Wĩharĩrĩrie Kĩririkano ũrĩ na Ngoro ĩna Gĩkeno
1. Ihinda rĩa Kĩririkano nĩ hĩndĩ ya mwanya ya gwĩka atĩa?
1 Kĩririkano mũthenya wa Njumaine, Machi 26, nĩ gĩgaatũhe mweke mwega mũno wa kuonania ngatho citũ nĩ ũndũ wa ũrĩa Ngai eekire nĩguo atũhonokie. (Isa. 61:10) O na mbere ya Kĩririkano kĩu, gũkorũo na ngoro ĩrĩ na gĩkeno no gũtũteithie kwĩhaarĩria wega. Tũngĩka ũguo atĩa?
2. Nĩ ũndũ ũrĩkũ ũtũhatagĩrĩria twĩhaarĩrie nĩ ũndũ wa Kĩririkano?
2 Kwĩharĩria nĩ Ũndũ wa Kĩririkano kĩu: Irio cia Hwaĩ-inĩ cia Mwathani nĩ Kĩririkano kĩa bata ĩndĩ gĩtakoragwo na maũndũ maingĩ. No nĩ kũbataranagia mĩbango ya kabere nĩguo maũndũ ma bata matikariganĩre. (Thim. 21:5) No mũhaka gũkorũo na mĩbango ya thaa na kũndũ kwega gwa gũcemanĩria. Mũgate na ndibei ĩrĩa yagĩrĩire nĩ ibataraga kũhaarĩrio. Harĩa hagaacemanĩrio nĩ habataraga gũtherio na kũhaarĩrio. Mwaria nĩ abataraga kwĩhaarĩria wega, nao anyitani ũgeni na arĩa makaanenganĩrĩria mũgate na ndibei mataarĩrio ũrĩa mageeka. Hatarĩ nganja maingĩ ma maũndũ macio nĩ meke nginyagia rĩu. Ngatho citũ kwerekera ũkũũri nĩ itũtindĩkaga twĩhaarĩrie wega nĩ ũndũ wa Kĩririkano kĩu kĩa mwanya.—1 Pet. 1:8, 9.
3. Tũngĩhaarĩria ngoro citũ atĩa nĩ ũndũ wa Irio cia Hwaĩ-inĩ cia Mwathani?
3 Kũhaarĩria Ngoro: Ningĩ nĩ wega kũhaarĩria ngoro citũ nĩguo tũtaũkĩrũo biũ nĩ bata wa Kĩririkano. (Ezar. 7:10) Nĩ ũndũ ũcio, nĩ twagĩrĩirũo gũcaria ihinda rĩa ũthomi wa mwanya wa Bibilia wa hĩndĩ ya Kĩririkano tũcoke twĩcũranie igũrũ rĩgiĩ matukũ ma mũthia ma Jesu gũkũ thĩ. Gwĩcũrania ũrĩa Jesu eeimire nĩ kũrĩtũtindĩkaga kwĩgerekania nake.—Gal. 2:20.
4. Nĩ ũguni ũrĩkũ wa ũkũũri ũkũrehagĩra gĩkeno kĩnene makĩria?
4 Gĩkuũ kĩa Jesu nĩ gĩtũgĩragia ũnene wa Jehova na gĩgakũũra andũ kuuma mehia-inĩ na gĩkuũ. (1 Joh. 2:2) Nĩ kĩhingũraga njĩra ya kũgĩa na ũrata na Ngai na ya muoyo wa tene na tene. (Kol. 1:21, 22) Ningĩ nĩ gĩtũteithagia gwĩkĩra hinya itua ritũ rĩa gũikara kũringana na wĩyamũrĩri witũ harĩ Jehova na gũtũũra twĩhandĩte tũrĩ arutwo a Kristo. (Mat. 16:24) Ũkĩĩhaarĩria na wathiĩ Kĩririkano-inĩ kĩrĩa kĩroka-rĩ, reke gĩkeno gĩaku kĩongerereke!