Hihi nĩ Ũkuoya Mweke Ũyũ?
Kĩririkano Kĩrĩa Gĩũkĩte nĩ Kĩratũhe Mweke wa Kuonania Ngatho
1. Kĩririkano gĩgaatũhe mweke ũrĩkũ wa mwanya?
1 Kĩririkano kĩrĩa gĩgeekwo Ĩpuro 14 nĩ kĩratũhe mweke wa mwanya wa gũkũria na kuonia Jehova ngatho citũ nĩ ũndũ wa wega wake. Rĩandĩko rĩa Luka 17:11-18 nĩ rĩonanagia atĩ Jehova na Jesu nĩ makenaga rĩrĩa andũ maramacokeria ngatho. Harĩ arĩa ikũmi maahonirio mangũ, no ũmwe tu woire mweke wa gũcokia ngatho. Mahinda mokĩte, kĩheo gĩa ũkũũri nĩ gĩgaatũhotithia gũtũũra tũtekũrũara na tũtũũre tene na tene. Hatarĩ nganja, hĩndĩ ĩyo nĩ tũgaacokagĩria Jehova ngatho o mũthenya nĩ ũndũ wa irathimo icio. No hihi tũngĩonania ngatho citũ atĩa ciumia ici itigarĩte?
2. Tũngĩkũria atĩa wendi wa gũcokia ngatho?
2 Kũria Wendi: Gwĩcũrania no gũtũhatĩrĩrie tũcokie ngatho. Mũtaratara wa ũthomi wa Bibilia wa Kĩririkano, no woneke kũndũ gũtiganĩte ta ũhoro-inĩ muongerere namba B12 thĩinĩ wa New World Translation ya 2013, kalenda, na ibuku-inĩ rĩa Gũthuthuria Maandĩko o Mũthenya. Na githĩ ti wega kwarĩrĩria ũhoro ũcio tũrĩ famĩlĩ? Gwĩka ũguo no gũtũhatĩrĩrie gũcokia ngatho nĩ ũndũ wa ũkũũri, o na gũtũme mĩthiĩre iitũ yaagĩre.—2 Kor. 5:14, 15; 1 Joh. 4:11.
3. Tũngĩonania ngatho na njĩra irĩkũ hĩndĩ ya Kĩririkano?
3 Onania Ngatho: Ngatho cionanagio kũgerera ciĩko. (Kol. 3:15) Mũndũ ũrĩa warĩ mũrũaru mangũ, nĩ eerutanĩirie gwetha Jesu nĩguo amũcokerie ngatho. Hatarĩ nganja, nĩ ũndũ wa gĩkeno kĩrĩa aarĩ nakĩo nĩ aaheire andũ ũhoro wa ũrĩa aahonirio. (Luk. 6:45) Na githĩ ti wega tuonanie ngatho citũ nĩ ũndũ wa ũkũũri na njĩra ya kũnyitanĩra kambĩini-inĩ ya Kĩririkano? Njĩra ĩngĩ ya kuonania ngatho, nĩ kuoya ũpainia wa gũteithĩrĩria kana kwandandũra ũtungata witũ hĩndĩ ya Kĩririkano. Ningĩ nĩ wega andũ moka Kĩririkano, tũmanyite ũgeni na tũmacokerie ciũria iria hihi mangĩkorũo nacio.
4. Tũngĩka atĩa tũtikanae kũũrũo nĩ mweke wa mwanya wa Kĩririkano gĩkĩ gĩũkĩte?
4 Hihi no kũhoteke Kĩririkano gĩkĩ nĩkĩo kĩa mũthia? (1 Kor. 11:26) Tũtingĩmenya. Ũrĩa tũĩ nĩ atĩ kĩahĩtũka, o naguo mweke ũcio wa mwanya wa kuonania ngatho nĩ ũkora. Hihi wee nĩ ũkoya mweke ũcio? Rekei ciugo cia tũnua twitũ, o na gwĩcũrania kwa ngoro ciitũ, gũkenie Jehova o we Mũheani wa ũkũũri.—Thab. 19:14.