Gitagĩra Meciria Maku
1. Kĩongo gĩa kĩgomano kĩa mũthiũrũrũko kĩa mwaka wa ũtungata wa 2013 nĩ kĩrĩkũ, na muoroto wa programu ĩyo nĩ ũrĩkũ?
1 Jesu aathire arutwo ake mendage Jehova na ngoro, muoyo na meciria mao mothe. (Mat. 22:37, 38) Irũrũngano na igomano cia mwaka ũyũ ihaarĩirio itũteithie gwĩkĩra hinya ũmũndũ witũ wa na thĩinĩ. O ta ũrĩa mũkũririkana-rĩ, kĩongo gĩa kĩrũrũngano gitũ kĩa ngʼongo nĩ “Gitagĩra Ngoro Yaku!” Kĩgomano kĩa mũthenya ũmwe kĩa mwaka wa ũtungata wa 2013 kĩrĩ na kĩongo “Gitagĩra Thamiri Yaku.” Nacio igomano cia mũthiũrũrũko iria ikwambĩrĩria mweri ũyũ ũngĩ igaakorũo na kĩongo “Gitagĩra Meciria Maku,” kĩrĩa mũthingi wakĩo arĩ Mathayo 22:37. Programu ĩyo ĩhaarĩrĩirio ĩteithie o ũmwe witũ gũthuthuria meciria make arĩ na muoroto wa gũtũma makenagie Jehova makĩria.
2. Twagĩrĩirũo gũgaacaria macokio ma ciũria irĩkũ hĩndĩ ya programu?
2 Maũndũ Marĩa Makaarĩrĩrio: Tũgĩthikĩrĩria kĩgomano kĩa mũthiũrũrũko, twagĩrĩirũo gũgaacaria macokio ma ciũria ici, iria ironania maũndũ ma bata marĩa makaarĩrĩrio:
• Tũngĩĩthema atĩa gwĩciragia ‘meciria ma andũ’?
• Tũngĩteithĩrĩria atĩa kũhumbũria tama ũrĩa ũtumumaragia meciria ma arĩa matarĩ Akristiano?
• Nĩ mwerekera ũrĩkũ wa meciria tũrenda gũkorũo naguo?
• Nĩ ũguni ũrĩkũ umanaga na gwĩcũrania kũrĩa kwagĩrĩire?
• Tũngĩtĩkĩria Jehova atongorie mwĩcirĩrie witũ atĩa?
• Nĩ na njĩra ĩrĩkũ athuri, atumia, aciari, na ciana mangĩtũma kũgĩe na gĩkeno thĩinĩ wa famĩlĩ?
• Tũngĩkorũo twĩhaarĩirie nĩ ũndũ wa mũthenya wa Jehova na njĩra ĩrĩkũ?
• Kwĩhotora meciria-inĩ nĩ ũndũ wa wĩra nĩ kuuga atĩa?
• Nĩ ũguni ũrĩkũ arĩa mahũthagĩra maũndũ marĩa meruta magĩaga naguo?
3. Gũkorũo kuo thikũ cierĩ, gũthikĩrĩria na kinyi, na kũhũthĩra maũndũ marĩa tũkeruta nĩ kwa bata nĩkĩ?
3 Shaitani nĩ ararũa mbaara na meciria maitũ na arenda kũmathũkia. (2 Kor. 11:3) Kwoguo, no mũhaka tũgitagĩre na tũkagirĩrĩria meciria maitũ. Nĩ tũrabatara gũthiĩ na mbere gũkũria meciria ma Kristo na kũregana na roho wa thĩ ĩno nemi. (1 Kor. 2:16) Nĩ ũndũ ũcio banga gũgaakorũo kuo mĩthenya yerĩ ya kĩgomano kĩu kĩa mũthiũrũrũko. Ũgaathikĩrĩria na kinyi. Kũhũthĩra maũndũ ma bata marĩa makaarĩrĩrio nĩ gũgaatũteithia kwĩhotora meciria nĩguo tũrute wĩra wa Ũthamaki tũrĩ na kĩyo.—1 Pet. 1:13.