Ariũ a Ithe Witũ Anyinyi, Hihi nĩ Mũrerirĩria Wĩra Mwega?
1. Tũmwana tũrĩa tũbatithie tũngĩambĩrĩria atĩa kũhũthĩra ũtaaro wa 1 Timotheo 3:1?
1 “Mũndũ angĩenda gũtuwo mũrori . . . , nĩ wĩra mwega eriragĩria.” (1 Tim. 3:1) Ciugo icio itongoretio nĩ roho nĩ ciĩkĩraga ariũ a Ithe witũ ngoro kwĩrutanĩria nĩguo mehokerũo mawĩra thĩinĩ wa kĩũngano. No hihi andũ anyinyi no mehokerũo mawĩra? Ũrĩa kũrĩ nĩ atĩ, nĩ wega kwambĩrĩria gũkinyĩra mĩoroto ũrĩ o mũnyinyi. Na njĩra ĩyo no wambĩrĩrie kũmenyerio na ũkũrie ngumo iria ingĩgũteithĩrĩria nĩguo ũkaamũrũo ũrĩ mũteithia wa ũtungata thutha-inĩ. (1 Tim. 3:10) Angĩkorũo ũrĩ kamwana na nĩ ũbatithĩtio-rĩ, ũngĩkinyĩra mĩoroto ya kĩĩroho atĩa?
2. Ũngĩkũria na wonanie na njĩra irĩkũ roho wa kwĩima?
2 Kwĩima: Ririkana atĩ ũrerutanĩria kwĩhokerũo wĩra mwega, no ti gwĩthondekera rĩĩtwa. Nĩ ũndũ ũcio, gĩa na wendi wa gũteithia aarĩ na ariũ a Ithe witũ. Ũndũ ũmwe ũngĩgũteithia gwĩka ũguo nĩ gwĩciria ũhoro wa kĩonereria kĩega kĩa Jesu. (Mat. 20:28; Joh. 4:6, 7; 13:4, 5) Hoya Jehova agũteithie ũhote gwĩciragia maũndũ marĩa mangĩguna andũ arĩa angĩ. (1 Kor. 10:24) Hihi nĩ harĩ ũndũ ũngĩteithĩrĩria arĩa akũrũ na arĩa mathĩnagio nĩ mwĩrĩ a kĩũngano kĩanyu? Hihi nĩ wĩrutagĩra gũtheria kana gũteithĩrĩria mawĩra mangĩ ma kũiga Nyũmba ya Ũthamaki ĩrĩ njega? Hihi no wĩrutĩre kũruta mĩario thĩinĩ wa Cukuru ya Ũtungata wa Gĩtheokrasi angĩkorũo ũrĩa ũheetwo ndarĩ kuo? Weka ũguo, nĩ ũrĩgĩaga na gĩkeno kĩnene.—Atũm. 20:35.
3. Ngumo cia kĩĩroho nĩ cia bata na njĩra irĩkũ, na mũndũ angĩcikũria atĩa?
3 Ngumo cia Kĩĩroho: Nĩ ũndũ wa bata o na makĩria harĩ mũndũ ũratungata thĩinĩ wa kĩũngano gũkorũo arĩ na ngumo cia kĩĩroho gũkĩra gũkorũo na ũhoti mũna wa mũciarĩre. Mũndũ ũkoragwo na ngumo cia kĩĩroho nĩ ageragia kuona maũndũ ta ũrĩa Jehova na Jesu mamonaga. (1 Kor. 2:15, 16) Nĩ onanagia “maciaro ma Roho.” (Gal. 5:22, 23) Nĩ ahunjagia na kĩyo na akaiga maũndũ ma Ũthamaki mbere. (Mat. 6:33) Makĩria ma gũthiĩ mĩcemanio, no ũkũrie ngumo cia kĩĩroho na njĩra ya gũkorũo na mũbango mwega wa kwĩruta. Ũguo nĩ kuuga ũthomage Bibilia o mũthenya, ũgathoma o riuma rĩa Mũrangĩri na Amkeni!, na ũkahaarĩria mĩcemanio. (Thab. 1:1, 2; Ahib. 10:24, 25) Paulo aandĩkire ũũ agĩkĩra Timotheo ngoro athiĩ na mbere gũkũra kĩĩroho: “Ũmenyagĩrĩre ũrutani ũrĩa ũrutanaga.” (1 Tim. 4:15, 16) Nĩ ũndũ ũcio, wĩrutanagĩrie kũruta mĩario na njĩra njega thĩinĩ wa Cukuru ya Ũtungata wa Gĩtheokrasi. Wĩharagĩrie wega ũgĩthiĩ kũhunjia na ũhunjagie ũtegũtĩrĩria. Wĩigĩre mĩoroto ya kĩĩroho na wĩkĩre kĩyo gĩa kũmĩkinyĩra. Mĩoroto ĩyo nĩ ta ũpainia, ũtungata wa Betheli, na gũthiĩ Cukuru ya Bibilia ya Ariũ a Ithe Witũ Arĩa Matahikanĩtie. Ngumo cia kĩĩroho nĩ irĩgũteithagia ‘ũragĩre merirĩria marĩa moru ma wanake.’—2 Tim. 2:22.
4. Bata wa mũndũ gũkorũo arĩ mwĩhokeku nĩ ũrĩkũ?
4 Kwĩhokeka: Atũmwo matiarĩ na nganja atĩ wĩra wa kũgaĩra irio Akristiano a karine ya mbere arĩa maabataraga nĩ ũngĩarutirũo, tondũ ariũ a Ithe witũ arĩa maaheetwo wĩra ũcio maarĩ na “ngumo njega” na mooĩkaine marĩ andũ ehokeku. Ũndũ ũcio nĩ wahotithirie atũmwo acio kũruta mawĩra mangĩ ma bata. (Atũm. 6:1-4) Kwoguo, rĩrĩa waheo wĩra thĩinĩ wa kĩũngano, ũrute na ngoro yaku yothe. Wĩgerekanie na Nuhu, ũrĩa warũmĩrĩire biũ motaaro marĩa aaheetwo ma gwaka thabina. (Kĩam. 6:22) Jehova nĩ akenagio nĩ wĩhokeku, ningĩ wĩhokeku nĩ wonanagia atĩ mũndũ nĩ mũgima kĩĩroho.—1 Kor. 4:2; rora gathandũkũ “Ũguni wa Kũmenyeria Arĩa Angĩ.”
5. Ariũ a Ithe witũ arĩa anyinyi magĩrĩirũo gũkinyĩra mĩoroto ya kĩĩroho nĩkĩ?
5 Jehova nĩ aracokanĩrĩria andũ narua o ta ũrĩa kwarathĩtwo. (Isa. 60:22) Andũ ta 250,000 nĩ marabatithio o mwaka. Tondũ andũ aingĩ mũno nĩ maretĩkĩra ũhoro wa ma, nĩ kũrabatarania arũme marĩ na ngumo cia kĩĩroho nĩ ũndũ wa mawĩra ma kĩũngano. Kũrĩ na maũndũ maingĩ ma gwĩka ũtungata-inĩ wa Jehova ihinda-inĩ rĩrĩ gũkĩra hĩndĩ ĩngĩ o yothe. (1 Kor. 15:58) Inyuĩ tũmwana tũrĩa tũbatithie, hihi nĩ mũrakinyĩra mĩoroto ya kĩĩroho? Angĩkorũo nĩ mũreka ũguo, nĩ wĩra mwega mũrerirĩria!
[Mbica karatathi ka 2]
Tondũ andũ aingĩ mũno nĩ maretĩkĩra ũhoro wa ma, nĩ kũrabatarania arũme marĩ na ngumo cia kĩĩroho nĩ ũndũ wa mawĩra ma kĩũngano
[Ithandũkũ Karatathi-ini ka 3]
Ũguni wa Kũmenyeria Arĩa Angĩ
Tũmwana tũrĩa tũbatithie nĩ tũgunĩkaga rĩrĩa athuri a kĩũngano matũhe mawĩra na magatũmenyeria. Mũrori ũmwe wa mũthiũrũrũko aaikarĩte thĩ Nyũmba-inĩ ya Ũthamaki harĩa mbere akĩaria na mũhunjia ũmwe thutha wa mĩcemanio. Akĩona kamwana karũgamĩte hakuhĩ nao, agĩkoria kana keendaga kwaria nake. Gakĩmwĩra atĩ nĩko kaaheetwo wĩra wa gũtheragia hau rĩarĩrio-inĩ thutha wa mĩcemanio. Aciari ako meendaga kũinũka, no ko gatiendaga gũthiĩ gatarutĩte wĩra wako. Mũrori ũcio wa mũthiũrũrũko agĩkeherera acanjamũkĩte. Oigire ũũ: “Athuri a kĩũngano kĩu hĩndĩ ciothe nĩ maamenyagĩria tũmwana tũrĩa tũbatithie na njĩra ya gũtũhe mawĩra thĩinĩ wa kĩũngano. Nĩ ũndũ ũcio, gũtiaagaga kamwana kabatithie gegũtuwo mũteithia wa ũtungata hĩndĩ ĩrĩa yothe ndaaceragĩra kĩũngano kĩu.”