Mashahidi wa Yehova —Imani Yenye Matendo, Sehemu ya 1: Kutoka Gizani
Bibilia-inĩ, ũtheri nĩ ũgerekanagio na ma, nayo nduma ĩkagerekanio na maheeni. (Thab. 43:3; Isa. 5:20) Shaitani aambĩrĩirie nduma thĩinĩ wa thĩ rĩrĩa aaheenirie Hawa, na macũngĩrĩro-inĩ agĩtheremia nduma thĩinĩ wa thĩ yothe. (Kũg. 12:9) Mashahidi wa Yehova—Imani Yenye Matendo, Sehemu ya 1: Kutoka Gizani nĩ video ĩtaarĩirie ũrĩa ũtheri wa kĩĩroho waambĩrĩirie kwara kuuma nduma-inĩ. (Isa. 60:1, 2) Thutha wa kwĩrorera video ĩyo-rĩ, hihi no ũhote gũcokia ciũria ici?
(1) Nduma nene yaambĩrĩirie atĩa thutha wa atũmwo gũkua? (2) Kwambĩrĩria mĩaka-inĩ ya 1100, nĩ maũndũ marĩkũ moimĩrire maateithirie andũ gũtaũkĩrũo atĩ kanitha nĩ wamahĩtithagia? (3) Henry Grew na George Storrs maarĩ a? (4) Nĩ maũndũ marĩkũ maahanĩkire ũtũũro-inĩ wa Charles Russell maamũhutirie mũno? (5) Mũrũ wa Ithe witũ Russell na ithe, na athiritũ angĩ anini maatwarithagia atĩa kĩrathi kĩa wĩruti wao wa Bibilia, na nĩ maũndũ marĩkũ meetĩkanĩirie kũringana na Maandĩko? (6) Gĩkundi kĩu kĩa wĩruti wa Bibilia gĩatukanire na gĩkundi kĩa Nelson Barbour nĩkĩ, ĩndĩ nĩ kĩĩ gĩatũmire mũrũ wa Ithe witũ Russell eyeherie? (7) Nĩ ũndũ ũrĩkũ wekĩkire Julaĩ mwaka wa 1879 ũrĩa wambĩrĩirie ihinda rĩerũ rĩa ũtheri wa kĩĩroho? (8) Thutha ũcio, gĩkundi kĩa Arutwo a Bibilia kĩrĩa gĩathiaga kĩongererekete gĩekire atĩa gũtheremia ũhoro ũrĩa mwega? (9) Mĩaka mĩingĩ mbere ya 1914, nĩ ũndũ ũrĩkũ Arutwo acio a Bibilia maatanyaga wĩkĩke mwaka-inĩ ũcio? (10) Nĩ moritũ marĩkũ Arutwo a Bibilia maacemanirie namo thutha wa mũrũ wa Ithe witũ Russell gũkua? (11) Arutwo a Bibilia meekire atĩa thutha wa mũrũ wa Ithe witũ Rutherford na aruna ake kũrekio kuuma njera? (12) Kwĩrorera video ĩno kuongereire atĩa ũtaũku na ngatho ciaku harĩ ithondeka rĩa Jehova? (13) Video ĩno yongereire itua rĩaku hinya atĩa gũthiĩ na mbere kũhunjia na kĩyo o na kũrĩ na mĩhĩnga? (14) Tũngĩhũthĩra video ĩno atĩa gũteithia andũ a mbarĩ ciitũ, arutwo a Bibilia, na andũ angĩ?
Arutwo acio a Bibilia a tene nĩ maatũtigĩire igai rĩa bata mũno rĩa kĩĩroho! Thĩinĩ wa thĩ yarĩ na nduma ya kĩĩroho, marĩ na ũmĩrĩru na kĩyo nĩ maarekaga ũtheri ware. Rekei twĩgerekanagie na kĩonereria kĩao ‘tũgĩthiaga na mĩthiĩre ĩrĩa ya ciana cia ũtheri.’—Ef. 5:8.