩĩhaaragĩria gũkũngũĩra gĩkuũ gĩa Kristo Ĩpuro 17, tũrĩ na itũmi njega cia gũcokia ngatho ciitũ.—Kol. 3:15.
2. Itũmi imwe iria itũmaga tũcokie ngatho nĩ ũndũ wa ũkũũri nĩ irĩkũ?
2 Irathimo Iria Ciumanaga na Ũkũũri: Nĩ ũndũ wa ũkũũri, nĩ kũhotekaga ‘tũrekerũo mehia maitũ.’ (Kol. 1:13, 14) Ũndũ ũyũ ũtũteithagia gũthathaiya Jehova tũrĩ na thamiri theru. (Ahib. 9:13, 14) No tũkenere ũmĩrĩru wa kwaria na Jehova, rĩrĩa tũrahoya. (Ahib. 4:14-16) Arĩa marĩ na wĩtĩkio harĩ ũkũũri nĩ makoragwo na kĩĩrĩgĩrĩro kĩa muoyo wa tene na tene!—Joh. 3:16.
3. Tũngĩonania atĩa ngatho ciitũ harĩ Jehova nĩ ũndũ wa ũkũũri?
3 Ũrĩa Tũngĩonania Ngatho Ciitũ: Njĩra ĩmwe tũngĩonania ngatho ciitũ nĩ gũtwarana na ũthomi wa Bibilia wa Kĩririkano o mũthenya na gwĩcũrania. Thĩinĩ wa ngathĩti ya Mnara wa Mlinzi ya Februarĩ 1, 2011 harĩ na ũhoro ũrĩ na kĩongo gĩkĩ “Je, Umejitayarisha kwa Ajili ya Siku Muhimu Zaidi Katika Mwaka?” wahaarĩirio ũtũteithie twĩke ũguo. O na no twĩre Jehova kũgerera mahoya ũrĩa tuonaga ũkũũri ũrĩ wa bata. (1 Thes. 5:17, 18) Gũkorũo kuo hĩndĩ ya gũkũngũĩra Kĩririkano, arĩ ta njĩra ya gwathĩkĩra rĩathani rĩa Jesu kuonanagia ngatho ciitũ. (1 Kor. 11:24, 25) O na makĩria, no twĩgerekanie na Jehova harĩ kuonania wendo wake mũnene na twĩte andũ aingĩ o ũrĩa tũngĩhota magaakorũo hamwe na ithuĩ.—Isa. 55:1-3.
4. Itua riitũ rĩagĩrĩirũo gũkorũo rĩrĩ rĩrĩkũ?
4 Ndungata cia Jehova iria irĩ ngatho itikuona gũkũngũĩra Kĩririkano ta arĩ o mũcemanio ta ĩrĩa ĩngĩ. Nĩguo mũcemanio wa bata mũno thĩinĩ wa mwaka! O ũrĩa Kĩririkano kĩrakuhĩrĩria, reke tũtue itua ta rĩa mwandĩki wa Thaburi ũrĩa waandĩkire ũũ: “Ngoro yakwa, kĩgathe Jehova, na ndũkariganĩrũo nĩ wega o na ũmwe marĩa agwĩkaga.”—Thab. 103:2.