Kiugo kĩa Ngai nĩ Kĩrĩ Ũhoti
1. Kĩongo gĩa kĩgomano kĩa mũthenya ũmwe kĩa mwaka wa ũtungata wa 2014 nĩ kĩrĩkũ?
1 Ngũrani na kĩndũ o gĩothe kiumanĩte na andũ matarĩ akinyanĩru, Bibilia nĩ ĩrĩ ũhoti wa gũtũgarũra, ĩgatũma mwĩcirĩrie na mĩthiĩre itũ ĩringane na wendi wa Jehova. Kiugo kĩa Ngai gĩkoragwo na ũhoti ũigana atĩa? Tũngĩhũthĩra ũhoti wakĩo biũ atĩa ũtũũro-inĩ witũ? Tũngĩhũthĩra Kiugo kĩu wega makĩria atĩa gũteithia arĩa angĩ? Tũrĩ na ma atĩ andũ othe nĩ magekĩrũo hinya kĩĩroho rĩrĩa maũndũ macio makaarĩrĩrio kĩgomano-inĩ kĩa mũthenya ũmwe kĩa mwaka wa ũtungata wa 2014. Kĩongo gĩakĩo nĩ “Kiugo kĩa Ngai nĩ Kĩrĩ Ũhoti,” na kĩrutĩtwo thĩinĩ wa Ahibirania 4:12.
2. Twagĩrĩirũo gũgaathikĩrĩria macokio ma ciũria irĩkũ?
2 Ũgaathikĩrĩria Macokio ma Ciũria Ici: Ũgĩthikĩrĩria programu ĩyo, andĩka macokio ma ciũria ici.
• Nĩkĩ nĩ twagĩrĩirũo kwĩhoka Kiugo kĩa Jehova? (Thab. 29:4)
• Tũngĩĩyonera atĩa ũhoti wa Kiugo kĩa Ngai ũtũũro-inĩ witũ? (Thab. 34:8)
• Ũngĩonania atĩa ũhoti wa Kiugo kĩa Ngai rĩrĩa ũrĩ ũtungata-inĩ? (2 Tim. 3:16, 17)
• Tũngĩĩthema atĩa kũhenererio nĩ thĩ ya Shaitani? (1 Joh. 5:19)
• Ũngĩgacĩra atĩa kĩĩroho ũrĩ mũndũ mwĩthĩ? (Jer. 17:7)
• Tũngĩgĩa na hinya atĩa o na rĩrĩa tũũrĩtwo nĩ hinya? (2 Kor. 12:10)
• Nĩ kĩĩ kĩngĩtũteithia gũthiĩ na mbere gwĩka mogarũrũku o na tũngĩkorũo na mĩtugo kana mĩerekera tũmenyerete mũno? (Ef. 4:23)
3. Thengia gũthikĩrĩria programu, nĩ na njĩra irĩkũ ingĩ tũngĩgunĩka nĩ kĩgomano kĩa mũthenya ũmwe?
3 Nĩ tũkaagunĩka mũno nĩ gũthikĩrĩria ũhoro ũcio wa bata. Hamwe na ũguo, o ta kĩgomano-inĩ kĩa mũthiũrũrũko na kĩrũrũngano kĩa ngʼongo, nĩ tũgaakorũo na mweke wa kũgĩa na arata aingĩ na gũkenanĩra hamwe na aarĩ na ariũ a Ithe witũ a ciũngano ingĩ. (Thab. 133:1-3; 2 Kor. 6:11-13) Tigĩrĩra nĩ wagĩa na ihinda rĩa kwaranĩria na arata aku a tene, na kũmenyana na angĩ erũ. Kũngĩkorũo na mwaria ũceerete, hihi mũrori wa ngʼongo kana mũrũ wa Ithe witũ kuuma Betheli-rĩ, githĩ to ũmũnyite ũgeni marĩ na mũtumia wake? Hatarĩ nganja, tũrĩ na itũmi nyingĩ cia gũtanya kĩgomano kĩu kĩa mũthenya ũmwe!