Ũrĩa Ũngĩka Nĩguo Ũgunĩke nĩ Gĩkundi Kĩanyu gĩa Kũhunjia
1. Nĩ ũguni ũrĩkũ woimanaga na Wĩruti wa Bibilia wa Kĩũngano ũngĩoneka o na rĩu kũgerera ikundi citũ cia kũhunjia?
1 Hihi nĩ harĩ maũndũ mamwe wĩriragĩria ma Wĩruti wa Ibuku wa Kĩũngano? Ikundi ciakoragwo irĩ nyinyi na gĩikaro kĩrĩ kĩhooreru. Ũndũ ũcio nĩ watũmaga ũkorũo ũrĩ ũndũ mũhũthũ kũgĩa na arata maatũteithagia gũikara twĩna hinya kĩĩroho. (Thim. 18:24) Mũrori wa wĩruti wa ibuku nĩ aahotaga kũmenya maũndũ marĩa tũragerera na agatwĩkĩra ngoro tũrĩ mũndũ ũmwe ũmwe. (Thim. 27:23; 1 Pet. 5:2, 3) O na rĩu ũguni ũcio no woneke kũgerera ikundi citũ cia kũhunjia.
2. Tũngĩoya ikinya rĩa mbere na njĩra ĩrĩkũ rĩa kũgĩa na arata thĩinĩ wa gĩkundi gitũ arĩa mangĩtwĩkĩra hinya kĩĩroho?
2 Oya Ikinya rĩa Mbere: Ikundi cia kũhunjia kaingĩ ikoragwo cigana o ta ũrĩa ikundi cia wĩruti wa ibuku ciaiganaga. Tũngĩhunjia “tũrĩ kĩndũ kĩmwe” na arĩa angĩ, no tũgĩe na ũrata wa hakuhĩ. (Afil. 1:27, NW) Hihi wee ũhunjĩtie na andũ aigana thĩinĩ wa gĩkundi kĩanyu? Hihi no ‘ũhingũre ngoro’ yaku ũndũ-inĩ ũcio? (2 Kor. 6:13) Hamwe na ũguo, rĩmwe na rĩmwe no tũnyitage mũndũ ũmwe wa gĩkundi gitũ ũgeni hĩndĩ ya Ũthathaiya wa Famĩlĩ kana nĩguo tũrĩyanĩre. Ciũngano-inĩ imwe, ikundi cia kũhunjia nĩ iteithanagia kũnyita ũgeni andũ arĩa mokaga kũruta mĩario kuuma ciũngano ingĩ. Kiumia kĩrĩa o gĩkundi kĩgaĩirũo, nĩ kĩrĩyanagĩra na gĩgekĩrana ngoro o na akorũo mwaria ũcio ndegũkorũo hamwe nao.
3. Tũkoragwo na mĩeke ĩrĩkũ ya gwĩkĩrũo ngoro thĩinĩ wa ikundi citũ cia kũhunjia?
3 O na gũtuĩka rĩu kĩũngano gĩcemanagia maita merĩ harĩ kiumia, ũguo ti kuuga atĩ maita marĩa ahunjia magĩrĩire gũceererũo iceera rĩa ũrĩithi nĩ magĩrĩire kũnyihio. Arori a ikundi maamũragwo thĩinĩ wa ikundi nĩguo mekagĩre o mũndũ ngoro na makamũmenyeria ũtungata-inĩ. Angĩkorũo mũrori wa gĩkundi kĩanyu ndarĩ abanga kũhunjia nawe-rĩ, githĩ ti wega ũmũrie mũrĩhunjia nake? Makĩria ma ũguo, mũthia-inĩ ũmwe wa kiumia o mweri, mũrori wa ũtungata nĩ anyitanagĩra na gĩkundi ngũrani kũhunjia. Ciũngano-inĩ iria nini kũrĩa kũrĩ na ikundi nini cia kũhunjia, no abange gũceeragĩra o gĩkundi maita merĩ harĩ mwaka. Hihi nĩ ũbangaga maũndũ maku nĩguo ũthiĩ ũtungata-inĩ rĩrĩa aceerera gĩkundi kĩanyu?
4. (a) Mĩcemanio ya gũthiĩ kũhunjia ĩbangagwo atĩa? (b) Nĩkĩ nĩ twagĩrĩirũo gwĩciria kũheana mũciĩ witũ wĩkagĩrũo mĩcemanio ya gũthiĩ kũhunjia?
4 Kaingĩ nĩ harĩ ũguni o gĩkundi gũcemania kĩrĩ giki nĩ ũndũ wa kũhunjia mĩthia-inĩ ya kiumia. Kũngĩgĩa na kũndũ kũigana ũna gwa gũcemanĩria ihinda-inĩ rĩmwe no gũtũme ũkorũo ũrĩ ũndũ mũhũthũ harĩ ahunjia gũthiĩ mũcemanio wa gũthiĩ kũhunjia o na hihi gĩcigo-inĩ kĩrĩa kĩrahunjio. Ahunjia no magaĩke na ihenya na mambĩrĩrie gũthiĩ gĩcigo-inĩ matekũrĩa marĩĩgu. Ningĩ nĩ ũndũ mũhũthũ harĩ mũrori wa gĩkundi kũrũmbũiya arĩa marĩ gĩkundi-inĩ gĩake. O na kũrĩ ũguo, harĩ maũndũ mangĩtũma ikundi igĩrĩ kana makĩria ibatare gũcemania hamwe. Angĩkorũo kĩũngano nĩ gĩcemanagia kĩrĩ gĩothe gũthiĩ kũhunjia Njuuma ya mbere ya mweri kana thutha wa Wĩruti wa Mũrangĩri, kaingĩ nĩ wega o gĩkundi gũikara handũ hamwe, na mũrori wa gĩkundi aheo ndagĩka cigana ũna abange gĩkundi gĩake mbere ya mũcemanio wa gũthiĩ kũhunjia kũrĩkĩrĩrio na mahoya.—Rora gathandũkũ “Hihi no Wĩrutĩre Kũheana Mũciĩ Waku?”
5. O na gũtuĩka mũcemanio wa Wĩruti wa Ibuku wa Kĩũngano nĩ wathirire-rĩ, tũngĩkorũo na ũũma wa ũndũ ũrĩkũ?
5 O na gũtuĩka mũcemanio wa Wĩruti wa Ibuku wa Kĩũngano nĩ wathirire, Jehova no arathiĩ na mbere gũtũhe kĩrĩa gĩothe tũrabatara nĩgetha twĩke wendi wake. (Ahib. 13:20, 21) Tondũ wa Jehova gũtũrũmbũiya, gũtirĩ kĩndũ twagaga. (Thab. 23:1) Nĩ tuonaga irathimo nyingĩ kũgerera gĩkundi gitũ gĩa kũhunjia. Tũngĩoya ikinya rĩa mbere ‘tũhande nyingĩ’ nĩ ‘tũkaagetha nyingĩ.’—2 Kor. 9:6.
[Mbica karatathi ka 6]
Hihi no Wĩrutĩre Kũheana Mũciĩ Waku?
Ciũngano imwe nĩ ituranagĩra ikundi ciacio hĩndĩ ya kũhunjia mũthia-inĩ wa kiumia tondũ wa kwaga mĩciĩ ya kũigana ĩrĩa mangĩcemanĩria. Mĩcemanio ya gũthiĩ kũhunjia nĩ gĩcunjĩ kĩa mĩbango ya kĩũngano, kwoguo mĩcemanio ĩyo gwĩkĩrũo gwitũ mĩciĩ nĩ gĩtĩo kĩnene. Hihi no ũheane mũciĩ waku? Ndũgetigĩre gwĩka ũguo atĩ tondũ mũciĩ waku ti wa goro. Athuri nĩ megwĩciria igũrũ rĩgiĩ harĩa mũciĩ waku ũrĩ na maũndũ mangĩ o ta marĩa maaroragwo magĩthuura kũndũ gwa gwĩkĩra wĩruti wa ibuku. Angĩkorũo no wende kũheana mũciĩ waku, menyithia mũrori wa gĩkundi kĩanyu.