Ndũkegirĩrĩrie —Gũtooria Kwĩyona ta Ũtarĩ na Ũhoti
1. Nĩ kĩĩ gĩtũmaga andũ amwe maage kwambĩrĩria kwĩruta Bibilia na mũndũ?
1 Hihi nĩ wagaga kwambĩrĩria kwĩruta na mũndũ Bibilia tondũ wa kuona ta ũtarĩ na ũhoti wa kũrutana na njĩra njega? Ndungata njĩhokeku cia tene ta Musa na Jeremia, kũrĩ hĩndĩ cionaga ta itangĩhota kũruta wĩra ũrĩa ciaheetwo. (Tham. 3:10, 11; 4:10; Jer. 1:4-6) Kwoguo, kũigua ũguo ti ũndũ mũgeni. No mũndũ angĩtooria ũndũ ũcio atĩa?
2. Nĩkĩ tũtiagĩrĩirũo kũiganĩra nĩ kũhunjagia nyũmba kwa nyũmba naguo wĩra wa kũruta andũ Bibilia tũgatigĩra andũ angĩ?
2 Nĩ twagĩrĩirũo kũririkana atĩ Jehova ndatwĩraga twĩke ũndũ ũkĩrĩte ũhoti witũ. (Thab. 103:14) Kwoguo wĩra witũ wa ‘gũtua andũ arutwo,’ na ‘kũmaruta,’ nĩ ũndũ tũngĩhota kũhingia. (Mat. 28:19, 20) Mweke ũcio Jehova ndaũheete o andũ arĩa marĩ na ũmenyeru mũnene kana arĩa marĩ na ũhoti wa mwanya gatagatĩ-inĩ gaitũ. (1 Kor. 1:26, 27) Nĩ ũndũ ũcio, tũtiagĩrĩirũo kũiganĩra nĩ kũhunjagia nyũmba kwa nyũmba naguo wĩra wa kũruta andũ Bibilia tũgatigĩra andũ angĩ.
3. Jehova atũhotithagia atĩa kũruta andũ Bibilia?
3 Jehova Nĩwe Ũtũhotithagia: Ũhoti witũ wa gũtua andũ arutwo uumaga kũrĩ Jehova. (2 Kor. 3:5) Nĩ atũrutĩte ma nyingĩ cia Bibilia kũgerera ithondeka rĩake, iria o na andũ arĩa athomu mũno thĩinĩ wa thĩ ĩno matoĩ. (1 Kor. 2:7, 8) Ningĩ nĩ andĩkithĩtie ũhoro wĩgiĩ njĩra cia kũrutana cia Jesu, Mũrutani Ũrĩa Mũnene, nĩguo twĩgerekanagie nacio, na no arathiĩ na mbere gũtũmenyeria kũgerera kĩũngano. Makĩria ma ũguo, Jehova nĩ atũheaga indo iria tũbataraga cia kũrutana Bibilia. Nĩ atũheete ibuku ta Bibilia Ĩrutanaga, rĩrĩa rĩtaaragĩria ũhoro na njĩra njega na hũthũ gũtaũkĩrũo. Kwĩruta na mũndũ Bibilia ti ũndũ mũritũ ta ũrĩa tũngĩkorũo tũgĩĩciria.
4. Nĩ kĩĩ kĩngĩtũma twĩhoke atĩ Jehova nĩ arĩtũteithagia?
4 Musa na Jeremia nĩ maateithirio nĩ Jehova kũhota kũhingia mawĩra mao. (Tham. 4:11, 12; Jer. 1:7, 8) O na ithuĩ no tũhoe Jehova atũteithie. Ningĩ-rĩ, rĩrĩa tũreruta Bibilia na mũndũ, tũkoragwo tũkĩmũruta ma ĩrĩa ĩgiĩ Jehova, na ũcio nĩ ũndũ ũkenagia Ngai. (1 Joh. 3:22) Nĩ ũndũ ũcio, reke muoroto waku ũkoragwo ũrĩ kũnyitanĩra wĩra-inĩ wa kũruta andũ Bibilia, ũtungata ũrĩa ũrehaga gĩkeno na irathimo nyingĩ.