Teithĩrĩria Mwene Nyũmba Gwĩciria
1. Nĩ njĩra ĩrĩkũ njega makĩria ya kwambĩrĩria ndeereti ũtungata-inĩ?
1 Nĩ njĩra ĩrĩkũ ya kwambĩrĩria ndeereti ũtungata-inĩ ĩkoragwo na moimĩrĩro mega makĩria—nĩ ya mũndũ kũringĩrĩria andũ mawoni make kana nĩ ĩrĩa ĩrateithĩrĩria mwene nyũmba gwĩciria nĩguo agĩe na mawoni marĩa magĩrĩire? Mũtũmwo Paulo nĩ aahũthĩrire njĩra ĩyo ya kerĩ rĩrĩa aaragia na Ayahudi a Thesalonike, na ‘amwe ao, magĩtuĩka a thiritũ ya Paulo na Sila.’ (Atũm. 17:2-4) Nĩ maũndũ marĩkũ makonainie na kũrutĩra andũ ihooto rĩrĩa ũramateithĩrĩria gwĩciria?
2. Tũngĩĩgerekania atĩa na kĩonereria kĩa Paulo rĩrĩa aahunjagia ũhoro mwega?
2 Wĩcirie Ũhoro wa Maũigwi Make na Mawoni Make Kwerekera Maũndũ Matiganĩte: Kũhũthĩra njĩra ya kũruta ihooto nĩ kũbataraga gwĩciria maũigwi ma andũ thĩinĩ wa itũũra rĩrĩa tũhunjagia. Paulo aambĩrĩirie mĩario yake na Ayunani arĩa maarĩ Areopago arĩa mateetĩkĩtie na njĩra ya kũgweta maũndũ marĩa moĩ na meetĩkĩrĩte. (Atũm. 17:22-31) Kwoguo, rĩrĩa ũrehaarĩria kwambĩrĩria ndeereti, wĩcirie maũndũ marĩa andũ metĩkĩtie na mawoni matagĩrĩire marĩa makoragwo namo thĩinĩ wa gĩcigo kĩrĩa mũhunjagia. (1 Kor. 9:19-22) Angĩkorũo mwene nyũmba nĩ ekũrehe maũndũ mekũgiria ndeereti ĩthiĩ na mbere, geria gwetha maũndũ marĩa mũkũiguithanĩria, na ũmatue mũthingi wa ndeereti yanyu.
3. Tũngĩteithĩrĩria andũ atĩa gwĩciria na njĩra njega makĩrĩria tũkĩhũthĩra ciũria na njĩra ya ũũgĩ?
3 Hũthĩra Ciũria na Njĩra ya Ũũgĩ: Tũtingĩhota gũteithia mũndũ ũrenda gĩthiĩ handũ hana angĩkorũo tũtiũĩ harĩa arĩ. Ũndũ ũmwe na ũguo, tũtingĩhota gũteithia mwene nyumba agĩe na woni ũrĩa wagĩrĩire thengia tu tũkorũo tũũĩ woni ũrĩa arĩ naguo ihinda-inĩ rĩu. Mbere ya kũruta ihooto akĩaria na athikĩrĩria ake, Jesu kaingĩ oragia ciũria nĩguo amenye maũndũ marĩa meeciragia. Kwa ngerekano, rĩrĩa mũndũ ũmwe oririe Jesu “Ngwĩka atĩa nĩ getha ngagaĩrũo muoyo ũtagathira?,” Jesu aambire kũũria mawoni ma mũndũ ũcio mbere ya kũmũcokeria. (Luk. 10:25-28) Hĩndĩ ĩngĩ, rĩrĩa Petero aaheanire macokio mataarĩ mega, Jesu aahũthĩrire ciũria na njĩra ya ũũgĩ kũrũnga mwĩcirĩrie wake. (Mat. 17:24-26) Kwoguo, angĩkorũo mwene nyũmba nĩ oria kĩũria kana ataarĩria woni wake ũtagĩrĩire, no tũhũthĩre ciũria kũmũteithĩrĩria gwĩciria igũrũ rĩgiĩ ũndũ ũcio.
4. Twagĩrĩirũo kũgeria gũteithĩrĩria mwene nyũmba gwĩciria nĩkĩ?
4 Rĩrĩa twateithĩrĩria mwene nyũmba gwĩciria, twĩgerekanagia na Mũrutani Ũrĩa Mũnene, Jesu, o hamwe na ahunjia arĩa maarĩ na ũũgĩ karine-inĩ ya mbere. Na njĩra ĩyo tũgakorũo tũkĩonia mwene nyũmba gĩtĩo. (1 Pet. 3:15) Moimĩrĩro no makorũo arĩ mwene nyũmba gwĩtĩkĩra tũgaacoka hingo ĩngĩ.