Kiugo kĩa Ngai Kĩrĩ Ũguni Harĩ Kũrutana

1. Kĩongo gĩa kĩgomano kĩa mũthiũrũrũko kĩa mwaka wa ũtungata wa 2014 nĩ kĩrĩkũ, na nĩ kĩũria kĩrĩkũ gĩgaacokio?

¹ Mũrutani witũ Jehova nĩwe mwarimũ ũrĩa mwega biũ thĩinĩ wa thĩ na igũrũ. (Isa. 2:3) No hihi Jehova atũrutaga na njĩra ĩrĩkũ? Nĩ atũheete ibuku rĩa bata gũkĩra marĩa mangĩ mothe, nĩrĩo Kiugo gĩake Bibilia. Ũrutani wa Ngai ũngĩtũguna atĩa kĩĩmwĩrĩ, kĩĩmeciria, ũrĩa tũiguaga ngoro-inĩ, na kĩĩroho? Kĩũria kĩu nĩ gĩgaacokio thĩinĩ wa kĩgomano kĩa mũthiũrũrũko kĩa mwaka wa ũtungata wa 2014. Kĩongo gĩa kĩgomano kĩu, “Kiugo kĩa Ngai Kĩrĩ Ũguni Harĩ Kũrutana,” kiumĩte harĩ 2 Timotheo 3:16.

2. Maũndũ marĩa ma bata makaarĩrĩrio nĩ macokio ma ciũria irĩkũ?

² Ũgaathikĩrĩria Maũndũ Maya: Maũndũ marĩa ma bata ma programu ĩyo nĩ makaarĩrĩrio nĩ macokio ma ciũria ici:

• Ũrutani wa Ngai ũhutagia mũtũũrĩre witũ na njĩra ĩrĩkũ? (Isa. 48:17, 18)

• Nĩ ũũma ũrĩkũ tũrĩ naguo tũngĩgarũrĩra mũtũũrĩre witũ nĩguo tũingĩre ũtungata-inĩ wa mahinda mothe? (Mal. 3:10)

• Twagĩrĩirũo gwĩka atĩa rĩrĩa twacemania na “morutani mageni”? (Ahib. 13:9)

• Tũngĩĩgerekania na njĩra ya “ũrutani” ya Jesu atĩa? (Mat. 7:28, 29)

• Nĩkĩ arutani thĩinĩ wa kĩũngano nĩ magĩrĩirũo kwĩruta o ene? (Rom. 2:21)

• Kiugo kĩa Ngai gĩtũgunaga atĩa? (2 Tim. 3:16)

• Andũ marahutio atĩa nĩ ũndũ wa ndũrĩrĩ ‘kũgagaĩrũo’ kana ‘gũthingithio’? (Hag. 2:6, 7)

• Jehova akoragwo na ũũma ũrĩkũ harĩ ithuĩ? (Ef. 5:1)

• Nĩkĩ no nginya twĩrutanĩrie nĩguo tũtũũre ũrutani-inĩ wa Jehova? (Luk. 13:24)

3. Nĩkĩ he bata gũgaakorũo kĩgomano-inĩ kĩu kĩhaarĩirio ihinda rĩagĩrĩire na gũthikĩrĩria na kinyi?

³ Mbere ya kwandĩka ciugo iria kĩongo kĩa programu ĩno kĩrutĩtwo, Paulo nĩ aataarĩirie thĩinĩ wa 2 Timotheo mũrango wa 3 mahinda ma ũgwati marĩa mangĩkoneka matukũ-inĩ ma kũrigĩrĩria. Aandĩkire ũũ: “Andũ arĩa aaganu na ahenania-rĩ, nĩmarĩkĩragĩrĩria kwagana o kwagana, makĩhenanagia na makĩhenekaga.” (2 Tim. 3:13) Nĩguo tũtikaheeneke-rĩ, githĩ ti ũndũ wa bata gũthikĩrĩria na kũhũthĩra ũrutani wa Ngai? Kwoguo, rekei tũtue itua rĩa gũgaakorũo kĩgomano-inĩ kĩu kĩhaarĩirio ihinda rĩagĩrĩire na tũthikĩrĩrie na kinyi.