Hihi Wee nĩ Ũreruta Maũndũ Mothe o Ũrĩa Ũngĩhota Kuuma Kũrĩ Jehova?
1. Jehova aiguaga atĩa igũrũ rĩgiĩ gĩthomo?
1 Jehova, “Mũrutani witũ Mũnene,” nĩ endaga tũkorũo tũrĩ andũ athomu. (Isa. 30:20, NW) Aambĩrĩirie kũrutana thutha wa kũũmba Mũrũ wake wa mbere. (Joh. 8:28) Thutha wa ũremi wa Adamu, Jehova ndaatigire kũrutana, ĩndĩ arĩ na wendo no aathire na mbere kũruta andũ matarĩ akinyanĩru.—Isa. 48:17, 18; 2 Tim. 3:14, 15.
2. Nĩ mũtaratara ũrĩkũ mũnene wa gĩthomo ũrathiĩ na mbere?
2 Ũmũthĩ, Jehova nĩ aratongoria mũtaratara ũrĩa mũnene mũno wa gĩthomo ũrĩ wonwo. O ta ũrĩa kwarathĩtwo nĩ Isaia, andũ milioni nyingĩ thĩ yothe mararũrũngana merekeire “kĩrĩma kĩrĩa nyũmba ya Jehova yakĩtwo.” (Isa. 2:2) Marathiĩ gwĩka atĩa? Kũrutwo njĩra cia Ngai, kũrutwo nĩ Jehova! (Isa. 2:3) Mwaka-inĩ wa ũtungata wa 2010, Aira a Jehova nĩ maahũthĩrire makĩria ma mathaa bilioni 1.6 kũhunjia na kũruta andũ ma ya Bibilia. Makĩria ma ũguo, o kiumia maũndũ ma kĩĩroho nĩ marutanagwo thĩinĩ wa makĩria ma ciũngano 105,000 thĩ yothe, na mabuku ma Gĩkristiano makarutwo nĩ ngombo ĩrĩa ĩĩhokekete na njũgĩ na thiomi ikĩrĩte 500.
3. Wee kĩũmbe ũgunĩkĩte atĩa kuumana na gĩthomo kĩrĩa Jehova aheanaga?
3 Gunĩka Biũ: Nĩ tũgunĩkĩte mũno nĩ gĩthomo kĩrĩa Ngai atũheaga! Nĩ twĩrutĩte atĩ Ngai nĩ arĩ rĩĩtwa na nĩ atũrũmbũyagia. (Thab. 83:18; 1 Pet. 5:6, 7) Nĩ tuonete macokio ma ciũria imwe cia bata mũno ũtũũro-inĩ: Nĩ kĩĩ gĩtũmaga andũ manyamarĩke na makue? Ingĩona gĩkeno kĩa ma atĩa? Muoroto wa ũtũũro nĩ ũrĩkũ? Jehova nĩ atũheete ũtongoria wa mĩtugo ũrĩa ‘ũtũmaga tũgaacĩre.’—Josh. 1:8.
4. Nĩ mĩeke ĩrĩkũ ya ũrutani Jehova aheete ndungata ciake, na nĩkĩ twagĩrĩirũo kwĩruta maũndũ marĩa mothe tũngĩhota kuuma kũrĩ we?
4 Makĩria ma ũguo, Jehova nĩ aheanaga gĩthomo gĩtiganĩte kĩa mwanya nĩguo ateithie ndungata imwe ciake ciandandũre ũtungata wacio harĩ we. Karatathi ga 4-6 nĩ kagwetete mĩeke ĩrĩa andũ amwe mangĩkinyĩra. O na angĩkorũo maũndũ maitũ nĩ maratũgirĩrĩria kũgunĩka biũ na ũrutani ũcio ũgwetetwo-rĩ, hihi nĩ tũrageria gũteithĩka biũ kuumana na ũrutani wa Ngai ũrĩa tũngĩhota gũkinyĩra? Hihi nĩ tũrekĩra ngoro andũ ethĩ, arĩa matindĩkagĩrĩrio nĩ aarimũ ao na andũ angĩ mathingate gĩthomo kĩa igũrũ, meigĩre mĩoroto ya kĩĩroho ĩgiĩ ũrutani mwega makĩria ũrĩa arĩ guo gĩthomo kĩrĩa Jehova aheanaga? Kwĩruta maũndũ mothe o ũrĩa tũngĩhota kuuma kũrĩ Jehova nĩ gũgũtũteithia tũgĩe na ũtũũro ũrĩ na gĩkeno rĩu na tene na tene.—Thab. 119:105; Joh. 17:3.
Mĩeke Ĩmwe ya Gĩthomo Ĩrĩa Ithondeka rĩa Jehova Rĩheanaga
Kwĩruta Gũthoma na Kwandĩka
• Muoroto: Nĩ kũruta andũ gũthoma na kwandĩka nĩguo mahote kũgĩa na wĩruti wa Bibilia wao kĩũmbe na marute arĩa angĩ ma ya Bibilia.
• Ihinda: Kũringana na ũrĩa kũngĩbatarania.
• Kũrĩa Kũrutanagĩrũo: Nyũmba-inĩ ya Ũthamaki ĩrĩa ĩrĩ itũũra-inĩ rĩu.
• Arĩa Mangĩyandĩkithia: Ahunjia othe na andũ arĩa marenda kwĩruta Bibilia.
• Ũrĩa Mũndũ Angĩyandĩkithia: Athuri a kĩũngano nĩ mabangaga irathi cia kwĩruta kũringana na mabataro ma kwao, na nĩ mekĩraga ngoro andũ othe arĩa mangĩgunĩka moke.
Cukuru ya Ũtungata wa Gĩtheokrasi
• Muoroto: Nĩ kũmenyeria ahunjia nĩguo mahote kũhunjia na kũrutana ũhoro ũrĩa mwega na njĩra ĩrĩ na moimĩrĩro mega.
• Ihinda: Nĩ cukuru ĩthiaga na mbere hingo ciothe.
• Kũrĩa Kũrutanagĩrũo: Nyũmba-inĩ ya Ũthamaki ĩrĩa ĩrĩ itũũra-inĩ rĩanyu.
• Arĩa Mangĩyandĩkithia: Ahunjia othe. Ningĩ, andũ angĩ arĩa manyitanagĩra na kĩũngano, na metĩkanĩtie na ũrutani wa Bibilia, na maratũũra kũringana na mawatho ma Gĩkristiano.
• Ũrĩa Mũndũ Angĩyandĩkithia: Aria na mũrori wa Cukuru ya Ũtungata wa Gĩtheokrasi.
Kĩrathi kĩa Rũthiomi Rũgeni
• Muoroto: Kũruta ahunjia ũrĩa mangĩhunjia ũhoro mwega na rũthiomi rũgeni.
• Ihinda: Mĩeri ĩna kana ĩtano. Kaingĩ irathi icio ikoragwo irĩ cia Njuuma rũcinĩ ithaa rĩmwe kana mathaa merĩ.
• Kũrĩa Kũrutanagĩrũo: Nyũmba ya Ũthamaki ĩrĩa ĩrĩ hakuhĩ.
• Arĩa Mangĩyandĩkithia: Ahunjia marĩ na mĩtugo mĩega ya Gĩkristiano na marenda kũhunjagia na rũthiomi rũgeni.
• Ũrĩa Mũndũ Angĩyandĩkithia: Irathi ibangagwo nĩ wabici ya rũhonge kũringana na ũrĩa kũngĩbatarania.
Gwaka Nyũmba cia Ũthamaki
• Muoroto: Gwaka Nyũmba cia Ũthamaki na gũthondeka kũrĩa ithũkangĩte. Ĩno ti cukuru, no thĩinĩ wa mũbango ũyũ erutĩri nĩ marutagwo maũndũ matiganĩte nĩguo mahote gũteithia wĩra-inĩ ũcio wa gwaka.
• Ihinda: Kũringana na maũndũ ma mwĩrutĩri.
• Kũrĩa Kũrutanagĩrũo: Kũndũ guothe kũrĩa Kamĩtĩ ya Mĩako ĩrũgamĩrĩire kana kũndũ kũngĩ rĩrĩa mũndũ aratungata arĩ Gĩkundi-inĩ gĩa Gwaka Nyũmba cia Ũthamaki. Erutĩri amwe no morio mateithie kũndũ kũngĩ kũraya kũrĩa kũgũmĩirũo nĩ gĩcanjama.
• Kwagĩrĩra: Aarĩ na ariũ a Ithe witũ mabatithĩtio na mahĩtũkĩtio nĩ kĩama kĩa athuri a kĩũngano. No makorũo moĩ kana matoĩ wĩra wa gwaka.
• Ũrĩa Mũndũ Angĩyandĩkithia: Iyũria bomu ya Kingdom Hall Volunteer Worker Questionnaire (S-82) kana Maombi ya Kuwa Mjitoleaji wa Ujenzi wa Majumba ya Ufalme (A-25) iria iheanagwo nĩ athuri a kĩũngano.
Cukuru ya Ũtungata wa Ũpainia
• Muoroto: Gũteithia mapainia ‘mahingie ũtungata’ wao biũ.—2 Tim. 4:5.
• Ihinda: Ciumia igĩrĩ.
• Kũrĩa Kũrutanagĩrũo: Wabici ya rũhonge nĩyo yugaga kũrĩa ĩgwĩkĩrũo; na kaingĩ ĩkagĩrũo Nyũmba-inĩ ya Ũthamaki ĩrĩa ĩrĩ hakuhĩ.
• Kwagĩrĩra: Arĩa makoretwo marĩ mapainia a hĩndĩ ciothe kwa ihinda rĩa mwaka ũmwe.
• Kwĩyandĩkithia: Mapainia arĩa magĩrĩire mandĩkithagio na makamenyithio nĩ mũrori wao wa mũthiũrũrũko.
Cukuru ya Arĩa Metwo Gũtungata Betheli
• Muoroto: Cukuru ĩno, nĩ ya gũteithia arĩa metwo Betheli nĩguo mahote kũgaacĩrithia ũtungata wao.
• Ihinda: Ithaa rĩmwe o kiumia kwa ihinda rĩa ciumia ikũmi na ithathatũ.
• Kũrĩa Kũrutanagĩrũo: Betheli.
• Kwagĩrĩra: No mũhaka mũndũ akorũo arĩ wa famĩlĩ ya Betheli kana mwĩrutĩri wa ihinda iraya (ta mwaka ũmwe kana makĩria) ũtungata-inĩ wa Betheli o na gũtuĩka ti wa famĩlĩ ya Betheli.
• Kwĩyandĩkithia: Erutĩri a Betheli arĩa magĩrĩire metagwo matekũbatara kwĩyandĩkithia.
Cukuru ya Ũtungata wa Ũthamaki
• Muoroto: Kũruta athuri a kĩũngano na ateithia a ũtungata kũrũmbũiya mawĩra marĩa mehokeirũo thĩinĩ wa ithondeka rĩa Jehova. (Atũ 20:28) Cukuru ĩno ĩkagwo thutha wa ihinda rĩa mĩaka ĩigana-ũna kũringana na itua rĩa Kĩama Kĩrĩa Gĩtongoragia.
• Ihinda: Mĩaka-inĩ ya ica ikuhĩ ĩkoretwo ĩgĩkwo kwa ihinda rĩa mũthenya ũmwe na nuthu harĩ athuri a kĩũngano na mũthenya ũmwe harĩ ateithia a ũtungata.
• Kũrĩa Ĩkagĩrũo: Kaingĩ ĩkagĩrũo Nyũmba ya Ũthamaki ĩrĩa ĩrĩ hakuhĩ kana Nyũmba ya Kĩgomano.
• Kwagĩrĩra: No mũhaka mũndũ akorũo arĩ mũthuri wa kĩũngano kana mũteithia wa ũtungata.
• Kwĩyandĩkithia: Athuri a kĩũngano na ateithia a ũtungata arĩa magĩrĩire metagwo cukuru ĩyo nĩ mũrori wa mũthiũrũrũko.
Cukuru ya Athuri a Kĩũngano
• Muoroto: Gũteithia athuri a kĩũngano marũmbũiye mawĩra mao marĩa mehokeirwo thĩinĩ wa kĩũngano.
• Ihinda: Thikũ ithano.
• Kũrĩa Ĩkagĩrũo: Wabici ya rũhonge nĩyo kaingĩ yugaga, ĩkagĩrũo Nyũmba-inĩ ya Ũthamaki kana ya Kĩgomano ĩrĩa ĩrĩ hakuhĩ.
• Kwagĩrĩra: No mũhaka mũndũ akorũo arĩ mũthuri wa kĩũngano.
• Kwĩyandĩkithia: Athuri a kĩũngano arĩa magĩrĩire nĩ metagwo mathiĩ cukuru ĩyo nĩ wabici ya rũhonge.
Cukuru ya Arori Arĩa Magendaga na Atumia Ao
• Muoroto: Gũteithia arori a mũthiũrũrũko na a ngʼongo nĩguo makorũo na moimĩrĩro mega harĩ gũtungata ciũngano, o hamwe na “wĩra-inĩ wa kũheana ũhoro na wa kũrutana” na kũrĩithia arĩa marĩ rungu rwao.—1 Tim. 5:17; 1 Pet. 5:2, 3.
• Ihinda: Mĩeri ĩĩrĩ.
• Kũrĩa Ĩkagĩrũo: Wabici ya rũhonge nĩyo yugaga nĩ kũ.
• Kwagĩrĩra: No mũhaka mũndũ akorũo arĩ mũrori wa mũthiũrũrũko kana wa ngʼongo.
• Kwĩyandĩkithia: Arori arĩa magendaga na atumia ao nĩ metagwo mathiĩ cukuru ĩyo nĩ wabici ya rũhonge.
Cukuru ya Bibilia ya Ariũ a Ithe Witũ Arĩa Matahikanĩtie
• Muoroto: Kũhaarĩria athuri a kĩũngano na ateithia a ũtungata arĩa matahikanĩtie nĩguo mongererũo wĩra wa ũtungata makĩria. Andũ aingĩ arĩa marĩkagia cukuru ĩno nĩ matũmagwo gũtungata kũrĩa kũrĩ na bata makĩria wa ahunjia bũrũri-inĩ wao. Amwe ao no matũmwo bũrũri ũngĩ mangĩĩrutĩra.
• Ihinda: Mĩeri ĩĩrĩ.
• Kũrĩa Ĩkagĩrũo: Wabici ya rũhonge nĩyo yugaga; kaingĩ ĩkagĩrũo Nyũmba-inĩ ya Ũthamaki kana ya Kĩgomano ĩrĩa ĩrĩ hakuhĩ.
• Kwagĩrĩra: Ariũ a Ithe witũ arĩa matahikanĩtie na marĩ na mĩaka gatagatĩ ka 23 na 62 na marĩ na ũgima mwega wa mwĩrĩ arĩa marenda gũtungatĩra ariũ a Ithe witũ na gũtwarithia maũndũ ma Ũthamaki na mbere kũndũ guothe kũrĩa kũrĩ na bata mũnene wa ahunjia a Ũthamaki. (Mar. 10:29, 30) No mũhaka makorũo matungatĩte mategũtigithĩria kwa ihinda rĩa mĩaka ĩĩrĩ marĩ ateithia a ũtungata kana athuri a kĩũngano.
• Kwĩyandĩkithia: Angĩkorũo cukuru ĩno nĩ ĩkoragwo thĩinĩ wa mabũrũri marĩa marĩ rungu rwa wabici yanyu ya rũhonge, mũcemanio wa arĩa marenda kwĩyandĩkithia nĩ wĩkagwo kĩgomano-inĩ kĩa mũthiũrũrũko. Ũhoro makĩria nĩ ũheanagwo hĩndĩ ya mũcemanio ũcio.
Cukuru ya Bibilia ya Akristiano Arĩa Mahikanĩtie
• Muoroto: Kũheana ũrutani wa mwanya nĩguo mahũthĩrũo makĩria nĩ Jehova na ithondeka rĩake. Andũ aingĩ arĩa maarĩkia nĩ matũmagwo gũtungata kũndũ kũrĩ na bata mũnene bũrũri-inĩ wao. Amwe ao no matũmwo bũrũri ũngĩ angĩkorũo nĩ marenda gwĩka ũguo.
• Ihinda: Mĩeri ĩĩrĩ.
• Kũrĩa Ĩkagĩrũo: Irathi cia mbere nyinyi nĩ irekĩrũo Watchtower Educational Center, Patterson, New York, U.S.A. Thutha ũcio, cukuru ĩno nĩ ĩgũkorũo ĩgĩĩkĩrũo kũrĩa wabici ya rũhonge ĩgũtua, kaingĩ nyũmba-inĩ cia igomano kana Nyũmba cia Ũthamaki.
• Kwagĩrĩra: Andũ mahikanĩtie a gatagatĩ ka mĩaka 25 na 50 na marĩ na ũgima mwega wa mwĩrĩ na maũndũ mao mangĩmetĩkĩria gũtungata kũndũ o guothe kũrĩa kũrabatarania na marĩ na mwerekera wa: ‘Niĩ ũyũ haha! Ndũma arĩ niĩ.’ (Isa. 6:8, NW) Ningĩ, no mũhaka makorũo mahikanĩtie kwa ihinda rĩa mĩaka ĩĩrĩ na makorũo marĩ ũtungata-inĩ wa mahinda mothe kwa ihinda rĩa mĩaka ĩĩrĩ matatigithĩirie.
• Kwĩyandĩkithia: Angĩkorũo cukuru ĩno nĩ ĩkagwo kũrĩa wabici ya kwanyu ĩrũgamĩrĩire, mũcemanio ũcio wa arĩa marenda kwĩyandĩkithia nĩ wĩkagwo kĩgomano-inĩ kĩa mũthenya ũmwe. Ũhoro makĩria nĩ ũheanagwo hĩndĩ ya mũcemanio ũcio.
Cukuru ya Bibilia ya Gileadi
• Muoroto: Kũmenyeria mapainia na ndungata ingĩ cia mahinda mothe ũtungata wa ũmishonarĩ.
• Ihinda: Mĩeri ĩtano.
• Kũrĩa Ĩkagĩrũo: Watchtower Educational Center, Patterson, New York, U.S.A.
• Kwagĩrĩra: Andũ mahikanĩtie na mabatithĩtio kwa ihinda rĩa mĩaka ĩtatũ na marĩ na mĩaka gatagatĩ ka 21 na 38 rĩrĩa maraneana bomu ciao riita rĩa mbere. No mũhaka makorũo moĩ kwaria Gĩthũngũ mahikanĩtie kwa ihinda rĩa mĩaka ĩĩrĩ na makoretwo ũtungata-inĩ wa mahinda mothe kwa ihinda rĩa mĩaka ĩĩrĩ mategũtigithĩria. Arĩa marenda kwĩyandĩkithia no mũhaka makorũo na ũgima mwega wa mwĩrĩ. Mapainia arĩa maratungata bũrũri ũngĩ (o hamwe na arĩa maratungata marĩ amishonarĩ); arori arĩa magendaga; arĩa matungataga marĩ Betheli; na arĩa maanathiĩ Cukuru ya Kũmenyeria Maũndũ ma Ũtungata, Cukuru ya Bibilia ya Ariũ a Ithe Witũ Arĩa Matahikanĩtie, Cukuru ya Bibilia ya Akristiano Arĩa Mahikanĩtie o nao no meyandĩkithie angĩkorũo nĩ magĩrĩire.
• Ũrĩa Mũndũ Angĩyandĩkithia: Nĩ gũkoragwo na mũcemanio hamwe na andũ arĩa marenda gũthiĩ cukuru ĩno ũrĩa wĩkagwo kĩrũrũngano-inĩ kĩa ngʼongo kĩrĩa kĩrĩ rungu rwa wabici imwe cia honge. Ũhoro makĩria nĩ ũheanagwo mũcemanio-inĩ ũcio. Angĩkorũo gũtirĩ mũcemanio ũcio irũrũngano-inĩ iria irĩ bũrũri-inĩ wanyu na nĩ ũrenda kwĩyandĩkithia, no waandĩkĩre wabici ya kwanyu angĩkorũo nĩ ũrenda ũhoro makĩrĩa.
Cukuru ya Arĩa Marĩ Kamĩtĩ-inĩ cia Wabici cia Honge na Atumia Ao
• Muoroto: Gũteithia arĩa maratungata Kamĩtĩ-inĩ cia Wabici cia Honge nĩguo marũmbũiye wega wĩra wa kũrũgamĩrĩra mĩciĩ ya Betheli, kũrũmbũiya maũndũ megiĩ ũtungata wa ciũngano, na kũrora maũndũ megiĩ mĩthiũrũrũko, na ngʼongo thĩinĩ wa icigo icio, o hamwe na wĩra wa ũtaũri, gũcaba, na ũgai wa mabuku na kũrora honge itiganĩte.—Luk. 12:48b.
• Ihinda: Mĩeri ĩĩrĩ.
• Kũrĩa Ĩkagĩrũo: Watchtower Educational Center, Patterson, New York, U.S.A.
• Kwagĩrĩra: Makorũo marĩ a Kamĩtĩ cia Wabici cia honge kana Kamĩtĩ cia Bũrũri kana arĩa mekũheo mweke ũcio thutha wa cukuru.
• Kwĩyandĩkithia: Ariũ a Ithe witũ arĩa magĩrĩire hamwe na atumia ao metagwo cukuru ĩyo nĩ Kĩama Kĩrĩa Gĩtongoragia.
Kwa ihinda rĩrĩ cukuru ici itirekĩrũo mabũrũri-inĩ mothe.