“Ĩkagai Ũũ” Tũgaakũngũĩra Kĩririkano Ĩpuro 5
1. Gĩkũngũĩro gĩa Kĩririkano nĩ kĩa bata mũno nĩkĩ?
1 “Ĩkagai ũũ nĩ getha mũndirikanage.” (Luk. 22:19) Jesu aahũthĩrire ciugo icio gwatha arũmĩrĩri ake makũngũyagĩre gĩkuũ gĩake kĩa igongona. Nĩ ũndũ wa maũndũ mothe marĩa maahingirio nĩ ũkũũri ũcio, gũtirĩ mũthenya ũngĩ wa bata kana mũnene harĩ Akristiano gũkĩra wa gũkũngũĩra Kĩririkano kĩa o mwaka. O ũrĩa gĩkũngũĩro kĩa mwaka ũyũ Ĩpuro 5 kĩrakuhĩrĩria-rĩ, tũngĩonania ngatho ciitũ harĩ Jehova na njĩra ĩrĩkũ?—Kol. 3:15.
2. Tũngĩonania ngatho ciitũ atĩa harĩ Kĩririkano kũgerera kwĩruta na gwĩcũũrania?
2 Wĩhaarĩrie: Kaingĩ nĩ twĩhaaragĩria nĩ ũndũ wa maũndũ marĩa tuonaga marĩ ma bata. No tũhaarĩrie ngoro ciitũ nĩ ũndũ wa Kĩririkano na njĩra ya gũthoma tũrĩ famĩlĩ maũndũ marĩa meekĩkire matukũ-inĩ ma mũico ma ũtũũro wa Jesu gũkũ thĩ na tũcoke twĩcũranie ũhoro wamo. (Ezar. 7:10) Thĩinĩ wa kalenda na thĩinĩ wa Kuyachunguza Maandiko Kila Siku, harĩ na gĩcunjĩ kĩrĩ na maandĩko mamwe, na thĩinĩ wa ngathĩti ya Mnara wa Mlinzi ya Februarĩ 1, 2011, karatathi ka 23-24 harĩ na gĩcunjĩ kĩrĩ na maandĩko maingĩ makĩria marĩa matwaranĩte na icunjĩ cia ibuku rĩa Mtu Mkuu.
3. Tũngĩonania ngatho ciitũ atĩa nĩ ũndũ wa Kĩririkano na njĩra ya kuongerera ũtungata witũ?
3 Hunjia: Ningĩ no tuonanie ngatho ciitũ na njĩra ya kũhũthĩra mahinda maingĩ o ũrĩa kũngĩhoteka wĩra-inĩ wa kũhunjia. (Luk. 6:45) Nĩ gũgaakorũo na wĩra wa mwanya thĩinĩ wa thĩ yothe wa gwĩta andũ magoka Kĩririkano ũrĩa ũkaambĩrĩria Njuuma, Machi 17. Hihi no ũbange maũndũ maku wega nĩguo ũkaahũthĩra mathaa maingĩ makĩria thĩinĩ wa ũtungata, na kũngĩhoteka ũrĩ painia wa gũteithĩrĩria? Na githĩ to mwarĩrĩrie ũndũ ũcio hĩndĩ ya hwaĩ-inĩ ũrĩa ũroka wa Ũthathaiya wanyu wa Famĩlĩ?
4. Tũngĩgunĩka atĩa nĩ ũndũ wa gũkũngũĩra Kĩririkano?
4 Na githĩ tũtigunĩkaga mũno nĩ gũkũngũĩra Kĩririkano o mwaka! Gĩkeno giitũ na wendo witũ harĩ Ngai nĩ wongererekaga twecũrania ũhoro wa ũtugi wa Jehova wa kũruta Mũriũ wake wa mũmwe atuĩke igongona. (Joh. 3:16; 1 Joh. 4:9, 10) Ũndũ ũcio ũtũhatagĩrĩria tũtigatũũre nĩ ũndũ witũ ithuĩ ene. (2 Kor. 5:14, 15) Ningĩ ũndũ ũcio nĩ ũrurumũraga merirĩria maitũ ma kũgooca Jehova na njĩra ya kũhunjia. (Thab. 102:19-21) Ma nĩ atĩ, nĩ ũndũ wa kuonania ngatho ndungata cia Jehova nĩ ciĩriragĩria mũno mweke ũrĩa tũgaakorũo naguo wa ‘kuumbũra ũhoro wa gũkua kwa Mwathani’ hĩndĩ ya gĩkũngũĩro gĩa Kĩririkano Ĩpuro 5.—1 Kor. 11:26.