Ũrĩa Ũngiuga

Ũkĩambĩrĩria Kwĩruta Bibilia na Andũ Njuuma ya Mbere ya Agosti

“Hakuhĩ andũ othe nĩ mahoyaga. O na arĩa moigaga gũtirĩ Ngai nĩ mahoyaga rĩrĩa marĩ ũgwati-inĩ. Nĩ ũkuona Ngai ta athikagĩrĩria mahoya ma andũ othe?” Eterera acokie. Muonie karatathi ka mũthia ka Mũrangĩri wa Agosti 1, na mwarĩrĩrie ũhoro ũrĩa ũrĩ rungu rwa kĩũria kĩa mbere na rĩandĩko na arĩ rĩmwe rĩa marĩa monanĩtio. Mũtigĩre ngathĩti icio, na mũbange ũgaacoka mwarĩrĩrie kĩũria kĩrĩa kĩrũmĩrĩire.

Ririkana: Kĩonereria gĩkĩ kĩagĩrĩirũo gwĩkwo hĩndĩ ya mũcemanio wa ũtungata wa Agosti 3.

Mũrangĩri Agosti 1

“Tũraceerera andũ na njĩra nguhĩ tondũ aingĩ ao nĩ mamakĩtio nĩ ũrĩa ponografĩ ĩingĩhĩte. O na kũrĩ ũguo, kũrĩ angĩ aingĩ monaga ponografĩ ta ĩrĩ o ya gwĩkenia. Ũkuona atĩa? [Eterera acokie.] Jesu oigire atĩ no tũmenye kana kĩndũ nĩ kĩega kũgerera maciaro makĩo. [Thoma Mathayo 7:17.] Ngathĩti ĩno nĩ yonanĩtie maciaro ma ponografĩ. Ningĩ nĩ yonanĩtie ũrĩa mũndũ angĩka atoorie mũtugo wa ponografĩ.”

Amkeni! Agosti

“Andũ aingĩ mendaga gũtũũra ihinda iraihu o ũrĩa kũngĩhoteka. Hihi nĩ ũkuona kũgaacĩra gwa sayansi ta kũrĩ hĩndĩ gũgatũma andũ matũũre tene na tene? [Eterera acokie.] Ta rora kĩĩranĩro gĩkĩ gĩa gũcanjamũra. [Thoma 1 Akorintho 15:26.] No Ngai hihi akaahingia kĩĩranĩro kĩu kũgerera sayansi kana njĩra ĩngĩ? Na nĩ kĩĩ gĩtũmaga andũ makũre na makue? Ngathĩti ĩno nĩ yonanĩtie macokio ma Bibilia megiĩ ciũria icio.”