Mĩcemanio ya Gũthiĩ Kũhunjia Ĩrĩa Ĩhĩngagia Muoroto Wayo

1. Mĩcemanio ya gũthiĩ kũhunjia ĩkoragwo na muoroto ũrĩkũ?

¹ Hĩndĩ ĩmwe, Jesu nĩ eekire mũcemanio na arutwo ake 70 mbere ya mathiĩte kũhunjia. (Luk. 10:1-11) Nĩ aamekĩrire ngoro rĩrĩa aamaririkanirie atĩ matingĩarutire wĩra ũcio marĩ aiki, na atĩ maatongoragio nĩ “Mwathani mwene magetha,” Jehova. Ningĩ nĩ aamaheire motaaro ma kũmahaarĩrĩria kũruta wĩra ũcio na akĩmabanga “andũ erĩ, erĩ.” Mahinda-inĩ maya, mĩcemanio ĩrĩa twĩkaga mbere ya gũthiĩ kũhunjia ĩkoragwo na muoroto oro ũcio; gũtwĩkĩra ngoro, gũtũhaarĩrĩria, na gũtũteithia kwĩbanga.

2. Mũcemanio wa kũhunjia wagĩrĩire kuoya ihinda rĩigana atĩa?

² Mahinda-inĩ maya, mũcemanio wa gũthiĩ kũhunjia ũrĩa ũkoragwo ũrĩ hamwe na kũbanga ikundi, kũgaya gĩcigo gĩa gũthiĩ kũhunjia na mahoya, wĩkagwo ndagĩka 10 nginya 15. No kwambĩrĩria mweri wa Ĩpuro nĩ gũkũgĩa na ũgarũrũku. Mũcemanio wa gũthiĩ kũhunjia wagĩrĩirũo gũkorũo ũrĩ wa ndagĩka 5 nginya 7. O na kũrĩ ũguo, angĩkorũo ũgwĩkwo thutha wa mũcemanio ũngĩ wa kĩũngano, wagĩrĩirũo gũkorũo ũrĩ mũkuhĩ o na makĩria tondũ mĩcemanio nĩ ĩkwarĩrĩirie maũndũ matiganĩte kuuma Bibilia-inĩ. Mũcemanio wa kũhunjia ũngĩkorũo ũrĩ mũkuhĩ, ahunjia nĩ megũkorũo na mahinda maingĩ ma kũhũthĩra ũtungata-inĩ. Makĩria ma ũguo, angĩkorũo mapainia kana ahunjia amwe nĩ makwambĩrĩire ũtungata wao mbere ya mũcemanio wa gũthiĩ kũhunjia, mekũbatara kũrũgamia ũtungata wao o ihinda inyinyi.

3. Mĩcemanio ya gũthiĩ kũhunjia yagĩrĩire kũbangwo atĩa nĩ getha ĩteithie arĩa marathiĩ kũhunjia?

³ Mĩcemanio ya gũthiĩ kũhunjia yagĩrĩire kũbangwo wega nĩ getha ĩteithie ahunjia. Ciũngano nyingĩ nĩ igunĩkaga rĩrĩa o gĩkundi gĩeka mũcemanio wakĩo mwanya, handũ ha ahunjia othe gũcemania handũ hamwe. Rĩrĩa ikundi cieka ũguo, ũkoragwo ũrĩ ũndũ mũhũthũ harĩ ahunjia gũkinya mũcemanio-inĩ wa kũhunjia, na hihi gĩcigo-inĩ kĩrĩa kĩrahunjio. Arĩa marathiĩ kũhunjia nĩ mabangĩkaga na ihenya, na arori a ikundi cia kũhunjia makahota kũrũmbũiya arĩa marĩ ikundi-inĩ ciao na njĩra njega. Kĩama gĩa athuri no kĩrore kĩone mũbango ũrĩa ũngĩagĩrĩra kĩũngano kĩao. Mbere ya kũhinga na mahoya o mũhunjia agĩrĩire gũkorũo akĩmenya kũrĩa arathiĩ kũhunjia na ũrĩa mekũhunjia nake.

4. Nĩkĩ tũtiagĩrĩirũo kuona mĩcemanio ya gũthiĩ kũhunjia ĩtarĩ ya bata ĩkĩringithanio na mĩcemanio ĩrĩa ĩngĩ ya kĩũngano?

⁴ Nĩ wa Bata O ta Mĩcemanio Ĩrĩa Ĩngĩ ya Kĩũngano: Tondũ mũcemanio wa gũthiĩ kũhunjia wĩkagwo nĩ ũndũ wa arĩa marathiĩ kũhunjia, to mũhaka kĩũngano gĩothe gĩkorũo ho. No ũguo ti kuuga atĩ mũcemanio ũcio ndwagĩrĩirũo kuoyũo na ũritũ kana atĩ ti wa bata ũkĩringithanio na mĩcemanio ĩrĩa ĩngĩ ya kĩũngano. O ta mĩcemanio ĩrĩa ĩngĩ itũ, mĩcemanio ya gũthiĩ kũhunjia nĩ mũbango wa Jehova wa gũtũteithia twarahũranage nĩ getha twendanage na twĩkage ciĩko njega. (Ahib. 10:24, 25) Kwoguo, ũrĩa ũratongoria mũcemanio ũcio, abataire gũkorũo ehaarĩirie wega nĩ getha maũndũ marĩa ekwarĩrĩria magocithie Jehova na mateithie arĩa megũthiĩ kũhunjia. Angĩkorũo no kũhoteke, ahunjia arĩa marathiĩ ũtungata-inĩ magĩrĩire kwĩrutanĩria nĩguo makorũo mũcemanio-inĩ ũcio.

5. (a) Mũrori wa ũtungata arĩ na itemi rĩrĩkũ harĩ kũbanga mĩcemanio ya gũthiĩ kũhunjia? (b) Mwarĩ wa Ithe witũ agĩrĩirũo gũtongoria mũcemanio wa gũthiĩ kũhunjia na njĩra ĩrĩkũ?

⁵ Ũrĩa Ũratongoria Agĩrĩirũo Kwĩhaarĩria Atĩa? Nĩ getha mũndũ ehaarĩrie wega nĩ ũndũ wa gĩcunjĩ o gĩothe kĩa mĩcemanio ya kĩũngano, abataraga kũheo gĩcunjĩ kĩu mbere ya mũthenya wa mĩcemanio. Ũguo noguo kwagĩrĩire harĩ mũcemanio wa gũthiĩ kũhunjia. Nĩ ma, rĩrĩa ikundi cia ũtungata cieka mĩcemanio kũndũ mwanya, arori a ikundi icio kana ateithĩrĩria ao nĩo matongoragia mũcemanio wa ikundi ciao. O na kũrĩ ũguo, angĩkorũo kĩũngano gĩgwĩka mũcemanio wa gũthiĩ kũhunjia kĩrĩ hamwe, mũrori wa ũtungata agĩrĩirũo kũbanga nũ ũkũũtongoria. Arori amwe a ũtungata mathondekaga mũtaratara wa mĩcemanio ya gũthiĩ kũhunjia, makaũcuuria rũbaũ-inĩ rwa imenyithia na makanengera arĩa megũtongoria mĩcemanio ĩyo. Mũrori wa ũtungata agĩrĩirũo kũhũthĩra ũtaũku rĩrĩa arathuura arĩa megũtongoria mĩcemanio ĩyo, tondũ nĩ getha mĩcemanio ĩyo ĩkorũo ĩrĩ na ũguni, ĩkũbatara gũtongorio nĩ arĩa marĩ na ũhoti wa kũrutana na wa kũbanga andũ. Angĩkorũo gũtirĩ na mũthuri wa kĩũngano, mũteithia wa ũtungata, kana mũrũ wa Ithe witũ mũbatithie ũngĩoneka gũtongoria mũcemanio wa kũhunjia mĩthenya ĩmwe, mũrori wa ũtungata agĩrĩirũo gũthuura mwarĩ wa Ithe witũ mũbatithie ũrĩa ũngĩhota gũtongoria atongorie.—Rora gĩcunjĩ kĩa “Rĩrĩa Mwarĩ wa Ithe Witũ Atuĩka Nĩwe Ũgũtongoria.”

6. Nĩkĩ nĩ harĩ bata ũrĩa ũratongoria mũcemanio wa kũhunjia ehaarĩrie wega?

⁶ Rĩrĩa twaheo gacunjĩ thĩinĩ wa Cukuru ya Ũtungata wa Gĩtheokrasi kana Mũcemanio wa Ũtungata, tũkoyaga na ũritũ na tũkehaarĩria wega. Tũtingĩeterera atĩ nginya rĩrĩa tũrĩkinya gũthiĩ mũcemanio nĩ getha twĩcirie ũrĩa tũgũthiĩ kuuga. Gũtongoria mũcemanio wa ũtungata kwagĩrĩire kuonwo na njĩra o ta ĩyo. Rĩu tondũ mũcemanio wa gũthiĩ kũhunjia ũrĩkoragwo ũrĩ mũkuhĩ, nĩ ũndũ wa bata kwĩhaarĩria wega nĩ getha mũcemanio ũcio ũkorũo ũrĩ na ũguni na ndũgakĩrie mathaa. Kwĩhaarĩria wega ningĩ nĩ kũhutĩtie kũmenya gĩcigo kĩrĩa gĩkũhunjio mbere ya mũcemanio ũcio wambĩrĩirie.

7. Nĩ maũndũ ta marĩkũ mangĩarĩrĩrio mũcemanio-inĩ wa gũthiĩ kũhunjia?

⁷ Agĩrĩirũo Kwarĩrĩria Maũndũ Marĩkũ? Ngombo ĩrĩa ĩĩhokekete ndĩheanĩte mũtaratara wa maũndũ marĩa marĩaragĩrĩrio o mũcemanio-inĩ wa gũthiĩ kũhunjia tondũ icigo cia kũhunjia itihaanaine. Gathandũkũ ka “Maũndũ ma Kwarĩrĩria Hĩndĩ ya Mũcemanio wa Gũthiĩ Kũhunjia,” nĩ kagwetete maũndũ mamwe marĩa mangĩarĩrĩrio. Mũcemanio ũcio wagĩrĩire gwĩkwo ũhaana ta ndeereti hamwe na athikĩrĩria. No rĩmwe na rĩmwe no gũkorũo na kĩonereria kĩmwe kĩhaarĩrie wega kana video ĩmwe yagĩrĩire ya jw.org. Ũrĩa ũgũtongoria akĩĩharĩria agĩrĩirũo nĩ gwĩciria maũndũ marĩa mangĩkĩra ahunjia ngoro na mangĩmateithia ũtungata-inĩ mũthenya ũcio.

8. Nĩ maũndũ marĩkũ mangĩagĩrĩra makĩria kwarĩrĩrio mũcemanio-inĩ wa gũthiĩ kũhunjia mĩthenya ya Njuuma na Kiumia?

⁸ Mũthenya wa Njuuma ahunjia aingĩ maheanaga ngathĩti cia Mũrangĩri na Arahũkai! Aingĩ arĩa mathiaga ũtungata-inĩ mũthenya wa Njuuma, matihotaga gũthiĩ kũhunjia gatagatĩ-inĩ ga kiumia, kwoguo no maage kũririkana maũndũ marĩa maaharĩirie hĩndĩ ya hwaĩ-inĩ wao wa Ũthathaiya wa Famĩlĩ. Nĩ ũndũ ũcio, nĩ wega ũrĩa ũratongoria arĩrĩrie gacunjĩ kamwe ka ũrĩa ũngiuga karĩa gakoragwo na thutha wa Ũtungata Witũ wa Ũthamaki. Ningĩ no arĩrĩrie ũrĩa ahunjia mangĩhũthĩra mohoro ma ica ikuhĩ, ũndũ wĩkĩkĩte, kana thigũkũ hĩndĩ ĩrĩa maraheana ngathĩti, kana arĩrĩrie ũrĩa mangĩtigĩra mũndũ wakenio nĩ ngathĩti kĩũria kĩrĩa makaarĩrĩria hĩndĩ ĩyo ĩngĩ. Angĩkorũo mũcemanio-inĩ ũcio nĩ harĩ na ahunjia makoretwo makĩhũthĩra ngathĩti iria iraheanwo mweri ũcio, ũrĩa ũratongoria no amorie magwete maũndũ mamwe mangĩhũthĩrũo kana maheane maũndũ monetwo. Mũthenya wa Kiumia, ũrĩa ũratongoria no athuure kwarĩrĩria kĩrĩa kĩraheanwo mweri ũcio na njĩra o ta ĩyo. Mabuku ma kwĩruta na andũ Bibilia, ta broshua ya Ũhoro Mwega na ya Thikĩrĩria Ngai na ibuku rĩa Bibilia Ĩrutanaga, no maheanwo hĩndĩ o yothe kwoguo ũrĩa ũratongoria no arĩrĩrie na njĩra nguhĩ ũrĩa rĩmwe rĩamo rĩngĩheanwo.

9. Nĩ maũndũ marĩkũ mangĩarĩrĩrio mũthia-inĩ wa kiumia kũngĩkorũo kũrĩ na kambĩini ya mwanya?

⁹ Angĩkorũo kũrĩ na kambĩini ya mwanya mũthia-inĩ wa kiumia, ũrĩa ũratongoria no arĩrĩrie ũrĩa ngathĩti cia ica ikuhĩ cingĩheanwo hamwe na tũratathi kana trakti cia kambĩini, kana arĩrĩrie ũrĩa ahunjia mangĩteithia mũndũ wakenio nĩ ũhoro. Ningĩ no aheane maũndũ monetwo marĩa maronania bata wa gũkorũo kũrĩ na kambĩini ta icio.

10, 11. Nĩ getha mũcemanio wa gũthiĩ kũhunjia ũkorũo na moimĩrĩro mega, nĩkĩ nĩ ũndũ wa bata ahunjia mehaarĩrie?

¹⁰ Ahunjia Mangĩĩharĩrĩria Atĩa? Ahunjia o nao nĩ magĩrĩirũo nĩ kũhingia itemi rĩao nĩ getha mũcemanio wa gũthiĩ kũhunjia ũkorũo na moimĩrĩro mega. Mangĩhaarĩria kabere nĩ ũndũ wa ũtungata hihi hĩndĩ ya ũthathaiya wao wa famĩlĩ, no makorũo na kaũndũ mangĩteithĩrĩria ahunjia arĩa angĩ nako. Kwĩhaarĩria wega ningĩ nĩ kũhutĩtie kuoya ngathĩti na mabuku marĩa mangĩ mbere ya gũthiĩ mũcemanio-inĩ wa gũthiĩ kũhunjia nĩ getha thutha wa mũcemanio ahunjia mathiĩ gĩcigo-inĩ kĩrĩa marahunjia mategũte mahinda.

¹¹ Ningĩ nĩ ũndũ wa bata gũkinya mũcemanio-inĩ wa gũthiĩ kũhunjia ndagĩka nini mbere ya wambĩrĩirie. Nĩ twĩrutanagĩria gũkinya mĩcemanio-inĩ yothe tũtegũcererũo. O na kũrĩ ũguo, no tũhĩngĩce andũ arĩa angĩ makĩria tũngĩkinya mũcemanio-inĩ wa gũthiĩ kũhunjia tũcereirũo. Na njĩra ĩrĩkũ? Mũrũ wa Ithe witũ ũrĩa ũratongoria nĩ akoragwo na maũndũ maingĩ ma kũrora mbere ya kũbanga andũ. Angĩkorũo no ahunjia anini mokĩte, no athuure mathiĩ gĩcigo-inĩ kĩna gĩtarĩkĩte kũhunjio. Angĩkorũo ahunjia amwe mokire mũcemanio-inĩ magũrũ na kũrĩa marahunjia nĩ kũraihu, no abange mahunjie na arĩa marĩ na ngaari. Angĩkorũo kũrĩa kũrahunjio nĩ kũrĩ ũmaramari mũingĩ, no abange ariũ a Ithe witũ mahunjie na gĩkundi kĩa aarĩ a Ithe witũ kana hakuhĩ nao. Ahunjia arĩa marĩ na mathĩna ma mwĩrĩ no maheo kũndũ gũtarĩ na irĩma kana nyũmba itarĩ na ngoroba nyingĩ. Ahunjia arĩa erũ no mabangwo na arĩa marĩ na ũmenyeru mũingĩ. No ahunjia mangĩkinya macereirũo ũrĩa ũratongoria angĩbatara kũbangũrania andũ nĩ getha abange arĩa macererũo. Rĩmwe na rĩmwe, no tũkorũo na gĩtũmi kĩiganu gĩa gũcerererũo. No angĩkorũo nĩ tũmenyerete gũceragĩrũo, nĩ wega kwĩyũria kana tũceragĩrũo nĩ tondũ wa kwagĩra kĩene mũcemanio wa gũthiĩ kũhunjia kana nĩ tondũ wa kũremwo nĩ kũbanga maũndũ maitũ kabere.

12. Angĩkorũo nĩ ũmenyerete gwĩka mĩbango yaku ya kũhunjia, nĩ maũndũ marĩkũ ũngĩĩciria?

¹² Ahunjia arĩa marathiĩ ũtungata-inĩ no maheo mũndũ ũrĩa mekũhunjia nake, kana makorũo mabangĩte kabere. Angĩkorũo nĩ ũmenyerete gwĩka mĩbango yaku kabere-rĩ, hihi no ‘ũhingũre ngoro yaku’ na njĩra ya kũhunjia na ahunjia ngũrani handũ ha o arĩa ũmenyerete? (2 Kor. 6:11-13) Hihi no ũbange kũhunjia na mũhunjia mwerũ nĩguo ũmũteithie gũkũria ũhoti wake wa kũrutana? (1 Kor. 10:24; 1 Tim. 4:13, 15) Thikĩrĩria na kinyi maũndũ mothe marĩa mekwarĩrĩrio mũcemanio-inĩ, o hamwe na harĩa mũkwĩrũo mwambĩrĩrie kũhunjia. Mũcemanio wathira wĩtheme kũgarũra mĩbango na ũthiĩ gĩcigo-inĩ kĩrĩa mũrahunjia ũtekũrĩa marĩgu.

13. Ithuothe tũngĩhingia itemi ritũ, tũngĩgunĩka atĩa nĩ mĩcemanio ya gũthiĩ kũhunjia?

¹³ Andũ arĩa 70 Jesu aabangĩte mathiĩ ũtungata, ‘maahũndũkire makenete’ thutha wa kũhunjia. (Luk. 10:17) No mũhaka gũkorũo atĩ mũcemanio ũrĩa meekĩte na Jesu mbere ya gũthiĩ kũhunjia nĩ wamateithirie kũgĩa na moimĩrĩro mega. O na ũmũthĩ, mĩcemanio ya gũthiĩ kũhunjia no ĩkorũo na ũguni o ta ũcio. Ithuothe tũngĩhingia itemi ritũ, mĩcemanio ya gũthiĩ kũhunjia nĩ ĩrĩtwĩkĩraga ngoro, ĩgatũhaarĩria, na ĩgatũteithia kwĩbanga nĩguo tũhingie watho ũrĩa tũheetwo wa kũruta “ũira kũrĩ ndũrĩrĩ ciothe.”—Mat. 24:14.

Mĩcemanio ya gũthiĩ kũhunjia yagĩrĩirũo kuoyũo na ũritũ na ndĩagĩrĩire kuonwo ta ĩtarĩ ya bata ĩkĩringithanio na mĩcemanio ĩrĩa ĩngĩ ya kĩũngano

Ũrĩa ũgũtongoria akĩĩharĩria agĩrĩirũo nĩ gwĩciria maũndũ marĩa mangĩkĩra ahunjia ngoro na mangĩmateithia ũtungata-inĩ mũthenya ũcio

Rĩrĩa Mwarĩ wa Ithe Witũ Atuĩka Nĩwe Ũgũtongoria

Mwarĩ wa Ithe witũ agĩrĩirũo nĩ kwĩhumbĩra mũtwe na akorũo aikarĩte thĩ rĩrĩa aratongoria mũcemanio wa gũthiĩ kũhunjia. Agĩrĩirũo nĩ kwarĩrĩria maũndũ o ta marĩa mũrũ wa Ithe witũ angĩarĩrĩria. No akorũo na ndeereti hamwe na arĩa marĩ mũcemanio-inĩ ũcio, o na gũtuĩka nĩ agĩrĩirũo nĩ gwĩthema kũhaana ta arĩ kũmaruta aramaruta. Angĩkorũo nĩ ekũũria mwarĩ wa Ithe witũ ũngĩ ahoithie, ũcio ũkũhoithia o nake agĩrĩirũo nĩ kwĩhumbĩra mũtwe. Mũrũ wa Ithe witũ angĩũka akore mũcemanio ũcio ũgĩthiĩ na mbere, mwarĩ wa Ithe witũ ũcio agĩrĩirũo nĩ amũnyite ũgeni arĩkĩrĩrie mũcemanio. Mũrori wa ũtungata no agerie gwĩciria ũhoro wa maũndũ marĩa mangiumĩra materĩgĩrĩirũo, na aheane ũtaaro ũrĩa wagĩrĩire nĩ getha ahunjia matigatukanĩrũo. Kwa ngerekano, mũrũ wa Ithe witũ mũnini hihi ũtakinyĩtie mĩaka ya ũtinĩnja na nĩ mũbatithie no oke mũcemanio-inĩ rĩrĩa mwarĩ wa Ithe witũ aratongoria, na athuri makorũo mationaga agĩrĩirũo nĩ gũtongoria mũcemanio ta ũcio. Hĩndĩ ta ĩyo, mũrori wa ũtungata no akorũo amenyithĩtie mwarĩ na mũrũ wa ithe witũ ũcio atĩ mwarĩ wa Ithe witũ nĩwe wagĩrĩirũo nĩ gũtongoria, na mũrũ wa Ithe witũ ũcio ahoithie angĩkorũo athuri nĩ marona agĩrĩire kũhoithia. Ningĩ no gũkorũo kũrĩ na mũrũ wa Ithe witũ mũgima no nĩ mũgirĩrĩrie gũtongoria mĩcemanio kana kũhoithia kĩũngano-inĩ nĩ ũndũ wa itũmi iria athuri marĩ nacio. Athuri matekuumbũra maũndũ ma hitho, magĩrĩirũo nĩ kũmenyithia aarĩ a Ithe witũ arĩa mathuurĩtwo gũtongoria atĩ nĩ magĩrĩirũo nĩ gũtongoria o hamwe na kũhoithia o na angĩkorũo mũrũ wa Ithe witũ ũcio arĩ ho. Athuri no mamenyithie mũrũ wa Ithe witũ ũcio mĩthenya ĩrĩa aarĩ a Ithe witũ marĩtongoragia mĩcemanio ya gũthiĩ kũhunjia.

Maũndũ ma Kwarĩrĩria Hĩndĩ ya Mũcemanio wa Gũthiĩ Kũhunjia:

Gĩcunjĩ kĩa ũrĩa ũngiuga kuuma Ũtungata Witũ wa Ũthamaki.
Video ĩgiĩ ũtungata kuuma jw.org.
Njĩra ĩrĩa njega ya kũhunjia, ta ũrĩa mũhunjia angĩambĩrĩria ndeereti, kũiga mũthingi wa gũgaacoka, na ũrĩa mũhunjia angĩgweta ũhoro wĩgiĩ mĩhothi.
Rĩandĩko rĩna ũrutani kana rĩa gwĩkĩra ngoro rĩkonainie na ũtungata.
Ũndũ wonetwo ũtungata-inĩ, wa kwanyu kana ũcabĩtwo.
Ũhoro ũrutĩtwo gĩcunjĩ-inĩ kĩmwe kĩa Ũtungata Witũ wa Ũthamaki.
Ũhoro ũrarĩrĩirio ica ikuhĩ thĩinĩ wa Mũcemanio wa Ũtungata.
Ũhoro ũkonainie na ũtungata kuuma ngathĩti-inĩ ya Mũrangĩri.
Ũhoro wĩgiĩ ũtungata kuuma mabuku-inĩ ta Cukuru ya Ũtungata na ‘Njoo Uwe Mfuasi Wangu.’
Gacunjĩ kamwe karutĩtwo thĩinĩ wa jw.org kangĩhũthĩrũo ũtungata-inĩ.
Gacunjĩ kamwe thĩinĩ wa kabuku ka Menya Kĩrĩa Kĩrĩ Kiugo-inĩ kĩa Ngai.
Kwambĩrĩria ndeereti na andũ arĩa tũngĩcemania nao ũtungata-inĩ, ta arĩa moigaga gũtirĩ Ngai, arĩa metĩkĩtie indo nĩ kwĩyumĩria cieyumĩririe, Ahĩndĩ, kana Abutha.
Kũhiũrania na ũndũ mũna andũ moigaga rĩrĩa mararega gũthikĩrĩria.
Gũteithĩrĩria ũrĩa tũrahunjia nake nĩguo agĩe na moimĩrĩro mega makĩria ũtungata-inĩ.
Ũrĩa tũngĩka twacemania na mũndũ ũraaria rũthiomi rũngĩ.
Njĩra itiganĩte cia ũtungata iria ahunjia mekũhũthĩra ta, gũcaria andũ a mũthemba mũna, kũhunjia na thimũ, kũhunjia kũndũ kwa mũingĩ, gũcokera arĩa marakenirio nĩ ũhoro, kana wĩruti wa Bibilia.
Iririkania ciĩgiĩ; ũgitĩri, gũkorũo twĩhaarĩirie kũgarũrĩra kũringana na ũrĩa twakora mwene nyũmba, mĩtugo mĩega, kũgĩa na mwerekera ũrĩa wagĩrĩire, na maũndũ mangĩ ta macio.